¹ O Diedo den waani nni bonli, ke n la. Baabuodi lie, ke a kankana ye ti niinni, ki see O Diedo diegu nintuali. Li den tie, Babiloni bado, Nabukanesaari ń den cuo Juda bado, Jojakimi bijua Jojakini, Juda badijaba, a tuonsɔnbanda yeni Jerusalema maaba, ki gedi yeni ba Babiloni ti yonbidi yeni i. ² Babuoyengu nni kankana den ŋani, nani a kankankpiala yeni, ama ku baabuoliegu nni ya kankana den bedi ki biidi, hali kaa pia ŋmanma. ³ O Diedo den yedi nni, "Jeremi, a la be i?" N den jiini o, "Kankana. Ya kankana n ŋani boncianla, yeni ya kankana n biidi boncianla, kaa pia ŋmanma." ⁴ Lanwani ii, O Diedo den maadi yeni nni, ki yedi, ⁵ "O Diedo, Israyeli Tienu yedi ya maama ne: N ba guudi yeni ki nunmanga, ban ñani yaaba ki gedi yeni ba ti yonbidi yeni, nani ya kankana n ŋani ne, min sɔni yaaba ti yonbidi Kalide diema po yeni. ⁶ N ba nuali ba yeni ki nunmanga, ki guani yeni ba laafia, ki kaani ba bi diema nni. N ba maa ki kuani ba, n kan pua ki mudi ba, n kan ŋabi ba. ⁷ N ba yuandi ki kuani bi pala nni ya yantiali ke bi baa bani nni, kelima Mini n tie O Diedo. Bi baa tie n buolu, ke nmo tie bi Tienu. Bi ba guani n nintuali yeni bi pali kuli. ⁸ Ama, nani ti kankanbiidi, yaa n ki pia ŋmanma yeni, N ba sɔni Juda bado Sedesiyasi yeni o kpaaga yeni ya niba n sieni Jerusalema yeni mi diema nni, yeni yaaba n sani ki gedi Ejipti diema nni nani li kankanbiidi yeni i. ⁹ N ba kuani ba ti jawaanciandi nni, ki jiini bipo mi yebiadma, ki tinga po nibuoli kuli ń la, lan tua bipo, i fee yeni ñuali bonli, bi ba tua ti solindi yeni ti laadi bonli, min ba yayadi ba ban gedi naani kuli ya nibuoli po. ¹⁰ N ba sɔni bipo bu tɔbu, mi koma yeni u yianbiadu, yu n puodi, hali lan bolini bikuli min den teni bani yeni bi yaajanba ya diema yeni nni."