¹ O Diedo ń yedi Jeremi, o sawalpualo ya maama, ke mi nua Babiloni, Kalide yaaba diema po n ne, ² Togdi mani i nibuoli li laabaali, ki cedi ban cengi. Caani mani li tuudcabli, ki cedi ban cengi li maama. Da wuoni ba mani li maama. Yedi ba mani, 'Bi pua ki paadi Babiloni. Bi bulo Beli dini i fee. bi tudi ki luni bi buciamo, Merodaci, ke o bili yeni fee. Bi fiagi bi buli kuli. Ban tagi ya nannana yeni bi nui dini i fee; o bulo jie ki luodi. ³ Nibuolu ba ña nijienu po, ki fii, ki sedi bipo yeni bu tɔbu, ki cedi bi diema n tua diegbendi. niloba kuli ki buali yanga kan ya ye likani. Bi ba sani bikuli, ki yaadi. ⁴ Li dana yeni li yognu ya pundi, Israyeli yeni Juda diema yaaba ba taani ki yegi, ki ya buudi, ki lingi O Diedo, bi Tienu. ⁵ Bi ba buali ki bandi Siyɔn sanu, ki fii li cenli, ki teli lanpo, bi baa cuoni ki tua, Ti ba gedi tikuli ki taani yeni O Diedo, ki loli ya ŋantaado n ki pia juodima, kaa pia sundima mo." ⁶ N buolu den tie nani ya yankulu n bodi yeni. Bi yankpaaba n den gedi yeni ba a juana po, ki cedi ke bi bodi a juana nni; Bi den cedi ke bi waa a juana nni, ki yi ña juali, ki tuadi juali. Bi den gedi ki waa, ki ji sundi bi dunkaanu. ⁷ Yaaba n den ña, ki kadi yeni ba, den co ba ki ŋmani. Bi yibalinba den tua, 'Ne wani naa tie ti tagli ka, kelima bani n tieni ti tuonbiadi O Diedo nintuali, mi teginma daano, bi dandiegu ñiali; O Diedo n den tie bi yaajanba dandanli.' ⁸ Fii mani ki ña Babiloni yaaba siiga; ña mani Kalide diema yaaba siiga; Yin ya tie nani ya guabuana n yi liidi ki ña, ki ŋa ya ŋuabi n sieni yeni o, bimo ń yuandi ki ña yeni. ⁹ Kelima, Diidi mani, Mini O Diedo n ba cedi i nibuoli ń fii nijienu po, ki tuogi Babiloni bu tɔbu, ki kɔni, ki paadi ba, ki diedi bi diema. Bi ba taani, ki bobni bu tɔbu yeni Babiloni. Yeni i, ke bi ba kɔni ki paadi Babiloni, ki diedi ma. Bi piemi tie nani ya jakɔndo nubili mani yeni, u kan gedi ki gani fanma. ¹⁰ Bi ba fagi Kalide diema yaaba. Yaaba n ba fie li tiafagikaadi pali ba mangi; O Diedo ñɔbonli n yeni. ¹¹ Mangi mani i pala, Tieni mani mi jaancianma, yinba yaaba n den fie n faali, ke li tua tiafagikaadi yeni; Yugi mani ki cii nani ya naasali ya gbanu n saagi yeni; Duni mani nani ya taami n pia u gbanmanu yeni. ¹² I naá n ji ye yeni i feeciami yeni; ti yanyagdi ba kua i naá yua n mali yi. Diidi, wani n ba tua i nibuoli nni yua n juodi, ki waa ki cie, mi fanpienma, ki tinkuonga diema, fanfanpiengu. ¹³ Lankuli, kelima O Diedo pabiencianli po, Babiloni ba tua diegbendi, dogmudingu cain. Yua n pendi likani kuli, ki lidga ba cuo o, yeni Babiloni ń ji gundi maama, o gbanu ń wudi yeni ya falabiado ne. ¹⁴ Taani mani, ki bobni bu tɔbu, ki tuogi Babiloni. Yua n li kpali o dabanli kuli, li buali ke wan tɔa ki cuo o i. Da guani mani yeni bá penyendu, ke wuu tɔni, li baa tie O Diedo po tudma i. ¹⁵ Taani mani, ki cebni ki lindi o, ki yigni mani