¹ Mowabi diema yaaba po, O Diedo ń yedi ya maama n ne, "Sola, Nabo yaaba po, kelima bi pua ki mudi li dogu. Bi pua ki paadi Kiriyatayima yaaba, ki dini ba i fee. Bi pua ki guli bi dociamu bilinguona, ki dini ba i fee. ² Mowabi diema ji ki pia kpiagdiba kuli. Bi yibalinba, Heceboni yaaba n fii ki sedi bipo, ki ñuni ba falaciamo. Bi den yedi, 'Cua mani na, tin bolini li diema, ki ñani ba i nibuoli siiga. Fini Madimeni, amoko bia n yeni, ki jugsiega ba kua n niinni.' ³ Cengi mani, li bubuuli n fii ki loli Horonayima po, ki kpendi na yeni, bi pua ki mudi bonli kuli ki bua bolini u. ⁴ Mowabi bodi cain n yeni, nufanu. Cengi mani o bila ń buudi maama. ⁵ Bi ban do Luhiti juali po, ki buudi, kelima, a ya ñani Horonayima, ki jii, a ba gbadi bi bubuuli, kelima ban bolina ba yeni po. ⁶ Yua n tadi wan bia! Sani mani ki fie i miana, ki gedi mi fanpienma nni, ki ban ya tie lipo nani i fuaŋunbi yeni. ⁷ Kelima ŋan dugi maasuagu po, yeni a ŋalmani po yeni i, ke bi ba pua ki paadi a, ki diedi amoka. Bi ba gedi yeni o bulo Kimoko ti yonbidi, ki taani yeni o koopadcianba yeni li yudanba kuli. ⁸ Kelima, o dogmudo ba kua i dociami nni kuli; doguba kuli kan ciadi. Lanwani ii, a juana nni yaaba ba bodi ii, u tialu nni yaaba mo ba bodi, nani O Diedo ń yedi maama yeni. ⁹ Puni mani Mowabi diema i fiabi, kelima, li ba fidi wan yugi ki ciadi. O dociami ba tua diegbendi, nilo ń ki kua naani. ¹⁰ Sola, Yua n tuuni O Diedo tuona yeni bu kpaljɔbu! Sola yua n ŋuuni o jugsiega ki tuagu nni, kaa bua wan wuli sɔma! ¹¹ Mowabi panma nni, O den ye mi yanduanma nni, o naa bani yonbidi, bonliba kuli ki mabini o; nani o daamɔngu yeni bi naa taa ma ki lebdi ki piagi tiatɔgu nni, ki ba lebdi mi mani bii mi nuulu, mi li tie yenma i. ¹² Ama, diidi, a dana kpendi, O Diedo n yedi yeni; N ba sɔni yaaba n ba kuodi ki lebdi mi daama, man ye ya tiadi nni, ki muudi li cuana yeni li boba kuli. ¹³ Lanwani ii, Mowabi diema ba di i fee, ki taani yeni bi bulo Kemoci kuli, nani Israyeli yeni Beteli, naani n den tie bi dudugdi kuli ñiali ń den taani ki dini i fee maama yeni. ¹⁴ I go ba ga ledi i, ki yedi, 'Ti tie ya tɔtieba n pia mi tuama, ki pua bu tɔbu bonŋanla aa'? ¹⁵ Bi ba pua ki mudi Mowabi diema yeni o dociami kuli. Kelima, bi caa yeni mi diema nipaanba, yaaba n tie jakɔnda, ki baan kodi ba. O Badciamo, O Diedo, u paaciamu kuli daano ñɔmaama n yeni. ¹⁶ Mowabi bolinma ji mii i; mi yebiadma n tiini totoni, ki kpendi yeni. ¹⁷ Yinba yaaba n kua ki lindi Mowabi diema, ki bani ma bonŋanla yeni, gedi mani ki ban fuondi ba i kuufuondi; yinba yaaba n den bani mi kpiagdi po, buali mani ba lan tieni maama, ke bi fidu yeni bi jigi kuli cie.' ¹⁸ Yinba Diboni yaaba, fii mani i balikankaani po, ki jiidi ki kali tinga nni, mi tama po, yeni u ñuñuunu. Kelima, yua n fii ki sedi ki ba bolini Mowabi yeni ba tuogi yimo yeni bu tɔbu. O ba bolini i kaanjigi kuli. ¹⁹ Yinba Aroweri yaaba, fii mani, yinba yeni i dogtieba, ki sedi a sanjala po, ki guudi. Buali mani yaaba n tiini yeni yaaba n sani ki ciadi, ban waani yi yaali ya po, ke bi tiini. Buali ba mani, 'Be n tieni ii?' ²⁰ Mowabi dini i fee, ki se ki digibi. Buudi mani, ki fabni; kuudi mani, ki mia mi todma. Waani mani yaaba n kua Arinoni kpenjaali po, ke bi pua ki mudi Mowabi diema, ki kuani ma u nufanu nni. ²¹ U yogu pundi, ke ban jia u tialu diema yaaba yeni ya dogi ne, ti buudi, Holoni yaaba, Jacisa yeni Mefati yaaba, ²² Diboni, Nebo, yeni Beti Diblatayimi yaaba, ²³ Kiriyatayimi, Beti Gamuli yeni Beti Mewoni yaaba, ²⁴ Keriyoti, yeni Bosira yaaba, yeni Mowabi diema nni dociami kuli. Ya dogi n fagi yeni ya dogi n kɔbi kuli. ²⁵ Mowabi paalu yeni u fidu kuli gbeni, bi pua ki kɔnli o nuu o; O Diedo ñɔbonli n yeni. ²⁶ Cedi mani wan ñu ki guo, ki gaadi, kelima