¹ Ammoni yaaba po, O Diedo yedi ya maama ne, "Israyeli ki pia bila yo oo? Niloba ji ki ye ki ba di Israyeli faaliba kuli ii? Beya po i, ke Ammoni bado, Milkomi diedi Gaadi diema, ke o niba kua i dociami nni ii? ² To, diidi mani, O Diedo yedi mine: a dana kpendi, ke n ba cedi bu tɔbu bubuuli ń loli Rabba dogu nni, Ammoni diema yaaba siiga, ba kpandi, ki tua diegbengu, ban juu u tinkundogi. Kelima, li buali ke Israyeli ń diedi yaaba n den diedi ba," O Diedo n yedi yeni. ³ Hecebɔ yaaba, buudi mani ki fabni, kelima, bi ba pua ki mudi Ayi dociamu! Yigni mani, ki buudi, Yinba Rabba puoba! yie mani li pabɔnli tiayiekaadi. Buudi mani, ki fabni, ki ya waa ki buudi a bilinguona nni, kelima i bado Milkomi ba gedi ti yonbidi, bi ba gedi yeni o, ki taani yeni o koopadcianba yeni o yudanba kuli. ⁴ Be yapo i ke a den kpiagdi a yuli a tialu yeni a gbanmanu po, ki tua, 'N dugi n fidu yeni n ŋalmano po, ŋma ba cua ki kuani nni ti yanyagdi ii?' To mɔla, a fidu yeni a ŋalmani kuli gbeni. ⁵ Diidi, N ba jiini ti jawaanciandi apo; O Diedo, u paaciamu kuli daano ñɔbonli n yeni. Li falaciamo ba ña yaaba n kaagi ki lindi a yeni kani i. Bi ba pua ki deli yi, yukuli ń teli o nintuali, ki kan gbagi ki diidi yaali n ŋua o, obakuli kan fidi ki seni yaaba n tiini mɔko. ⁶ Ama, lani ya pendi, N ba cedi Ammoni yonbi kuli ń guani bi diema nni; O Diedo ñɔbonli n yeni." ⁷ O Diedo, u paaciamu kuli daano ń yedi Edomi diema nni yaaba ya maama n ne, "Hali yeni mɔla kuli, Temani yaaba dá ki baa yanfuoma aa? Yin ga ya ceglŋami yeni bodi i yula nni yo oo? Bi yanfuoma yeni ji kua mi tofaama sanu nni yo oo? ⁸ Sani mani, yinba Dedani yaaba! Sani ki lebdi mani! Kua mani ki wuoni ti buodi nni. Kelima, N ba jiini falabiado Esayu po, o buudi jiama pundi yognu. ⁹ Yaaba n ba cua ki taa ku daamɔngu tiidi luana, i tama ke bi ba ŋa bá luanyenli ipo yo oo? A suura ya cua ku ñiagu nni, bi kan doli ban bua yaali kuli ka aa? ¹⁰ Ama, mini O Diedo n ba yiedi ki ŋa Esayu mubili. N ba dɔgdi ki waani o wuonkaani kuli yeni o ŋalmani kuli. Lanwani ii, o kan ya ji pia wuonkaanu ke nilo ki bani. Bi ba bolini o bila, o ninjaba yeni o yegni kuli, obakuli kan ya ji ye. ¹¹ Mini O Diedo n ba wubi o kpienbila, ki cedi o kpepuona mo ń dugi npo, ki ya ye." ¹² Kelima, O Diedo yedi ya maama ne, "Diidi, bá yaaba n ki dagdi yeni ban ga fala, ba ñu li bonñukaali nni. Fini aba bani ke a kan ciadi li buudi jiama daali. A kan fidi ki ciadi, kelima amo ba ñu li bonñukaali nni. ¹³ Kelima, N oli ki yedi, ke Bosira ba tua ti jawaanciandi bonli yeni dogmudingu, i fee yeni ti solindi bonli, mi diema dociami kuli ba tua diegbendi, hali ya yognu ń tuu ya yognu kuli. ¹⁴ U tondu ñani O Diedo kani, yeni laabaali, bi sɔni o tondo, i nibuoli kani, ke wan yedi ba mine, 'Taani mani ki tuogi o yeni bu tɔbu. Ikuli ń bobni bu tɔbu po.' ¹⁵ Kelima, diidi, N cedi ke a waa, ki cie, i nibuoli siiga. Bi niba fali a boncianla. ¹⁶ Ama, fini o kafaadaano ne, a cedi ke a japaaciandi kuani a i tagli nni, fini yua n kua mu juabimu nni yeni ti tanlondi nni, Fini yua kua naani n kpedi, nani ku kapaciigu ń yi tedi ku tiagu naani n kpedi boncianla yeni. N ba tudi ki lu ŋa lanya yidgu nni i; O Diedo ñɔbonli n yeni. ¹⁷ Edomi ba kpandi ki tua diegbena i. Yaaba n pendi, ki sedi lankani, li ba kuani ba ti jawaanciandi, ki ŋɔni bi gbanu, ban jie, kelima ya falabiado ke bi la po. ¹⁸ Nani Sodoma yeni Gomɔri, yeni ya dogi n sieni ń ba ya yanyagciandi yeni," O Diedo ñɔbonli n yeni. "Obakuli kan ya ye likani; niloba kuli kan kua lanya diema nni. ¹⁹ Diidi, O ba sani bugiba, nani o yangbanlo ń yi sani Jurden fuali nni, ki gedi ku yankpaamuagu nni yeni. Kelima n ba cedi Edomi ń sani ki ña