¹ O Diedo yedi ya maama ne: Diidi, N ba fii ki sedi Babiloni po yeni Lebi Kamayi po, nani ya taafaaciangu n bolindi yeni. ² N ba sɔni bi canba Babiloni, ban pua ki mudi, ki bolini bi diema, kelima, falabiado daali ya pundi, bi ba ña i kaani kuli po, ki cua ki tuogi o. ³ Da puni mani bi dabantɔla yaaga ban tɔa, da cedi mani ban yie bi tɔtiadi yeni bi gbankɔnditi. Da jie mani bi jawaaba niñima; yin bolini bi tɔtieba kuli. ⁴ Kelima, ban pua ki duoli yaaba ba baa Kalide yaaba diema nni, ban kpaa yaaba mo ń baa bi sanjala po. ⁵ Kelima Israyeli yeni Juda naa luo bi Tienu, O Diedo, kipia gbenma Tienu, Bá yeni bi diema nni ń gbie yeni ban padi ya pada, ki fali Israyeli Tienu, yua n gagdi ki ŋani. ⁶ Sani mani ki ña Babiloni yaaba siiga; yuakuli ń faabi o miali. Da kpe mani bi ya tagli po. Kelima, u yognu pundi ke O Diedo ń tuu ba li panli. O ba ŋmiani ba ban tieni yi yaali kuli. ⁷ Babiloni n den tie ya wula tadñukaaga, ke O Diedo den taa, ki ñuni ŋanduna kuli; I nibuoli den ñuni lanya daama i, ki guo, ki gaadi. ⁸ Babiloni ba baa mɔla, ki bodi. Ban buudi, ki fabni! Teni o mani a ñɔgibina, wan tebi o yuli; li ki kandi o ba baa laafia. ⁹ 'Ti bi bua tin tebi Babiloni, ama, waa paagi. Cedi mani tin ñɔli o, ki yaadi ki ŋa o, Tin gua ki kuni ti diema nni. Kelima o biidi ba kpedi ki do tanpoli, ki pundi ti talwadi nni. ¹⁰ O Diedo kadi ki waani ke tii pia tagliba kuli. Cua mani tin guani Siyɔn po, ki ban togdi O Diedo, ti Tienu ń tieni ti yaali.' ¹¹ Luani mani i dabanpiemi, ki pili i gbankɔnditi. O Diedo bobni li yanjagli ki, fiini Medesi baditieba, ki ba bolini Babiloni Li tie O Diedo po pantuuli i, pantuuli yeni ban den pua ki mudi o gbandieli. ¹² Fii mani ki sedi Babiloni bilinguona po; pugni mani yaaba n guu u paalu; baa mani yaaba n ba ya see, ki guu; Kelima O Diedo pia o yanjagli, o ba tieni wan den bili ke o sɔni Babiloni yaaba maama. ¹³ Yinba yaaba n kua ki kuu mi ñincianma, ki pia ŋalmani boncianla, a yemanma yeni ŋalmanbuama kuli juodma pundi a dana bianu ludi ki cua yenma. ¹⁴ O Diedo, u paaciamu kuli daano poli o yeli po, 'N ba gbieni yibalinba nani ti naasuudi yeni, ban ya yigni bu tɔbu yigni, ki tuogi a.' ¹⁵ O paaciamu po i, ke o tagi ki tinga; O tagi ŋanduna yeni o yanfuoma. O bancianma po i, ke o ladi ti talwadi. ¹⁶ O ya yaadi ki maadi, se mi ñima ń taani kaanyendu tanpoli po, u taayiinu ń ladi ki gbie hali yeni i tinbiani. O yi tieni i taañigdi, ki taaga po, ki fiini u taafaalu wu ye naani. ¹⁷ nilo kuli banma po n yi cedi wan tua yanpiidaano. Bi maaba mo ń di i fee, kelima ban duadi ya buli po. Kelima ban tagi ya buli yeni bi nui ki pia mayuli, fuomaba