¹ Josiasi bijua Sedesiasi ń den ga Juda bali ya yognu, O Diedo den maadi yeni Jeremi ya maama ne. ² O Diedo ń den maadi Jeremi ya maama n ne, "ŋan piani i baabi, ki tieni a landa, ki la li biana a tulu nni. ³ ŋan sɔni li piana ki teni Edomi bado, Mowabi bado, Ammoni yaaba bado, Tiiri yaaba bado yeni Sidoni bado. ŋan tieni li piana li baditieba tonda yaaba n cua Jerusalema, Juda bado Sedesiasi kani yeni. ⁴ ŋan go teni ba li ñɔbonli, bi badiba po, ban togdi ba ya maama ne, 'O Diedo, u paaciamu kuli daano, Israyeli Tienu yedi ya maama ne: Yin ba maadi i baditieba ya maama n ne, ⁵ "Mini O Diedo n tagi ki tinga, N paaciamu yeni n banma po. Mini n go tagi bi niba yeni ti yandi, Mini n puuni min bua yua, ke o tiegi n nintuali n tagma kuli. ⁶ Ama mɔlane, Mini n taa mi diema ki tieni n naaciemo, Babiloni bado, Nabukanesari nui nni. Mini n go taa i kuani nni bonfuoda kuli ki tieni o nui nni, ke likuli ń ya todi o o tuana nni. ⁷ Kelima, i nibuoli kuli baa tuuni opo, bijua po yeni o yaabila po, hali ya yognu ke ya nibuoli n paa ki cie o yeni ya baditieba n pia u paaciamu ba ti cua ki tuogi o, ki diedi omo. ⁸ Lanwani ii, ya diema yeni ya nibuolu n yie ke bi kan sɔni Babiloni bado, Nabukanesari po, ki yie ke o kan la ya pianli ne, o tulu nni, ki ŋɔdi Babiloni bado, Mini O Diedo n ba fii ki sedi opo yeni ki jugsiega, mi koma yeni u yianbiadu, ki ban bolini o diema cain; O Diedo ń bili ya ñɔbonli n yeni. ⁹ Lanwani ii, yin da cengi i sawalpuaba, i gbangbinda, i tanbipuala, i jabaaba yeni i ŋantaadi danba, yaaba n maadi yi yognu kuli, ki tua, 'Da tuo mani ki sɔni Babiloni bado po.' ¹⁰ Kelima, bi pua yipo mi tofaama sawali, ki bua ban ñani yi i diema nni, ki fagdi yeni yi, kelima, N ba deli ki ñani yi i diema nni, yin ban kpe ti yonbidi nni. ¹¹ Ama ya nibuolu n tuo ki lani Babiloni bado pianli, ki tuo ki sɔni opo, N ba cedi ban ya ye bi diema nni, ki ya ko, ki go maa ki ya kua bi tinmu po; O Diedo ñɔbonli n yeni. ¹² Lanwani ii, N maadi yeni Juda bado Sedesiasi ki yedi o li maama, "Tandi mani i tuli, ki la Babiloni yonbipianli, ki tuo ki sɔni wani yeni o niba po, lani n tie yin ya pia li miali. ¹³ Be n cedi ke yinba yeni i niba kuli bua yin kpe ki jugsiega, mi koma yeni u yianbiadu kuuma, nani min bili ya ñɔbonli ya nibuoli n yie ke bi kan sɔni Babiloni bado po yeni ii? ¹⁴ Yin da cengi i sawalpuaba maama yaaba n maadi yeni yi, ki tua, 'Da tuo mani ki sɔni Babiloni bado po,' kelima, bi pua yi tofaama sawali ipo. ¹⁵ Mini O Diedo ka sɔni ba; O Diedo ñɔmaama n yeni. Bi pua yi mi tofaama sawali, ki bua ban bɔndi yi, yin kua mi tudma nni, min deli ki ñani yi, yinba yeni bani ya sawalpuaba n pua ipo sawali yeni, yin ban kpe ti yonbidi nni i.'" ¹⁶ N kpaandi ki maadi salga yidkaaba yeni bi dogtieba li maama, ki yedi ba, "O Diedo yedi mine: Da cengi mani i sawalpuaba, yaaba n pua ipo sawali, ki tua, 'Diidi mani, ban den taa O Diedo diegu nni ya tiadi ki gedi yeni ti Babiloni yeni, mɔlane bi ji gɔa ki ŋmiandi tini n yeni! Bi pua ipo tofaama ya sawali i. ¹⁷ Da cengi mani ba. Li buali ke yin tuo ki sɔni Babiloni bado po i, ki ya pia li miali. Be ya po i, ke i bua i dogu ne ń tua diegbengu uu? ¹⁸ Bi ya tie sawalpuaba, ki pua sawali O Diedo yeli po i, lanwani ii, cedi mani ban mia O Diedo, U Paaciamu kuli daano, wan da cedi ban doli ya tiadi n sieni O Diedo diegu nni, Juda bado diegu nni yeni Jerusalema bado diegu nni ki gedi yeni ti Babiloni dogu nni. ¹⁹ O Diedo, U Paciamu kuli daano maadi ya maama ne, yaama n nua a bunbuna, ti tadiciandi yeni ya tiadi n sieni u dogu nni po; ²⁰ Ya tiadi ke Babiloni bado Nabukane saari den ki fidi ki taa, wan den cuo Juda bado Josiakimi bijua josiakini, Jerusalema, ki gedi yeni o ti yonbidi Babiloni ki taani Juda yeni Jerusalema yudanba yeni bi yikodanba yeni bi nigbenga kuli. ²¹ O Diedo, u paaciamu kuli daano, Israyeli Tienu, den yedi ya tiadi n sieni U Tienu diegu yeni Juda yeni Jerusalema badiba diedi nni, ya maama ne, ²² 'Bi ba taa li tiadi kuli, ki gedi yeni ti Babiloni, tin ya ban ye lanpo, hali yeni ya yognu ke N ba fii ki mua mi jama li tiadi po; ki guani yeni tikuli, ki bili tin den ye ya kaanu O Diedo ñɔmaama.'"