ki wuudi o! Bi cebni, ki lindi o ke o tuo o tadingu; O tanpuuna yeni o bilinguona kuli wudi ki baa, kelima O Diedo pantuuli po. Tuu o mani li panli! Tieni o mani nani wan den tieni yi maama yeni! ¹⁶ Cuo mani, ki ñani Babiloni nni yaaba n buu ti kpaandi nni yeni yaaba kubi ku jietaagu tiadi, ku jietaagu po kuli. Cedi mani bu tɔbu biadma po, yukuli ń pegdi ki nɔnli o buolu; yukuli ń sani, ki lebdi o diema nni. ¹⁷ Israyeli tie ya pia n kpadi, ke i yngbanli ŋua ki deli o i. Cincinli, Asiiri bado n den cuo o, ki ŋmani; Lani ń pendi, Babiloni bado, Nabukanesaari n den mudi o kpaba. ¹⁸ Lanya po i, ke O Diedo, U Paaciamu kuli daano, Israyeli Tienu yedi ya maama ne: Diidi N ba jia ti buudi yeni Babiloni bado, ki cuo o, wani yeni o diema kuli, nani min min waani Asiiri bado ya fala yeni. ¹⁹ N ba cedi Israyeli ń guani o diema nni; N ba bili ba u yankpaakaanu Kaarimeli yeni Bacana po. N ba cedi ban di ki guo Efrayima yeni Galaadi juana inni. ²⁰ Li dana yeni li yognu ya pundi, bi ba lingi i tagli Israyeli nni, bi kan la libakuli. N ba kpaagi Juda tuonbiadi po, ama, n kan la libakuli, kelima, yaaba n sieni ya po, N ba di bipo sugli." ²¹ Fii mani ki bobni bu tɔbu, ki tuogi Maratayima yaaba, bani yeni yaaba n kua Pekodi diema nni. Bolini ba mani, ki cuo yaaba n sieni npo; O Diedo n yedi yeni; Yin tieni min puogi yi ke yin tieni yaali kuli. ²² Ti gbia bu tɔbu fuugu, yeni li pabɔnli yigni mi diema nni. ²³ Li tieni ledi i, ke Babiloni yua den tie ki tinga nni kudidondoli mudi yomiyomi, Li tieni ledi i, ke Babiloni pua u nufanu, i nibuoli nni kuli. ²⁴ Babiloni, N den dia diagu i, ki bili ŋa, ke a baa ku niinni, ki naa bani! Bi baa ŋ ki diedi a, kelima a den fii ki sedi O Diedo po yeni mi yenyiema. ²⁵ O Diedo luodi o tɔtiadi diegu, ki ñani o jatiadi, ke ban tuu o pabienli panli. Li tuonli fii O Diedo, u paaciamu kuli daano po Kalide yaaba diema nni. ²⁶ ña mani hali fagma ki cua ki tuogi o yeni bu tɔbu. Pua ki luodi mani o bunbuana, ki dogni dogni o bondikaali. Ki yuandi ki juu yaali n sieni. Yin da ŋa bá pu opo. ²⁷ Pua mani ki kpa kpa bi naatona. Gedi yeni ba u yankodikaanu. Sola bipo, kelima bi pantuuli daali n pundi. ²⁸ Ti gbia yaaba n tiini taaŋmaadi yeni bi yigni, yaaba n sani ki ciadi Babiloni diema nni. Lani n wangi O Diedo, ti Tienu pantuuli, ban tieni Siyɔn yaali po, yeni o gbandieli po." ²⁹ Yini mani a dabantuada ń cua ki kɔni yeni Babiloni; yaaba n kpali bi dabana kuli, ki bani li tɔma ń cua. Cebi mani ki lindi ba, ki da ŋa bá yendo ń sani ki ciadi. Tuu o mani li panli nani wan den tieni yi maama yeni. Bigni mani ki tieni o nani wan den tieni yi ke li dagdi maama yeni. Kelima, o den fali O Diedo, yua n gagdi ki ŋani po. ³⁰ Lanya po i, ke o nipaangu ba baa ki kpe bi daamu nni, landaali i, ke o jakɔnda kuli ba bodi; O Diedo ñɔbonli n yeni." ³¹ Diidi, N pali beni ipo, yinba bi japaadanba ne; ne tie