¹ O Diedo ń maadi ya maama ke mi nua Juda yaaba, yaaba n ye Ejipti diema nni, yaaba n kua Migidɔli dogu nni, Tafanesi, Menfisi yeni Patrosi diema nni. ² "O Diedo, u paaciamu kuli daano, Israyeli Tienu yedi ya maama ne: Yinba mɔno la min den jiini ya fala yeni ya yebiadma Jerusalema po yeni Juda dociami kuli po. Diidi mani, dinne, li diema kuli ji tie diegbendi i. Bá niyendo ji ki ye li diema nni. ³ Kelima bi tieni ti tuonbiadi, ki juugi li ŋubli yeni tulaale, ki padi i buli, ki gbaandi ki pugi ya buli, ke bani, fini yeni bi yaajanba kuli den ki bani. ⁴ N tuuni kaa cedi n naacenba, bi sawalpuaba i kani. N sɔni ba ke ban yedi, 'Cedi mani ki ji da tuuni min fali ya tuongunda ne. ⁵ Ama bi naa den cengi n maama. Bi den yie ke bi kan fangi bi yula, ki lebdi bi pala, ki ŋa bi tuonbiadi yeni ban juugi ya ŋubli yeni ya tulaale kuli, ki gbaandi, ki padi i buli. ⁶ Lanya po i ke n pabiencianli den jiidi bipo, ki juu Jerusalema yeni Juda dociami. Lanwani ii bi diema ji tie diemudindi yeni diegbena baba i hali yeni dinne." ⁷ Lanwani ii, O Diedo, u paaciamu kuli daano, Israyeli Tienu yedi ya maama ne, "Be n cedi ke i tiendi mi biadma boncianla, ki tugindi i tagli i yula po oo? Be n cedi ke i tiendi ya tuada n ba jia ki ñani yi Juda yaaba siiga nni ii, yinba bi jaba yeni bi puoba, a bila yeni mu canpandimu uu? Yinba yaaba n sieni Juda yaaba siiga, obakuli kan tindi. ⁸ I biadma po n cedi ke i biidi n pali yeni yin tieni ya tuadibiadi yeni i nui, ki juugi li ŋubli yeni tulaale, ki padi i buli, ki gbaandi ki pugi li buli Ejipti diema nni, yin sani ki gedi naani ki bua wuoni ki ya ye yeni. I sani ki gedi lipo ki bua yin bolini i yula i, yeni ke i ba tua ti solindi yeni ti sugidi bonli ki tinga nni diema kuli po. ⁹ I sundi i yaajanba ń den tieni ya biadma yeni Juda baditieba yeni bi denpuoba ń den tieni ya biadma yo oo? I sundi yinba ibá ń tieni ya tuonbiadi Juda diema nni yeni Jerusalema sanjala po yo oo? ¹⁰ Hali yeni dinne, li biadma buodi da ki piini. Li naa pia ipo fangli, i ki cɔlni n yikodi yeni n ñɔmaama, min den teni yinba yeni i yaajanba ya ñɔmaama, li naa go ŋanbi ipo liba kuli." ¹¹ Lanya po i, ke O Diedo, u paaciamu kuli daano, Israyeli Tienu yedi ya maama ne, "Diidi mani, N ba buli yi n nunga, ki jiini ipo fala yeni mi yebiadma, ki bolini Juda diema kuli. ¹² Kelima, N ba taa Juda yaaba, yaaba n sieni, bani yaaba n jagi ke bi ba ña ki gedi Ejipti diema nni ki ban ya ye lanpo yeni, bikuli ba bodi Ejipti diema nni i. Bu tɔbu yeni mi koma n ba kpa ba. Ki cili yua n waa ki cie, ki ban tuoni yua n yabi ki cie, ki jugsiega yeni mi koma n ba kpa bankuli. Bi ba kpe, ki tua ti solindi yeni li ñuali bonli, ti sugdi yeni ti jawaanciandi bonli. ¹³ Kelima, N ba dadi Ejipti diema yaaba tuba nani min den dadi Jeruslema yaaba tuba yeni bu tɔbu, mi koma yeni u yiabiadipuodikou yeni i. ¹⁴ Juda diema nni yaaba, yaaba n ñani ki gedi Ejipti diema nni ki baan ya ye lanpo yeni, bá niyendo kan guani Juda diema nni, bayeni ban li sugni ke ban guani ki ya ye bi diema nni. Bá niyendo kan guani mi diema nni, kase yaaba n ba mɔndi ki sani ki ciadi yaaka." ¹⁵ Ya jaba n den bani ke bi depuoba den juugi a ŋuba yeni tulaale, i buli po, yeni ya puoba n den ye li nitaanli nni, yeni ya nitaanli n den ye Ejipti diema nni kuli, ki kua Patrɔsi den jiini o sawalpualo Jeremi. ¹⁶ Bi den yedi "ŋan maadi ya maama, O Diedo yeli po ne, ti kan cengi a maama. ¹⁷ Kelima tin jagi ti yula nni, ki ba tieni yaali kuli, ti ba