¹ Josiasi bijua, Josiakimi ń den dini li bali ya yognu, O Diedo den maadi yeni Jeremi, ki yedi o ya maama ne, ² " Mini O Diedo n yedi ya maama ne: Jeremi, ŋan sedi U Tienu diegu luolu po, ki maadi yeni yaaba n ña Juda dociami po, ki bua gbaani ki pugi O Die do li gbandieli nni yeni. ŋan yedi ba min waani a ke ŋan yedi ba ya maama kuli. ŋan da pɔdi bá lanbonyenli! ³ Li ki kandi ban cengi a maama, bi siiga nni, yuakuli ń lebdi o pali, ki ŋa ti tuonbiadi sanu, lanwani ii, N mo ba lebdi min den jagi ke N ba jiini bipo ya yebiadma yeni ya fala, kelima bi tuadibiadi yeni tuongunda po. ⁴ Lanwani ii, ŋan yedi ba, 'O Diedo yedi ya maama ne: I ya ki cengi n maama, ki ŋɔdi, ki cɔlni min den bili yi ya ñɔmaama sanu; ⁵ I ya ki cengi n naacienba, bi sawalpuaba maama, min suani yaaba ipo yognu kuli yeni, ke yii bua yin diadi i tuba ki cengi ba yeni! ⁶ Lanwani ii, n ba tieni ya diegu ne nani min den tieni Silo maama yeni i; N ba cedi ya dogu ne ń tua ti solindi bonli ki tinga nibuoli kuli po.'" ⁷ Salga yidkaaba, bi sawalpuaba yeni li nitaanli kuli den gbadi Jeremi ń den pua sawali, ki yedi ya maama, O Diedo diegu nni. ⁸ Jeremi ń den pua ba sawali, ki waani li nitaanli, O Diedo ń den yedi o ke wan waani ba ya maama ki gbeni, salga yidkaaba, bi sawalpuaba yeni li nitaanli kuli den cuo Jeremi, ki yedi o, "Li dagdi yeni tin kpa ŋa! ⁹ Li tieni ledi i, ke a pua sawali O Diedo yeli po, ki yedi, ke ya diegu ne ba tua nani Silo yeni, ke falaciamo yeni mi yebiadma ba baa u dociamu ne nni, ke u kan ya pia ya niba n baa kua u niinni ii? Bi niba kuli den kagni ki lindi O Diedo diegu, yeni Jeremi. ¹⁰ Juda diema yudanba den gbadi li laabaali, ki fii, badidiogu, ki pundi O Diedo diegu kani. Bi den nagni O Diedo diegu ki kali bu bulñɔpaanbu kani. ¹¹ Salga yidkaaba yeni bi sawalpuaba den yedi u dogu yudanba yeni li nitaanli ya maama ne, ki yedi, "Li dagdi ke o ja ne ń kpe, kelima o pua sawali ki yedi ya maama n bia ti dogu po nani yin gbadi maama yeni!" ¹² Lanwani ii, Jeremi den maadi yeni bi yikodanba yeni li nitaanli kuli, ki yedi, "O Diedo n sɔni nni, ke min pua sawali, ki waani ya maama n bia i diegu yeni i dogu po, nani yin gbadi ya maama ne. ¹³ Lanwani ii, yin lebdi i tɔgu yeni i tuongunda, ki cengi O Diedo, i Tienu maama, lani n tie wan lebdi wan den jagi ki ba jiini ipo ya fala yeni ya yebiadma. ¹⁴ Li ya tie mini yapo, Diidi mani nni! N ye i nui nni i. Yin tieni nni yin bani ke yaali n ŋani ipo. ¹⁵ Ama yin ya bani ke i ya kpa nni, li tie ke i wuli yua n ki pia tagliba kuli ya sɔma i, lanwani ii, i ba tugi i tagli i yula po yeni i diema yeni i buolu kuli po, kelima, i mɔmɔni, O Diedo n sɔni nni, ke min pua yi sawali, ki waani yi o maama, man kua i tuba nni." ¹⁶ Lanwani ii, bi yudanba den yedi salga yidkaaba yeni sawalpuaba, " Li ki buali ke o ja ne ń pke, kelima o kpaandi ki pua sawali O Diedo, ti Tienu yeli po i. ¹⁷ Lanwani ii, ki cili bi cancannikpelba, den fii, ki maadi yeni li nitaanli. ¹⁸ Bi den yedi, " Moraciti yua, Micihe den pua sawali, Juda bado, Esekiasi bali yognu. O den pua sawali ki maadi yeni Juda nitaanli, ki yedi, 'O Diedo, u paaciamu kuli daano yedi ya maama ne: Siyɔn ba tua nani kuanu yeni i, Jerusalema ba tua nani kootuujimaanbeligu yeni.' ¹⁹ Juda bado Esekiasi yeni Juda yaaba kuli den kpa o oo? O bado den ki jie O Diedo, ki miini yuli, ki mia sugli O Diedo nintuali, ke o lebdi o yanjagli yaali tie wan den bobni ya yebiadma bipo oo? Lanwani ii, ti go ba tieni ti tuonbiadi ki tugni ti yula li yubɔnli ki biani ti miana aa?" ²⁰ Lanyognu i ke jatiano den ye, ki pua sawali O Diedo yeli po, lani n tie Cemaya bijua, Uriya, ke o tie Kireyati Jeyarimi yua. Omo den pua sawali, ki yedi yaali n bia u dogu yeni mi diema po, nani Jeremi ń pua sawali ki yedi ya maama ne. ²¹ Ama, o bado Josiakimi yeni o sejenba yeni o yikodanba ń den gbadi li laabaali, ke o bado den bua kpa o; Uriya den gbadi li maama, ke ti jawaanciadi cuo o, ke o sani ki gedi ki wuoni Ejipti diema nni. ²² Lanwani ii, o bado Josiakimi den sɔni bi niba Ejipti po; Acibori bijua Elinatani yeni jatɔba, den gedi Ejipti diema nni. ²³ Bi den ban cuo Uriya, ki guani yeni o mi diema nni, o bado Josiakima kani, ke o cedi ke bi kpa o yeni ki jugsiega, ki taa o kuuma ki ban luni bi nifanba kaakula nni. ²⁴ Ama, Cafani bijua Ahikami den ga Jeremi, ki guu o, kaa tuo ki ba ŋa o li nitaanli nui nni, ban kpa o.