¹ O Diedo ń maadi yeni Jeremi, ki yedi o ya maama, ke mi nua Filisiti yaaba n ne. O den yedi o li maama, ki sua ke Faarahɔn da ki tuogi Gasa yaaba yeni bu tɔbu. ² O Diedo den yedi ya maama ne: Diidi mani, mi ñima ñani nijienu po, ki puubi ki. Li ñingola puubi, ki bua yili i kpeni, ki daa! milni mi diema yeni yaali n ye mi niinni kuli, i dociami, yeni i niba kuli! Lanwani ii, yuakuli ba yigni ki mia mi todma, yua n ba nanli o, mi diema nni yaaba kuli ba buudi, ki fabni. ³ Bi ba gbadi bi taami taawoga moni, ki gbadi bi tɔturdi n duni maama, yeni li turtaana ń mɔa maama, Bibaanba kan fidi ki nanli bi bila, kelima bi tadungu po. ⁴ Kelima, li daali kpendi, ke bi ba pua ki mudi Filisti diema, ki jia, ki paadi ma yeni Tiiri yeni Sidoni dogi yeni ya todkaaba n sani ki ciadi, ki bi bua nanli ba kuli. Kelima O Diedo bua bolini Filisiti diema, yeni yaaba n sieni, ki ye Kafitɔri kpendegli po kuli. ⁵ Gasa yaaba ba kuo bi yula, kelima li pabɔnli po, sagmu ji kan sagi Acikeloni dogu nni, yinba yaaba n sieni, ki ye ti juaciandi po yeni, i ba mubni iñɔna. Hali yeni u laa yognu i, ke i baa badi i gbani po a tanpala, a kuumuana po oo? ⁶ Sola, O Diedo jugsiega! Hali yeni u laa yognu i, ke ki ba sedi suo oo? Guani ki ŋuuni a jugtuagu nni! Sedi ki fuodi. ⁷ Li jugsiega nan ba tieni ledi i ki fuodi ii, kelima, O Diedo ka sɔni ga aa? O puogi a ke ŋan pua bu tɔbu yeni Acikeloni yaaba yeni yaaba n ye mi ñincianma kpenjaali po kuli."