likani, min gandi tiano ki kaani likani wan diedi li kaanu. Kelima, ŋma n naani yeni nni, ki ba jia nni ti buudi? O laa gobdika n ba fidi ki niagi yeni nni ii?" ²⁰ "To cengi O Diedo ń taa ya yanjaga, ki ba jia Edomi ti buudi, wan bobni ya yanjaga, ki ba cuo Temani yaaba, bi biadma po. Laa pi tama, bi ba deli ki yaani ba, bani yeni a yanbila kuli. Bi ba pua bi yankpaakaanu i u nifanu, ki cedi ban yaadi likani. ²¹ Bi tingbali cedi ke ki tinga migi. Bi cengi bi yigni bi bubuuli yeni bi fanfabni hali i kpegagi ñincianma kani. ²² Diidi, yua n ba ludi ki baa ba ba yugi nani ku kaapaaciigu yeni i, ki tandi ku fiabi Bosira po. Li daali, Edomi jakɔnda pala baa pua nani ya pua n gbaa ki bua mali yeni i." ²³ Ya sawali n ye Damasi po: "Hamati yeni Aripadi ba di i fee, kelima, bi gbadi falabiado laabaali. Bi yama ŋmadi, ki lengidi nani mi ñincianma ñingola yeni. ²⁴ Damasi ji tadi boncianla. Ti jawaanciandi cuo ba, ke bi lebdi ki sani. Li pabɔnli yeni ti yanyagdi cuo o, nani ya tugpunbo n gbaa ki bua mali yanyagdi yeni. ²⁵ Li tieni ledi i, ke bi lɔgdi ki ŋa Damasi, ti kpiagdi dociamu, N pamanli dogu uu? ²⁶ Yeni lankuli, bi ba pua ki kpa o nipaaba o sanjala po, landaali i, ke o jakɔnda kuli ba kpe; ne tie O Diedo, u paaciamu kuli daano ñɔbonli n yeni." ²⁷ "Kelima N ba juu Damasi bilinguona, u mu ń di o bado, Beni Hadadi ŋalmani yeni o kaanjigi kuli." ²⁸ O Diedo ń yedi ya maama, Hasɔri diema yeni Babiloni bado, Nabukanesaari ń pua ki paadi ya diema po n ne: "Fii mani, ki gedi ki tuogi Kedari diema yeni bu tɔbu, ki biani bani puoli niba yeni kuli. ²⁹ Fie mani bi jondi yeni bi yankuli kuli, ki taani yeni bi kpaljɔnkaadi yeni bi jondi tiabobinkaadi kuli; yin fie lankuli Yin pua ki deli bi yuoyuodi, ban yaadi, cedi mani ban tiani ki yedi ba, "I jeje ye i kaani kuli, ki cebni ki lindi yi!" ³⁰ Yinba Hasɔri diema yaaba, sani mani, sani mani ki fagdi, ki gbiidi ti buodi, ki wuoni lieni nni; O Diedo ñɔbonli n yeni; Kelima, Babiloni bado Nabukanesaari ń jagi ya yanjagli ki ba fii ki sedi ipo bia boncianla . Sani mani! Sani mani ki lebdi! ³¹ Fii mani! Tuogi mani ya diema n ye mi yanduanma nni, kaa pia yanyagdiba kuli," O Diedo n yedi yeni. "Bi naa pia bulñɔcianbu, ki buali bilinguonli, bi dogtieba mo ye, yuakuli wan bani maama i. ³² Bi yuoyuodi n ba tua yin ba fie bi kani ya tiafagikaadi, bi ŋalmanceli yeni bi bonpiakaali mo, ba tua bu tɔbu tiafagikaadi. Lani ya pendi, N ba yuandi ki yayadi bani yaaba n yi kogdi bi langbiadi yeni, ki jiini falabiado bikuli po i kaani kuli; O Diedo n yedi lanya maama. ³³ Hasɔri ba kpandi ki tua i fuasangbanli yeni li pabɔnli kaanu ya yognu ń tuu ya yognu kuli. Niloba kuli kan kua likani, nisaalmiali kan kua lankani." ³⁴ O Diedo ń yedi o sawalpualo Jeremi ya maama, Elami diema po n ne. Li den tie Juda bado, Sedesiasi bali ń cindi ya yognu i, O den yedi, ³⁵ "O Diedo, u paaciamu kuli daano yedi ya maama ne: Diidi, N ba kɔnli Elami dabanli, yaali n tie o paalu yeni o fidu kuli. ³⁶ Kelima, N ba cedi u taafaalu ń ña ki tinga kaannaada kuli, ki cua ki tuogi, N ba cedi li taafaanaada ń pua ki yayadi Elami yaaba. Li kan ya pia ya nibuolu nni ke Elami yaaba, yaaba n yayadi ne kan gedi. ³⁷ N ba ñuni Elami yaaba falabiado, bi yibalinba yeni yaaba n lingi ke ban biani bi miana nintuali. Kelima, N pabiencianli nni, N ba jiini falaciamo bipo; O Diedo ñɔbonli n yeni N ba cedi bu tɔbu ń ŋɔdi ba, ki ban bolini ba cain. ³⁸ Lani ya pendi, N ba kaani N balkalkaanu Elami diema nni, ki jiini bi bado yeni bi yudanba kuli bi badigbandi po, ki bolini ba; O Diedo ñɔbonli n yeni. ³⁹ Ama li yognu ya pundi, N ba cedi Elami diema yonbi kuli ń guani ki kali bi diema nni; O Diedo ñɔbonli n yeni."