kuli ki ye i niinni. ¹⁸ Yii pia todmaba kuli, bi tuona kuli, fanma; fala yognu kpendi, ke lankuli ba bodi. ¹⁹ Ama U Tienu, Jakɔbo ya biinu nan ki tie nani i buli yeni ka, kelima, wani n tagi, ki go die bonli kuli. Wani n go die Israyeli buolu; O yeli n tie O Diedo, u paaciamu kuli daano. ²⁰ Fini n den tie n tɔbu kudidondoli, n tɔtiadi. N den pua ki mudi i nibuoli diema yeni fini i. ²¹ Yeni fini i, ke den jaa ki mudi i taami yeni bi tandanba; yeni fini i, ke n den jaa ki mudi ti tɔturdi yeni yaa n den ŋmagdi ti kuli. ²² Yeni fini i, ke n den jaa ki mudi bi jaba yeni bi puoba; yeni fini i, a nikpela yeni a bila kuli. Yeni fini i ke n den jaa ki mudi bi naacenba yeni bi jifanba. ²³ Yeni fini ke n den jaa ki mudi bi yankpaaba yeni bi yankuli; yeni fini i, ke n den jaa ki mudi bi kpaakpaaba yeni bi naakpaakuola yeni bi kpaakotiadi kuli. Yeni fini i, ke n den jaa ki mudi gueneerinba yeni yikodanba. ²⁴ Kelima, a nunbu nni i, ke n ba tuu Babiloni yaaba yeni Kelide diema yaaba li panli, kelima ban tie Siyɔn ya biadma kuli po; O Diedo ñɔbonli n yeni. ²⁵ Fini u dogmudu juali, n fii ki sedi apo; fini yua n mudi ŋanduna kuli; O Diedo n yedi yeni. N ba fii ki sedi apo, ki cedi ŋan bindi bindi a juatana po, ki jiidi ku jidgu nni, ki cedi ŋan tua ya juali n co mukuana baba. ²⁶ Bi kan ji ñani a kani lɔdmu tana yeni tanpuutana; Kelima a ba tua nufanu kaanu i; O Diedo ñɔbonli n yeni. ²⁷ Caani mani tuudicabli lan waani ŋanduna kuli. Piebi mani li naatunli i nibuoli po. Yini mani i nibuoli ki taani yii, yin tuogi Babiloni: Yini mani Arati, Minni yeni Acikenasi yaaba.Puogi mani jakɔndibiemo wan gobdi yaaba n ba pua bu tɔbu yeni o; taani mani i taami ban ya milbi nani ti naasuudi yeni. ²⁸ Bobni mani i nibuoli kuli yaaba ban fii ki sedi opo. Taani mani Medesi baditieba yeni bi gufenerinba yeni bi yikodanba kuli yeni ban die ya dogi kuli. ²⁹ Kelima ki tinga ba digibi, ki kua ti yanyagdi nni, O Diedo ń den bili ke o ba tieni Babiloni yaali ya tieni ki tii, O ya cedi ke Babiloni pua nufanu, ki tua diegbendi, nisaalo ń ki ye naana. ³⁰ Babiloni jakɔnda gbali bu tɔbu, ki sani ki ban wuoni ti tɔbuodi nni. Bi paalu kuli gbeni, bi ji tie nani puoba yeni i. bi juu bi diedi kuli, bi pua ki mudi bi bulñɔjabu kpakpaana. ³¹ A tonda tiini, ki lendi bi lieba i sani, ki bua ban caa Babiloni bado u tondu, ki yedi o ke bi pua ki paadi Babiloni diema, ki cebni mi biani kuli. ³² Lanwani ii, bi diedi mi kaanpaali yii n kuu u kpeciamu yeni; Yibalinba juu ban dugi ya kaanpaali po yeni, tɔginkaanu ji ki ye, li ŋmadli kua Babiloni jakɔnda siiga. ³³ Kelima, O Diedo, ki pia gbenma, Israyeli