¹ Ban den maadi Jeremi ya maama, ke mi nua Juda buolu kuli po; Josiasi bijua, Josiakimi ń den kali Juda badgbandi po, li binnaali. Li den tie Babiloni bado, Nabukanesari ń den ga li bali ya binli i. ² O sawalpualo, Jeremi den kpaandi, ki yedi Juda buolu kuli yeni Jerusalema dogtieba kuli, li maama. ³ O den yedi ba, " Bina pilie n bina taa n yeni, hali Amoni bijua, Josiasi ń den kaa ti badigbandi po ya yognu, ki ban tuoni dinne, O Diedo maadi yeni nni yognu kuli, ke n go wangi yi o ñɔmaama kaa cedi, ama, i naa tuo ki ba cengi nni. ⁴ O Diedo den sɔni o naacenba, bi sawalpuaba kuli, ke bi maadi yi yognu kuli, ama yii cengi ba, yii diadi i tuba ke yin cengi ba mɔno. ⁵ Li sawalpuaba den maadi yeni yi yognu kuli, ki tua, 'Nilo kuli ń lebdi o pali, ki ŋa o biadima, o janbi yeni o tuadbiadi, lani n tie yin fidi ki kali O Diedo ń den teni i yaajanba, ya diema nni, hali ya yognu n ki pia gbenma. ⁶ Lanwani ii, yin da ŋua nibuoltoe buli, ki gbaandi ki pugi yi. Yin da tagi li buli ki biendi n pali, ki kua li yubɔnli nni.' ⁷ Ama, i naa den cengi O Diedo maama; O Diedo ñɔbonli n yeni. Ama i tagi yeni i nuuceli li buli, ki bieni N pali, ki kuani i yula li yubɔnli nni. ⁸ Lanwani ii, O Diedo, u paaciamu kuli daano yedi ya maama ne, 'Nani yin ki cengi n maama yeni, ⁹ Diidi mani, N ba yini ki taani niganu po diema nibuoli kuli yeni N naaciemo Babiloni bado, Nabukanesari; ban tuogi yi, ki kɔni yeni i diema, yeni i buolu kuli, ki taani yeni i tinkundogi kuli n kagni ki lindi yi kuli; O Diedo maama n yeni. Kelima, N ba puni ba u sanu, ban pua ki mudi, ki bolini i diema. N ba cedi ban tua ipo jawaanciadi yeni li ñuali bonli, i dima ń tua diegbengu, hali ya yognu n ki pia gbenma. ¹⁰ N ba cedi i pamanyani yeni lanlaayieni ń gbeni, ki cikpenga yeni o pocaano calo pocaayani ba gbeni, i nannanyani ba gbeni, ki fidsanga yenyenma ń gbindi. ¹¹ Mi diema kuli ba tua diegbengu yeni ti jawaanciandi kaanu, i nibuolu baa tuuni a yonbituona Babiloni bado po hali bina piilele (70). ¹² Ama, bina piilele ya pendi, N ba dadi Babiloni bado yeni o nibuolu tuba, ki taani yeni Kalide diema yaaba kuli ya tuba, kelima bi tuonbiadi ń tuni ba ya tagli po; bi diema ba kpandi, ki tua diegbena, ya yognu n tuu ya yognu kuli; O Diedo ñɔbonli n yeni. ¹³ Lan wani ii, N ba cedi min den yedi ke Jeremi ń pua ya sawali yeni, min den cedi ke bi pua ya sawali kuli li diema yeni i nibuoli kuli po yeni, ń tieni ki tii. ¹⁴ Kelima, nibuotoe yeni i badcianba mo ba fii, ki tuogi ba, ki cuo ba ti yonbidi. N ba guani ki pa ba bi tuadibiadi yeni bi nui tuonbiadi pani.'" ¹⁵ Kelima, O Diedo, Israyeli Tienu yedi nni ya maama ne, "Ga N nuu nni ya kɔpi n gbie yeni N pabienli daamɔngu ne, ki cedi min ba sɔni a ya nibuolu kani, ban ñu li daama. ¹⁶ Kelima, bi ya ñuni, ki guo, bi baa jadbi, bi ya la min ba sɔni bi siiga, ya jugsiega, bi ba paagi bi pala, ki luo mi yama." ¹⁷ Lanwani ii, n den ga O Diedo nuu nni li kɔpi, ki cedi ke wan den sɔni nni ya nibuoli kani kuli ñuni li niinni: ¹⁸ Jerusalema yeni Juda badtieba yeni i dociami kɔnbala kuli yeni bi yudanba kuli, den tua diegbendi, ki tua jawaanciandi yeni ñuali bonli, yeni ti laadi yeni ti solindi bonli, nani li kaani ń li tie maama hali yeni dinne