¹ Sedesiasi den pia bina piilie n binyenli i, ki dini li bali. O den kali ti badigbandi po piiga n binyenli Jerusalema dogu nni. O naá yeli den tie Hamutali; o den tie Libina dogu yua, Jeremi bisalo i. ² O den tieni yaali bia O Diedo nintuali; O den tieni nani Jowakimi ń den tieni maama yeni. ³ Yaali n den tieni Jerusalema yeni Juda dogi nni den bieni O Diedo pali hali boncianla, ke o nidi ki ñani bi maama nni, ki deli ki yaani ba. Lanwani ii, Sedesiasi den fiini mi yiema Babiloni bado po. ⁴ Sedesiasi bali binyiali yognu, ŋmaapiiga nni, o dana piiga daali, Babiloni bado, Nabukanesaari den cua yeni o togola kuli, ki ba tuogi Jerusalema. ⁵ Bi den lindi ki cebni u dogu, ki kali. ki ban tuoni hali o bado Sedesiasi piiga n binyenli binli. ⁶ Li binli ŋmaanaalo, o daayiali daali. mi koma den baa u dogu nni, jiema ji den ki ye ke mi diema nni niba ba di. ⁷ Bi den luodi li bontonli, ke laa fagi yeni o bado gɔgdigu, bilinguona lie siiga, ke bi tɔtieba la u ñakaanu, ki sani ki ñani ku ñiagu nni. Bá yeni Kalide jakɔnda ń den lindi ki cebni u dogu kuli, bi den sani ki taa Araba sanu. ⁸ Ama, Kalide jakɔnda den ŋɔdi ki deli o bado Sedesiasi, ki ban cuo o Jurden kpenjaali tialu nni, ke laa fagi yeni Jeriko. O tɔtieba den sani ki yadi ki ŋa o. ⁹ Bi den cuo o bado Sedesiasi, kigedi yeni o Babiloni bado kani, Ribila dogu nni, Hamati diema nni, lankani i, ke o den buni ki cuo o. ¹⁰ Babiloni bado den cedi ke bi kodi Sedesiasi bijaba o nintuali, Ribla dogu nni i, ke o den cedi ke bi kodi Juda cugli yudanba kuli. ¹¹ O den yuandi ki cedi ke bi muu ki pudi o bado Sedesiasi nuni, ki loli o yeni ti kumɔndi kudseseli, ki gedi yeni o Babiloni dogu nni. Babiloni bado den cedi ke bi luoni o li kpaadidieli nni, hali yeni o kuuma. ¹² Li binli ŋmaamuulo, o danpiiga daali, li den tie Babiloni bado, Nabukanesaari bali piiga n binjiali yognu i, Babiloni bado Nebusaradani den cua Jerusalema. Wani n den tie Babiloni bado guudkaaba yudaano, ki go tie o naaciemo. ¹³ O den cedi ke bi juu O Diedo diegu, ki juu badidiegu yeni Jerusalema diepaala kuli. O den cedi ke bi juu yaali n tie bonmɔnli, ki ye u dogu nni kuli. ¹⁴ Ama Jerusalema bilinguona wani ii, ya tɔtieba n den ye yeni Babiloni bado guudikaaba yudaano n den pua ku mumudi li bilinguona. ¹⁵ Yaaba n den tie luoda, ki sieni u dogu nni, yeni yaaba n den sani ki ŋɔdi Babiloni bado yeni mi diema tuonsɔnba yeni bi tuonsɔnbanda, Babiloni bado guudkaaba yudaano, Nebusaradani den cuo bi siiga nni boncianla, ki gedi yeni ba ti yonbidi, Babiloni po. ¹⁶ Ama, Nebusaradani den ŋa ke yaaba n tie luodmɔnba yeni yaaba n baa tuuni i kuani yeni ku daamɔngu tiidi kuani nni, ke bi ye mi diema nni. ¹⁷ Kalide jakɔnda den pua ki mudi ya kumɔndi daacaada yeni li daapanda, ti ñinnidtiadi tuankaanu, yeni ti kumɔndi tadciandi yeni yaali n den ye O Diedo diegu nni ki tie kudmɔndi kuli, ki doli li kudmɔndi kuli ki gedi yeni ti Babiloni po. ¹⁸ Bi go den taa mi fantanpienma juuma tiadi; pelinba, mu jugmu, mu