¹ "Sola ya yankpaalo n biani, ki yayadi ti yandi, n yankpaamuagu nni; O Diedo ñɔmaama n yeni." ² Ama, O Diedo, Israyeli Tienu ń yedi ya gobdikaaba n gobdi o buolu ya maama ne, "I yayadi n yandi, ki deli ki yaani ba. I ki fiini bipo Lanwani ii, N ba dadi i tuba, yin tieni ya tuonbiadi po. O Diedo nɔbonli nyeni. ³ Mini O Diedo mɔno n ba taani n yandi yaaba n sieni, min den yayadi ba ki gedi yeni ba ya diema nni, N ba cedi ban guani ya yankpaamuagu nni n pia ti muasɔngiŋandi, naakani ke bi ba pɔli, ki nɔbi. ⁴ Lanwani ii, n ba lingi ya gobdikaaba n baa gobdi ba, ke bi kan ya jie, ke bi go kan yadi mo. Bi kan diidi ki luo li yandi nni bá yanyenga. O Diedo ñɔmaama n yeni. ⁵ Diidi. a dana kpendi, O Diedo ñɔmaama n yeni. N ba cedi ke benpaanli ń pudi Dafiidi tibu yaabu n tiegi yeni po, O ba diedi bona kuli nani badciamo yeni. O baa tiendi o bona kuli yeni mi yanfuoma i, ki kaani ti mɔnkundi yeni mi teginma mi diema nni. ⁶ Lanya dana nni, bi ba faabi Juda, Israyeli ń baa mi yanduanma. Lanwani ii, ban ba yini o yeli maama n ne: O Diedo n tie ti teginma. ⁷ Lanya po, diidi, a dana kpendi, O Diedo ñɔbonli n yeni. Bi ji kan yedi ' O Diedo yua n fo, wani yua n ñani li nitaanli ti yombidi nni Ejypti diema nni.' ⁸ Ama, bi ba yedi, 'Nani U tienu yua n fo, ki den ñani Israyeli diegu nni yaaba, yeni bi puolŋuani, nujienu diema po yeni ban den gedi yeni ba ya diema nni kuli, lanwani ii, bi ji baa ye bi diecema nni i." ⁹ N ya nua o sawalpualo, n pali kuli yi cie ki baa n tugu nni i, n kpaba ń ya digbi, min ji ya tie nani o daañugaado yeni, nani ya nilo n ñuni ku daamɔngu, ke li paadi o yeni, ki dugni O Diedo yeni O maama yaama n gagdi ki ŋani yeni po. ¹⁰ Kelima, m diema gbie yeni a concona i. lanya po n cedi ke mi diema ye li pabɔnli nni kelima ti solindi po. Ti baadi kuodi, kelima bi sawalpuaba sani bia boncianla. Bi ki tuuni yeni bi paalu lan buali maama. Bi tuona kuli se tuonbiidi baba. ¹¹ Kelima, Bani bi sawalpuaba yeni salga yidkaaba jɔgni boncianla. N la bi biadma n gbandieli nni mɔno! O Diedo ñɔbonli n yeni. ¹² Lanya po i, ke bi sani baa gbie yeni li bɔnbɔnbiigli, yeni a ŋalma. Bi ba tudi ki lu ba, kelima N ba jiini mi yebiadma bipo, min ba dadi bi tuba ya binli. ¹³ Samari sawalpuala siiga nni, n la ti cancagindi: Bi pua sawali o bulo Baali yeli po, ki cedi ke n buolu kua mi tudma nni. ¹⁴ Jerusalema sawalpuaba siiga nni, n la ti tuonjɔgindi. Bi tieni mi conconma, ki go pua mi tofaama. Bi paandi bi tugtondanba pala, ke obakuli ń da lebdi o pali, ki ŋa o biadma; bikuli ji tua opo nani Sodɔmi niba yeni i, ke Jerusalema yaaba mo tie nani Gomɔri yaaba yeni! ¹⁵ Lanya po i, ke O Diedo, ki pia gbenma Tienu yedi ya maama ne, ke mi nua bi sawalpuaba, "Diidi, N ba cedi ban ŋmani ti muatontondi, ki ñu ya ñima n pia ti lɔbidi, kelima Jerusalema sawalpuaba po i, ke i tagli yadi mi diema nni kuli." ¹⁶ O Diedo, Ki pia gbenma Tienu ń yedi ya maama ne, "Da cengi mani ya sawalpuaba n pua yi sawali yeni. Bi pua yi tofaama sawali i! Bi wangi yi ya bona n ye bi pala nni i, ama laa tie ya maama n ñani O Diedo ñɔbu nni ka. ¹⁷ Bi wangi yaaba n ki fangi nni yeni, ki tua, 'O Diedo yedi: Mi yanduanma baa ye yeni yi.' Ki maadi yaaba n ŋua bi yanjagicelu, ki tua: 'Yebiadimaba kuli kan baa yi.' ¹⁸ O Diedo ń den bobni o tantannli ya daali, ŋma den ye likani, ki gbadi o maama, ki go la aa? ŋma den diadi o tubli, ki cengi wan den maadi ya maama? ¹⁹ Diidi, U taafaalu ba ña O Diedo kani, ki jiidi! O pabiencianli ba