li tieni yeni i. Ti ba juu Tanpoli Pobado po li ŋubli yeni tulaale, ki padi opo a pada, ki gbaani ki pugi o nani ti yaajanba ti baditieba yeni ti yudanba ń den tiendi maama Juda diema nni yeni Jerusalema sanjala po yeni. Ti ba tieni yeni i, ki baa mi jiema yeni li diiguoli, ki baa mi yemanma, naani ke jeje yeni yebiadma kan mabini ti. ¹⁸ Ama, hali tin ŋa kaa padi, ki go juugi Tanpoli pobado po li ŋubli yeni tulaale, kaa padi opo, ki gbaandi ki pugi o, fala yeni mi luoma den kua ti boncianla, ke bu tɔbu yeni mi koma kpa ti." ¹⁹ Bi puoba den yedi, "Tin yi bobni tulaale yeni li ŋubli Tanpoli pobado po yeni, tinba yeni ti ciaba ka yi kali ki juogi ii, tin yi pua a maasa, ki bobni li ñincabli yeni mi jiema paabu yeni, ti lindi ti ciaba puoli po yo oo ki gbaandi ki pugi tanpoli pobado po oo?" ²⁰ Lanwani ii, Jeremi den yedi li nitaanli kuli, bi jaba yeni bi puoba, yeni ya nitaanli n den jiini o maama po yeni kuli; O den kpaandi, ki yedi, ²¹ "I bani ke O Diedo sundi yinba, yeni i danba, yeni i baditieba, yeni i yudanba yeni mi diema nni yaaba ń den juugi ya ŋubli yeni ya tulaale Juda dociami nni yeni Jerusalema sanjala po yo oo? O diedo li tiani lankuli po; li tuonbiadi kuli dá li ye o yuli nni. ²² Lanwani ii, o kan fidi ki mangi o pali i tuonbiadi po yeni i tuongunda po, kelima yin fanbi i yula, ki fanbi o yeli maama po. lanya po i ke i diema tua diegbendi, ti jawaanciandi yeni ti solindi, hali yeni mɔla kuli bá niyendo ki ye li diema nni. ²³ Kelima i den juugi li ŋubli yeni tulaale, ki tiendi ti tuonbiadi O Diedo po, yin yie kaa cengi o maama, kaa cɔlni o yikodi, kaa ŋɔdi o ñɔmaama yeni o ñɔbona i, ke fala yeni mi yebiadma baa yi hali yeni mɔla kuli." ²⁴ Jeremi den yuadi ki yedi li nitaanli yeni bi puoba kuli "Yinba Juda yaaba, yaaba n ye Ejipti diema nni kuli ne, cengi mani O Diedo maama. ²⁵ O Diedo, ki pia gbenma, Israyeli Tienu yedi ya maama ne, 'Yinba yeni i denpuoba, ikuli yaadi ki yedi yeni i ñɔna, ki muubi i lanbona i nui nni, ki yedi, "Tinba wani ba kuani ti ñɔnianu, ki tugni ki ya juugi li ŋubli yeni tulaale tanpoli pobado po i, ti baa padi opo a pada yeni li ñincabli kuli, ki puuni o bu paabu." Mɔla, yin kuani i ñɔnianu, ki ya kubi yeni, ki ban tii.' ²⁶ Ama, yinba Juda diema nni yaaba, yaaba n ye Ejipti diema nni ne, yin cengi O Diedo maama, 'Diidi mani, N poli n yeli yaali n ye yeni ti kpiagdi po, ki yedi. Yinba Juda diema nni yaaba, yaaba n ye Ejipti diema nni ne, obakuli kan taa n yeli, ki yedi, "O Diedo yua n fo yeli po." ²⁷ Diidi mani, N kan faami bipo, fala yeni mi yebiadma baba n ba kpa ba, bi kan baa yemanma. Ya niba n ñani Juda diema nni ki ya Ejipti diema nni kuli, bu tɔbu yeni mi koma n ba kpa ba ki gbeni ba cain. ²⁸ Li ba yuandi, yaaba n fidi ki sani ki ciadi Ejipti diema nni, bani baba n ba guani Juda diema nni, bi ka ya yabi, bi baa tie waamu baba i. Lanwani ii, Juda diema nni yaaba, yaaba n gedi Ejipti diema nni ki ban ye yeni, bi ba bandi ŋma ya ñɔmaama n ba tii: N yaama bii, bi yaama i. ²⁹ Lani n baa tie ipo mi banma maalma ipo; O Diedo ñɔmaama n yeni. N ba fii ki sedi ipo nekanba, yin bandi ke n ñɔmaama ba jiini ipo fala yeni mi yebiadma.' ³⁰ O Diedo yedi ya maama ne, 'Diidi, N ba taa Ejipti bado, Faarahɔn Hofra, ki tieni o yibalinba nui nni, yeni yaaba n lingi ke ban biani o miali nui nni. Li baa tie nani min den taa Juda bado Sedesiasi, ki tieni Babiloni bado, Nabukanesaari, yaaba n den lingi ke ban biani o miali yeni nui nni, maama yeni i.'"