Tienu yedi ya maama ne: Bi nugi Babiloni nani u jalu yeni i. Li ji kan waagi yeni u jietaagu yognu ń pundi opo. ³⁴ Babiloni bado, Nabukanesaari dini nni; ki kuani nni i yanbani nni; o mudi nni cain, ki cedi ke n tua bobkuonli. O nali nni nani o bonfuodbiado yeni. ki yanbiadga yeni gbieni ki puogu yeni min den pia ya bonmɔnli kuli; o pua nni u nufanu. ³⁵ Yaaba n kua Siyɔn ba yedi, 'N sɔma ń wuli Kalide yaaba yula po.' Jerusalema ba yedi, 'N sɔma ń wuli Kelide yaaba yula po.' ³⁶ Ama O Diedo yedi ya maama ne, Diidi, N ba ñii a ciaga, ki kɔni, ki gaa a, N ba tuu apo li panli. N ba cedi Babiloni ñima yeni o kpeni kuli ń fuadi. ³⁷ Babiloni ba tua tangbana, i fuasangbanli ń wuondi naani, nufanu kaanu, ya diegbendi ke nilo ba la, ki yigni i jawaandanyigni. ³⁸ Babiloni yaaba ba duni na a yangbanbila yeni i. Bi ba ŋuundi nani a yangbanjapana yeni i. ³⁹ Ki nianga ya cuo ba, ke bi yama kua mi jiema nni ya yognu, n ba bobni bi jiema bipo, ban di, ki guo, ki ñuni ba mi daapaama, bi pala ń mangi, ban guo, ki gaadi, ki guani, ki ji da findi palbu; O Diedo ñɔbonli n yeni. ⁴⁰ N ba pigi ba nani a patona yeni a ŋuabuana yeni i, ki gedi yeni ba u yankodkaanu. ⁴¹ Be n tieni ii, bi pua ki paadi Babiloni, ki diedi ma! Lanwani ii bi paadi ki diedi ki tinga nni kuli kpiagidi. Diidi Babiloni ń pua nufanu maama, ki tua diegbendi i nibuoli nni kuli. ⁴² Mi ñincianma ñingola fii yeni u fuugu ki yilni Babiloni! A ñingola yeni ku fuugu milni Babiloni. ⁴³ Babiloni dociami kpandi ki tua pabɔnli kaanu, tinkuonga yeni fanpienma, nilo ń ki ye naani, nisaalmiali ń kan fidi ki pɔndi naani. ⁴⁴ lanwani ii, N ba buu, ki cuo Babiloni buciamo, Beli. N ba ŋmaa o, wan siini wan nali yaali kuli, i nibuoli kan ya puubi ki caa o kani yeni bi paabu. Babiloni bilinguona ba baa, ki mumudi. ⁴⁵ N buolu, sani mani ki ña bi siiga nni. Yuakuli ń sani O Diedo pabiencianli, ki faabi o miali. ⁴⁶ Da cedi mani jigi ń cie, ti jawaandi ń kua yi kelima mi diema laabaali po. kelima dunne ya laabaali ba cua. Lani ya pendi, jeli laabaalitɔa n didi ba cua, ti jadi yeni li mabinli ba fii kikandi mi diema nni. paatielo ba deli ki fiini paatielo. ⁴⁷ Ama, diidi mani, a dana kpendi, ke n ba buu, ki cuo Babiloni buli yeni mi nannana kuli. Bi diema kuli ba di i fee, ban ba nandi ki pua yaaba ba baa ki kpe bi diema nni i. ⁴⁸ Lani ya pendi, i pamandanyani ba fii ki loli tanpoli yeni ki tinga nni, kelima Babiloni tingbali po. Yaaba n ba mudi Babiloni ba ña nijienu po i; ne tie O Diedo ya maama i. ⁴⁹ "Nani Babiloni ń den cedi ke Israyeli tinkpiba baa maama yeni ii, omo ya tinkpiba ba baa Babiloni diema nni i. ⁵⁰ Yinba