yeni. ¹⁹ Nibuotoe mo ba ñu li kɔpi nni daama: Ejipti diema bado, Farahɔn yeni o naacenba, o kɔnbala yeni o yudanba yeni o niba kuli; ²⁰ Ya nibuoli n taani biyaba, ki kua ki ŋmadi kuli, yeni Uki diema baditieba, yeni Filisitini diema badiba kuli, Acikeloni yaaba, Gasa, Ekrɔn yeni Acidodi diema yaama n sieni kuli; ²¹ Edomi yeni Mowabi, yeni Ammoni yaaba kuli. ²² Tiiri yeni Sidoni badiba kuli, mi ñincianma duodima diema baditieba kuli, ²³ Dedani, Tema yeni Busi diema, yeni yaaba n kogidi bu yula, ki kuogi bi langbiali kuli bankuli ba ñu li k̵ɔpi nni daama. ²⁴ Ya nibuoli mo n ba ñu li kɔpi nni daama n ne: Arabi baditieba kuli yeni ya nibuoli n kua ki ŋmadi, ki kaa mi fanpienma nni kuli; ²⁵ Simiri diema baditieba kuli yeni Elami baditieba, yeni Medesi badiba kuli; ²⁶ Nijienu po diema baditieba kuli, yaab n kua ki kuu, yeni yaaba n kua fagma kuli; Yuakuli yeni o kpiiba yeni u tingbanu po diema kuli. Babiloni bado n ba juodi ki ñu li kɔpi nni daama. ²⁷ O Diedo den yedi nni, "Mɔla, ŋan yedi ba, 'O Diedo, U paaciamu kuli daano, Israyeli Tienu yedi ya maama ne: Ñu mani ki guo, ki ya jadibi, ki siini, ki baa, ki ya bili, ki sua ke min sɔni ya jugsiega pundi i siiga.' ²⁸ Bi ya yie ke bi kan ga a nuu nni li kɔpi, ki ñu, ŋan yedi ba, 'O Diedo, U paaciamu kuli daano yedi ya maama ne: Li buali ke yin ñu li kɔpi nni i. ²⁹ Kelima, Diidi mani, N ba jiini mi yebiadima ban taagi n yeli ya diema nni i, i tama ke yinba n ba sani ki ciadi ii? Imo kan sani ki ciadi, kelima, N yini ki jugsiega mi diema niba kuli po i! O Diedo, U paaciamu kuli daano ñɔbonli n yeni.' ³⁰ ŋan pua sawali ki waani bikuli, ŋan yedi ba, 'O Diedo fu yeni yi hali tanpoli, O tangi hali o kaangagdiŋamu nni, ki fu, o tangi ki fu yeni wan die ya nibuolu, yeni yaaba n tuuni ku daamɔngu tuodikaanu, O fu yeni o buolu yaaba n ye ki tinga po. ³¹ I baa gbia bu tɔbu yigni hali i tinbiani kuli, kelima, O Diedo bua jia ti buudi yeni i nibuoli, o bua jia ti buudi yeni nisaalmiali kuli. O Diedo ba cedi ki jugsiega ń nandi bi nibiadiba kuli; O Diedo ñɔbonli n yeni.' ³² O Diedo, U paaciamu kuli daano yedi ya maama ne, 'Diidi mani, Fala yeni mi yebiadma ba ña dogu, ki tuadi dogtianu, hali ku taafaaciangu ń fii u tinbianu po. ³³ O Diedo ń ba kpa yaaba lanya dana nni, baa bili, ki cili tinbianu, ki ban tuoni tinbianu; bi kan tieni bipo kuuŋanbli, bi kan taa bi kuuma, ki buali ban piini ba mɔno. Bi ba tua nani bugdi yeni, u tingbanu po. ³⁴ Bi yankpaaba, yin buudi ki fabni, yigni mani ki mia mi faabma! Duani mani ki bindibindi mi tama nni, yinba i buoli gobdikaaba, kelima, ban ba kodi yi, ki go yayadi yi ya dana pundi. Bi ba yayadi yi nani ku yɔgu tiagu ń yi baa ki mudi ki yayadi maama yeni i. ³⁵ Wuonkaanu ki ye bi gobdikaaba po, faabma ki ye i buoli yudanba po. ³⁶ Ya cengi mani bi yankpaaba yigni, yeni i buoli yudanba bubuuli yeni bi fanfabni. Kelima, O Diedo pua ki mudi, ki bua bolini bi yankpaakaanu. ³⁷ Lanwani ii, O Diedo pabiencianli po, ya yankuli n den ye yeni mi yanduanma ba bodi cain. ³⁸ O ñɔli ki ŋa mi diema nani o yangbanlo n yi ŋa o duankaanu yeni, kelima, yibali pabiencianli po, mi diema ba tua fala yeni mi yebiadma kaanu, kelima O Diedo pabienli yaali n co nani u mupienu yeni po.'"