O Diedo, u paaciamu kuli daano ñɔbonli i. Kelima i daali n pundi, yinba bi japaadanba, Min ba jia ti buudi ki cuo yi ya daali. ³² Lanwani ii, bi japaadanba ba tuudi ki baa. Bi kan la yua n ba todi ba ban fii mo. N ba juu bi dociami u mu; li mu ba di bonli kuli li dogi nni. ³³ O Diedo, ki pia gbenma Tienu yedi ya maama ne: Bi taani ki kuani Israyeli buolu li mabli nni, ki taani yeni Juda kuli. Ban gedi yeni yaaba ti yonbidi yeni, bi kubi ba yeni u paaciamu, ki yie ke bi kan ŋa ba ban guani ki kuni bi diema nni. ³⁴ Yua faabi ba tie yua n pia u fidu boncianla. O yeli n tie O Diedo, ki pia gbenma Tienu. Laa pia tama ke o ba kɔni ki faabi ba, ama, ki fidi mi diema ń ya ye mi yanduanma nni, li buali ke wan waani Babiloni yaaba falabiado i. ³⁵ Bu tɔbu ba baa Kalide yaaba po; O Diedo ñɔbonli n yeni yeni Babiloni yaaba po, bi yudanba po yeni bi yanfodanba po. ³⁶ Bu tɔbu kpendi bi japaadanba po, ki ba cedi ban tua gaada. Bu tɔbu kpendi bi jakɔndimɔnba po, ki ba kuani ba ti jawaanciandi. ³⁷ Bu tɔbu kpendi bi taami, bi tɔturdi yeni bi dogtieba yaaba n kua Babiloni diema siiga kuli, Bikuli ba tua nani puoba yeni i. Bu tɔbu fii ki sedi bi ŋalmani po, ki ba cedi ban fagi ba likuli. ³⁸ U kuomu ba sedi bi ñima po, man fuadi cain. Kelima bi kua ya diema nni ke bi ŋua ki pugi ya buli n ki pia mayuli, li buli n lebdi bi yula. ³⁹ Lanwani ii, mi fanpienma nni yandi yeni i fuasangbanli n baa ye lanya diema nni, bani yeni a tɔgtɔgnuanbila. Kelima, li baa waagi, ke nisaalo dá ki kua lankani. Nifiima ń fii nifiima, nisaalo kan kua li diema nni. ⁴⁰ Nani U Tienu ń den pua ki paagi Sodoma yeni Gomɔri yeni ya dogi n lindi ba maama yeni; O Diedo ñɔbonli n yeni. Niloba kuli kan kua likani; nisaalo kan kali lanya diema nni." ⁴¹ Diidi, nibuolu ñani nijienu po, ki kpendi, nibuociamu yeni ya badcianba n pia u paalu, ki fii hali i tinbiani diema po. ⁴² Bi ba taa a dabana yeni a kpaana. Bi pia u fidu boncianla, kaa jie nilo niñima. Bi fuugu tie nani a mi ñincianma ñingola yeni i. Bi jagi i taami, ki taani ki sagni nani niyendo yeni, ki ba pua bu tɔbu, ki tuogi Babiloni yaaba. ⁴³ Babiloni bado ga li laabaali, ke o jigi cie, Ti yanyagdi kubi o nani ya puo n gbaa ki bua mali yeni. ⁴⁴ Nani o yangbanlo yeni, a ñingola fii Jurden kpenciamu nni ki gbie, ki yadi, ki kua ku muagu nni yeni, Kelima N ba cedi Babiloni yaaba ń sani ki ña yeni i, bi diema nni, Min kaani min gandi yua, wan diedi mi diema. Kelima, ŋma naani yeni nni, ŋma ba fidi ki jalgi nni? O laa gobdikaa n ba fidi ki niagi yeni nni? ⁴⁵ Lanwani ii, diidi O Diedo ń taa ya yanjaga, ki ba kɔni yeni Babiloni yaaba, wan kali ki jagi maama, ki ba pua bu tɔbu yeni Kalide yaaba diema. Bi ba dadi ba ki ñani ba nani a yanbila yeni i. Bi yankpaakaanu ba pua nufanu. ⁴⁶ Laabaali ba ña, ke bi diedi Babiloni, ki tinga ń digibi. I nibuoli kuli ba gbadi bi bubuuli yeni bi fanfabni."