o fii ki sedi, ki fanbi O Diedo. O Diedo yedi, Cedi mani Mowabi ń duani ki bindi, ki ya falgidi o siindi nni, ki tua i fee yeni li ñuali bonli. ²⁷ Kelima, fini Mowabi, ya tiani ke a den cedi ke Israyeli tua i fee yeni ti laadi bonli. Baa den nua ma nani li conconli yeni ka aa? Lani ka den cedi ke a maadi mi maama, yeni ti japadi, ki ñɔgni ti buacabdi ii? ²⁸ Yinba Mowabi yaaba, sani mani ki ña i dogi nni, ki ban wuoni a juana nni. Yin ya tie nani ya kpaajiega n tedi ki tiagu li juali po, ki kuli ku yidigu yeni. ²⁹ Ti gbia ke bi maadi Mowabi japaaciandi po, o kafaama po, wan duoni o yuli ki ban sedi naani, wan wangi o kpiagdi maama yeni o pali ń paa o yuli po maama. ³⁰ O Diedo ñɔbonli n ne, Mini mɔno bani o pabienmaama po, ama o pabienli yeni o tuada kuli ki pia mayuli. ³¹ Lanwani ii, N kuudi Mowabi diema po, N mɔa Mowabi po mi niñima, ki miadi Mohabi kuli po mi todma. N buudi ki fabni Kiri Heresi yaaba po. ³² N ba buudi, ki fabni apo, ki cie min buudi maama Jaseri yaaba po yeni Sibima daamɔngu tiidi po! A bena den tandi ki ban pundi mi ñincianyaama po, hali ki ban gedi Jaseri po. O dogmudo cua ki pua ki paadi yi, ki baa i kpaandi bonluana yeni i daamɔngu kuli. ³³ Mi yemanma yeni li pamankandkaali gbeni i kuani nni yeni Mowabi diema nni kuli. N cedi ke mi daama gbeni a daaboba nni. ya niba n ba tuoni a luana, ki ñani mi daama yeni i pamandankuudi mo ji ki ye i dogi nni. ³⁴ Bi cengi Hecebɔn yigni yeni u bubuuli hali Eleyale, bi gbia bi fuugu hali Jasasi, i yigni ña Sowari yeni Horonayimi, yeni Eglati Celiciya kuli, kelima bá Nimirimi kpenu ñima mɔno fuadi cain. ³⁵ Kelima, N bua bolini Mowabi yaaba siiga, yaaba n padi i buli a juaciama po, ki juugi li ŋubli yeni tulaale, ki gbaandi ki pugi i buli yeni; O Diedo ñɔbonli n yeni. ³⁶ N fabni, ki juogi Mowabi yaaba nani yelga ń piebu ki mɔa maama yeni. N fabni yeni n pali kuli, ki juogi Kiri Heresi yaaba. kelima ban ban baa ya ñuadi yeni ya ŋalmani kuli bia fanma. ³⁷ Kelima, bi kuo bikuli, ki ŋa yumilma, ki kuo bi langbiadi. Bi pali bi nui po a tanpala, ki yie li pabɔnli tialakaadi. ³⁸ Mowabi diedi nni kuli, yeni bi daamu nni kuli bi ye yeni kuumuanli baba i. Kelima n pua ki mudi Mowabi nani ban yi mudi ban ji ki bua ya bobli maama yeni i; O Diedo ñɔbonli n yeni ³⁹ Diidi mani u gbanu ń ŋɔni, ke u jegibi maama! Mowabi buli o nunga, ki tiibi yeni i fee! Lanwani ii, Mowabi ji tua ti laadi yeni ti jawaanciandi bonli yaaba kaagi ki lindi ba po." ⁴⁰ O Diedo yedi ya maama ne, "Diidi, Yibali ba yugi, ki cua nani ku kapaciigu yeni i, ki tandi ku fiabi Mowabi diema po. ⁴¹ Bi pua ki paadi Keriyoti o, ki diedi u kaanjigi kuli. Kelima, lanya daali, Mowabi jakɔda pala baa pua nani ya tugpunba n gbaa ki bua mali yeni i. ⁴² Lanwani ii, Mowabi diema ba bodi, u yeli ń piini, kelima mi waani O Diedo nintuali ke mi kpiagdi cie U Tienu. ⁴³ Ti jawaanciandi, ku buociangu yeni ti diadi kpendi yinba Mowabi diema yaaba po; O Diedo ñɔbonli n yeni. ⁴⁴ Yua n sani ti jawaanciandi po baan baa ku buociangu nni i, Yua n fidi ki doni ki ñani ku buociangu nni mo, ba baa ku diagu nni i, kelima Mini n ba dia ba li diagu. U gognu pundi ke min tuu Mowabi yaaba li panli; O Diedo ñɔbonli n yeni. ⁴⁵ Yua n sani ki ciadi, bi nan ba seni ba Hecebɔn dogu nni, li bɔnbɔnbiigli nni, ke baa ji pia paaluba kuli, u mu ba ña Hecebɔn, u mupienu ń ña Siyɔn badidiegu. U ba di Mowabi yutunli yeni Mowabi tugmɔndanba yukuodi. ⁴⁶ Sola yinba Mowabi yaaba po! Bi pua ki mudi Kemici, o buciamo o, falaciamo, yaaba n gbaandi ki pugi o po. Bi gedi yeni a bijaba ti yonbidi, ki cuo a bisiaba ki luoni a kpaadidiena nni. ⁴⁷ Ama, Min ba guani ki ŋanbi Mowabi ya dana kpendi. Mi ŋalmani kuli ba guani; O Diedo ñɔbonli n yeni." Ban jia Mowabi diema buudi maama n yeni.