¹ O Diedo ń maadi o sawalpualo Jeremi, ya maama ke mi nua ŋanduna kuli diema. Bi pua ki paadi Ejipti yaaba, Kalikemisi diema nni. ² Ya maama n nua Ejipti diema: "Li maama nua Ejipti bado, Faarahɔn Neko, yua n den ye Karikemici, ki balini Efrati kpenciamu ya tɔgola i. Li tie Babiloni bado, Nabukanesaari ń den pua ki paadi ya tɔgoli, Juda bado, Josiasi bijua Jowakimi bali binnaali binli: ³ Bobni mani ti gbankɔnditi buolu buolu, ki sagni mani bu tɔbu po. ⁴ Bobni mani i taami, ki dɔli li taami, jagi mani, ki yili i kudsana; luani mani i kpaana, ki la i kudliada. ⁵ Be n tieni ii? N nua be n ne ee? Bi gbie yeni ti jawaanciandi, ki tiini i kaankuli, kelima bi pua ki paadi bi jakɔnda o. Bi tiini kaa gbagidi, i kaankuli, ki lingi ke ban ciadi. Ti jawaaciandi lindi ki cebni ba; O Diedo ñɔbonli n yeni. ⁶ Ya jakɔndo n yua bi siiga kan fidi ki sani, bi tɔtieba kan fidi ki sani ki ciadi. Bi tiini ki tuudi ki baali, nijienu po, Efrati kpenciamu po. ⁷ Be fii belbeli nani Nili kpenciamu yeni ii, ya kpenciamu ñima n tuadi lɔblɔlɔbi yeni ii? ⁸ Ejipti fii nani Nili kpenciamu yu ya ñinguona n do, ki gɔ ki ji yeni. Ejipti yedi, 'N ba do ki milni ki tinga. N ba pua ki mudi i dociami yeni ya niba n kua i niinni. ⁹ I taami, do mani, Fiini mani i pala, yinba ti taturdi. Bi tɔtieba ń ña mani, Kuci yeni Puti yaaba, yaaba n bani ti gbankɔnditi kubma, Ludimi yaaba, yaaba n bani li dabantɔli bonŋanla.' ¹⁰ Ya daali ne baa tie pantuuli daali i, O Diedo, u paaciamu kuli daano po, O ba tuu o yibalinba li panli. Ki jugsiega ba di ki guo. Ki jugsiega ba ñu bi sɔma ki guo. Kelima li baa tie padli i, O Diedo, u paaciamu kuli daano po, nijienu po, Efrati kpenciamu kani. ¹¹ Yinba Ejipti yaaba, sani mani ki gedi Galaadi po, ki ban di u ñɔgu, bi ñɔgdanba kani. Ama, li ñɔgu ki pia mayuliba kuli ipo. ¹² I nibuoli kuli gbadi i fee laabali. Ki tinga diema kuli gbadi i fanfabni po, kelima, bi tɔtieba tiini, ki gbebni bi lieba, bikuli ń taani ki baa. ¹³ O Diedo ń den maadi Jeremi ya maama, Babiloni bado, Nabukanesaari ń den tuogi Ejipti diema bu tɔbu ya yognu: ¹⁴ Kpaandi mani ki waani Ejipti nni, ki waani li laabaali, Mugdɔli, Menfisi yeni Tafanesi dogi nni. 'Bobni mani i yula ku guudi, kelima, ki jugsiega dini i kaalindma ki gbeni.' ¹⁵ Be n cedi ke i buciamo Apisi ŋmadi ki baa aa? Li buli kan fidi ki ya see, kelima, O Diedo n ñɔńñɔgi ba, ki tudi ki lunluni ba. ¹⁶ O Diedo cedi ke bi tɔtieba boncianla jadibi, ki ŋmadi ki baali biyaba po. Bi tua, 'Fii mani, tin guani ti diema nni. Tin guani ki kuni ti kpiiba po, ti diema nni. Cedi mani tin sani ki fagdi yeni ya tɔbu n wangi ti falaciamo ne' ¹⁷ Bi kpaandi, ki tua, 'Ejipti diema bado Faarahɔn tie ne: 'Lanmanbu fanfanma baba, ki nan kan fidi ki mindi bá pu.' ¹⁸ O Diedo, u paaciamu kuli daano yedi, N fo; nani Tabori juali ń kpedi a juana nni maama yeni, nani Karimeli juali, ń see mi ñincianma nni maama yeni, Yibalinba ba pundi Ejipti diema nni yeni i. ¹⁹ Ejipti yaaba, bali mani i gbangoli, ki gedi ti yonbidi. Kelima Menfisi ba tua dogmudingu, u ba tua diegbendi, nilo ń ki kua naani. ²⁰ Ejipti tie ya naasalo n ŋani hali boncianla, ama, ki naasiibiadiga ba ña nijienu po ki cua. ²¹ Bá Ejipti diema nni yaaba ń suu yaaba jakɔnda i ligi ke ban pua bu tɔbu yeni, lebdi ki sani i. Bi kan toli ki tuogi, kelima bi fala yeni mi yebidima n guu ba, ki ba dadi bi tuba. ²² Ejipti yaaba tiini ki ki yigni, ki mɔa nani i wee yeni, kelima bi yibalinba tuogi ba. Bi cua ki naa ba yeni a yala, nani a tiicuala yeni. ²³ Bi ba cua ki legdi li fuali, bayeni li fuali ń tie fuasieli; O Diedo ñɔbonli n yeni. Kelima bi yibalinba yabi nani ti naasuudi yeni i, bi kan fidi ki cɔdi ba. ²⁴ Ejipti u dogŋamu dini i fee n yeni. Bi ba taa u ki tieni nijienu po yaaba nui nni." ²⁵ O Diedo, o paaciamu kuli daano, Israyeli Tienu yedi, "Diidi mani, N fii ki sedi Tebi yaaba bulo, Amoni po, Faarahɔn po yeni Ejipti buli kuli po yeni yaaba n gbaandi ki pugi li buli kuli po. ²⁶ N ba taa bikuli ki tieni yaaba n lingi ke ban biani bi miana nui nni yeni Babiloni bado Nabukanesaari yeni o jakɔnda nui nni. Lani ya pendi, Ejipti diema ba guani ki tua nani man den tie maama yeni, O Diedo n yedi yeni. ²⁷ Ama yinba n naacenba, Jakɔbo buolu, yin da jie mani. I gbani ń da wudi, Israyeli puolŋuani, kelima, N ba faabi fini Jakɔbo buolu yeni u puolŋuani kuli, ki ñani yi, yin den yayadi, ki gedi naani n fagi, ti yonbidi po, ki guani yeni yi i diema nni yin baa ye naani, yeni mi yanduanma, li yanŋaali, naani ke obakuli kan kuani yi jawaandi. ²⁸ Fini, N naaciemo Jakɔbo, da jie; O Diedo ñɔbonli n yeni; kelima, N ye yeni a yognu kuli. Lanwani ii, N ba pua ki mudi min den yayadi yi ke i gedi ya diema nni kuli cain. Ama, N da ba tundi yi yo, N kan ŋa yi fanma, kaa dadi i tuba."