tañukaamu yeni yaali salga yidkaaba tiadi, ki tie kumɔndi kuli, Kalide yaaba den taa lankuli, ki gedi yeni li Babiloni. ¹⁹ Ti tadciandi, ban juugi ya fanu nni mi fantama, a tadkuana, a kudboba, i fidtuankaani, ti nandi boncɔgkaali yeni wula tadciangu, yeni ŋanjilfa tiadi kuli, Babiloni bado guudkaaba yudaano den doli lankuli, ki gedi yeni li Babiloni po. ²⁰ O badiciamo Salomɔn ń den kuani ya kumɔndi O Diedo diegu maama nni den yabi, a bunbunlieda, ku tadciangu yeni piiga n naatonlieda, ti kumɔndi den yabdi, ke nilo den kan fidi ki begi lanya tiadi. ²¹ A bunbuna fagmu den tie piiga n nuukpanduna niin, ke ya baabi n den cebni ki lindi den tie piiga n nuukpaduna lie. Li den tie bonlongu, ke li kudi piamu tie nuubila na. ²² Bunbunli po kuli den pia bontuankaali, ke li kpedma pundi nuukpanduna mu, bi den lugi ti kumɔndi, ki tabni a bunbuna yeni, ki kagni ki lindi, ki jɔnjɔni Geenadi tibu bonluana, ke a tie kumɔndi li bunbunlieda kuli po. ²³ Lanwani ii, grenadi luana den tie piiyia n bona luoba polu po; ke grenadi luana kobga a bunbuna tiipo ya kudlugkaadi po. ²⁴ Babiloni bado guudkaaba yudaano den cuo salga yidkaciamo Serayia, yeni o kpaagli Sefania, yeni bu buñɔbu guudkaaba bonba taa. ²⁵ O den cuo u dogu nni ya jakɔndo n den tie bi tɔtieba gobdika, yeni jaba lele, ke bi tie o bado ceglikaaba, ki da ye u dogu nni. O go den cuo o bado tɔtieba yudaano, yua n den tie tidianlo, ki dangi yaaba n ba gedi bu tɔbu, bi go den cuo i tinkundogi yaaba, ya niba n ye u dugu nni, bonba piiluoba. ²⁶ Lanwani ii Nebusaradani, bi guudkaaba yudaano den taa wan cuo yaaba kuli, ki sɔni yeni ba Babiloni bado kani Ribila dogu nni. ²⁷ Babiloni bado den cedi ke bi kpa ba Ribila dogu nni, Hamati diema nni. Li den tieni yeni i, ke bi cuo Juda diema nni yaaba, ki ñani ba bi diema nni, ki gedi yeni ba ti yonbidi. ²⁸ Babiloni bado, Nabukanesaari ń den gedi yeni yaaba ti yonbidi n ne: O bali binleleli binli, o den gedi yeni Juda yaaba 3.023. ²⁹ O bali piiga n biniili binli, ke o gedi yeni Jerusalema yaaba 832. ³⁰ O bali piilie n bintaali binli, ke Nebusaradani, o bado guudkaaba yudaano den gedi yeni Juda diema nni yaaba 745. Ban gedi yeni yaaba ti yonbidi taani ki tie 4.600. ³¹ Yaali n den juodi den tie o bali piita n binleleli binli, ban den gedi yeni Juda diema bado Johakimi, o piiga n ŋmaalielo, o piilie n damuuli daali, Babiloni bado, Efili Meroda den luodi Juda bado Johakimi li kpaadidieli nni. Li den tieni Efili Meroda ń den cili ki kali li bali po ya binli i. ³² O den duani o yama, ki boe yeni o, ki puni o ya kalkaanu n ŋani, ki pia ti kpiagidi ki cie ya baditieba n den ye Babiloni ń den kaandi o maama yeni. ³³ Babiloni bado, Efili Meroda den cedi ke bi landi Johakimi dansaltiadi, ki cedi ke bi yieni o ya tiadi n pia ti kpiagdi, ke o ji kaa yeni Babiloni bado daali kuli, ki di yeni o kaanyendu, hali yeni o miali bianu, ³⁴ Babiloni bado den ki muni o wan bua yaali daali ń tuu daali, hali yeni o miali bianu, yeni o kuuma.