jiidi, ku taafaaciangu ń jiidi bi nibiadiba yula po. ²⁰ O Diedo pabiencianli kan sɔngi, kaa tieni o pali nni buama. Ya dana n kpendi, i ba gbadi li niima nni kuli. ²¹ Mini ka sɔni li sawalpuaba. Bani n tiini ki caa, Mii maadi ba libakuli, ama, bi nan pua bi niba sawali. ²² Kelima bi ya den ye min bobni ya tantannli kani, bi bo ba cedi n buolu ń gbadi n nialu, ki lebdi bi pala yeni bi sani, ki ŋa bi tuonbiadi, bi tuadibiada yeni bi janbi. ²³ O Diedo yedi, 'N tie kɔma nni Tienu baba yo oo, kaa tie fagma Tienu wani ii? ²⁴ Nilo ba fidi ki wuoni kaanuba, ke n kan la o oo? O Diedo ñɔbonli n yeni. Mii gbie tanpoli yeni ki tinga kuli ka aa? O Diedo ñɔmaama n yeni. ²⁵ N gbadi bi sawalpuaba n pua sawali, ki maadi yaali n yeli po, ki tua, 'U Tienu maadi yeni nni ti dangidi nni! U Tienu dɔgdi npo ti dangidi nni! ²⁶ Hali yeni u laa yognu i, ke li sawalpuaba baa wangi bi pali nni maama, ki pua mi tofaama sawali ii? ²⁷ Bi pua mi tofaama sawali, ki lingi ke ban cedi N buolu ń sundi n yeli i, yua n gbadi li sawali kuli, wan bɔgdi o kuantalielo, lan tieni nani bi yaajanba ń den sundi n yeli, ki ŋua, ki pugi o bulo Baali maama yeni i. ²⁸ Ya sawalpualo n dangi bonlakaali, wan pua o sawali. Ama, N ya waani ya sawalpualo, ke wan maadi ki waani bonli, wan pua sawali, ki waani n ñɔmaama yeni i mɔmɔni. I naaniidi bua be i idii siiga nni? ²⁹ N ñɔmaama ki tie nani mupienu yeni ka aa? O Diedo ñɔbonli n yeni. Maa tie nani hama yaali n mudi ku tangu yomyomi yeni ka aa? ³⁰ Lani n cedi, ke O Diedo yedi, 'N nani, ki ba kɔni yeni bi sawalpuaba, yaaba n su, ki wangi n maama, yeni bi lieba, ki tua ke mi ñani Mini O Diedo kani yeni. ³¹ O Diedo yedi, Jeremi ya maama ne, 'Diidi, N ba kɔni yeni bi sawalpuaba yaaba n yaadi bi ñɔna, ki maadi bi yuli po maama. ³² Diidi, O Diedo yedi, Mii tuo ya sawalpuaba n pia mi tofaama dangidi, ki kpaagi ki pua mi tofaama, ki kuandi mi tudma N buolu yaaba siiga, ki kuandi ba li yubɔnli nni. N nani li sawalpuaba, kaa tuo bipo, kelima Mini ka sɔni ba, Mii go teni ba ñɔbonliba kuli mo. Lanwani ii, li sawalpuaba ki pia todmaba kuli, N buolu po; O Diedo ñɔbonli n yeni. ³³ Li ya tie ke u buolu yaaba, bii sawalpualo, lanyaaka salga yidka buali a, 'O Diedo tugikpiagili tie be i?' ŋ an guani ki jiini ba, ki yedi ba, 'Yinba n tie O Diedo tugikpiagli, N nan go bab deli ki fagni yi.' O Diedo ñɔbonli n yeni. ³⁴ Li ya tie ke sawalpualo, bii salga yidika, lanyaaka u buolu nni yaaba, yaaba n tua, 'Ne wani tie O Diedo tugikpiagli i', N ba dadi bani yeni bi bi diegu nni yaaba kuli tuba. ³⁵ Yi bi baa maaadi i lieba, i kpiiba yeni i kuantalieba yaama n ne: 'O Diedo jiini ti be i? yeni, 'O Diedo teni ti li laa ñɔbonli i? ³⁶ Ama, li ji ki buali ke yin maadi 'O Diedo tugkpiagli po', kelima li tugkpiagli tie yuakuli yeni o lanbonli i, yeni o maacema i, ki ŋua yuakuli ń tugi ya tagli, kelima wan tieni ya tuonbiadi O Diedo, u paaciamu kuli daano, i Tienu yua n fo nintuali, ki bieni o pali i. ³⁷ Yin ba buali o sawalpualo maama n ne, 'O Diedo jiini ti ki be i? bii 'O Diedo yedi ti be i?' ³⁸ O Diedo ń bili ya ñɔbonli n ne, Ama, i ya yedi, ' O Diedo tugikpiagli i.' Yin yaadi i ñɔbu, ki yedi li lanbona yeni, ama, ke N nan sɔni, ke ban yedi yi, ' Mii ji bua yi yedi, "O Diodo tugkpiagli."' ³⁹ Yin fangi i yula, N ba lu yi hali ki fagni yi N kani. N ba lu yinba yeni u dociamu kuli, Min den puni yi yuu, i yaajanba yeni yinba kuli yeni. ⁴⁰ N ba jiini i yula po ya fee n ki pia gbenma, yeni ya sugdi n ki pia sundima.'"