yaaba n sani ki ciadi bu tɔbu, sani ki yaadi mani, ki fagdi! da see mani likani. I ya sani ki fagdi, yin tiadi O Diedo po, ki nan da sundi Jerusalema po. ⁵¹ Ti dini i fee, kelima ti gbadi ya sugdi, i tagli ke bi yaadi ki maadi ti nintuali, kelima bi canba cua ki ban kua hali O Diedo gbandieli nni, u kaangagdinŋamu nni. ⁵² Ama, diidi mani, a dana kpendi, ke N buu ki cuo Babiloni nannana yeni mi buli kuli, ban pua ki duoli yaaba baa dua ki duni i kaani kuli mi diema nni. ⁵³ Kelima, bá Babiloni ya kpedi ki tuu ti talwadi bii ki duoni o bilinguona ke a kpedi maama kuli, yaaba n ba mudi mi diema ba tɔgni Mini O Diedo kani i, ki baa o; O Diedo ñɔbonli n yeni. ⁵⁴ Ya ceng mani ya pabɔnyigni n ña Babiloni po, Cengi mani Kalide diema ń baa ki mudi ki tieni ya fuugu. ⁵⁵ Kelima O Diedo pua ki mudi Babiloni. lani n cedi ke u nialciamu fii ki ki duni. Bi yibalinba fuugu tie nani i kpenciami ñima ń puubi ki mɔa walwalwali maama yeni i. ⁵⁶ Kelima, yaaba n ba pua ki mudi bi diema tuogi ba. Bi tuogi Babiloni! Bi cuo bi tɔtieba kuli. Bi kɔnli bi dabana, kelima O Diedo tie ya Tienu n tuugi li panli i. Wani n ba ŋmiani ba ban tieni yaali kuli. ⁵⁷ Kelima N ba ñuni o badijaba, o yanfodanba, o yudanba yeni o tɔtieba kuli mi daapaama ban guo, ki guani, ki ji kan findi; O Diedo, o Badciamo ñɔmaama n yeni O yeli n tie O Diedo, u paaciamu kuli daano. ⁵⁸ O Diedo, u paaciamu kuli daano yedi ya maama ne: Babiloni bilinguonciama ba baa ki mumudi yomyomi, ban juu o bulñɔciandi ganpaala kuli. Bi niba ba sua ke bi sɔni tuonkuonli; ban a fala ki sɔni ya tuona kuli, bi tieni li u mu po i, kelima bi ba juu lankuli." ⁵⁹ Ya maama ke Jeremi, o sawalpualo den yedi Maciseyia yaabili, Neriya bijua Serayia, wan den caa yeni Juda bado, Sedesiasi Babiloni po, o bali binnaali binli. Li sa ke Serayia tie O bado guudkaaba yudaano i. ⁶⁰ Jeremi den diani tigbabikaali nni ya fala yeni ya yebiadma n ba jiidi Babiloni po kuli. Yaali n tieni Babiloni kuli den diani li tigbabkaali nni. ⁶¹ Jeremi den yedi Serayia, "A ya gedi Babiloni, a ba la ya maama n diani li tili nni, ŋan kpaandi, ki cogi paama, ban gbadi. ⁶² lani ya pendi, ŋan yedi, 'O Diedo Fini aba n yedi ke a ba pua ki mudi ya diema ne, ke nisaalo bii yanga kan ya ye li diema nni, ke mi ba tua diegbendi ya yognu ń tuu ya yognu.' ⁶³ A ya cogi li tigbabkaali ki gbeni, ŋan loli li tigbabkaali yeni li tanli, ki lu Efrati kpenciamu siiga nni. ⁶⁴ ŋan yedi, 'Babiloni ń ba bodi cain maama n yeni. Babiloni ji kan guani ki fii, kelima min ba jiini opo ya fala yeni ya yebiadma yeni o ba baa ki ji kan fii ki sedi.'" Jeremi maama ń den juodi maama n yeni.