¹ Jeremi den kpaandi ki waani li nitaanli kuli O Diedo, bi Tienu ń den yedi o ke wan waani ba ya maama kuli. ² Hosayia bijua, Kareya bijua Johanani Asariya yeni ya japaadanba n sieni kuli den yedi Jeremi, "A pua mi tofaama i. O Diedo, ti Tienu ki sɔni a ke ŋan yedi ti, 'Da gedi mani Ejipti, ki ya ban ye lipo.' ³ Kelima, Neriya bijua Baaruki n sedi tipo, ki bua wan nandi ti, ki tudi a, ki sagindi tinba yeni fini, ke ŋan taa ti ki tieni Kalide yaaba nui nni, ki cedi tin kpe kpe, ban gedi yeni yaaba n sieni Babiloni, ti yonbidi." ⁴ Lanwani ii, Kareya bijua Johanani, bi badijaba yeni bi tɔtieba yudanba yeni li nitaanli kuli den yie kaa cengi O Diedo ñɔbonli, ki kali Juda diema nni. ⁵ Kareya bijua, Johanani yeni bi tɔtieba yudanba de taa ya niba n den yayadi ki gedi i kaani, ki yuandi ki guani Juda diema nni yeni. ⁶ Bi den taa bi jaba, bi puoba yeni a bila, yeni o bado bisiaba yeni Babiloni jakɔnda yudaano, Nebusaradani n taa yaaba ki guuni o bado, Cafani yaabili, Ahikami bijua Gedaliya yeni. Bi go den taa o sawalpualo Jeremi yeni Neriya bijua Baaruki kuli. ⁷ Bi den gedi Ejipti diema nni, Tafanesi dogu nni, kelima, bi naa den cengi O Diedo ñɔmaama. ⁸ Lanwani ii, O Diedo den maadi yeni Jeremi, ki yedi, ⁹ "Taa ya tana n gbengi, ki ki bubni ku yɔgu tinga nni, ki teli o bado Faarahɔn bulñɔtuogli bilinguonli, Juda yaaba nintuali, Tafanesi dogu nni." ¹⁰ Ki ji yedi ba, "O Diedo, u paaciamu kuli daano, Israyeli Tienu yedi ya maama ne, 'Diidi mani, N ba sɔni u tondu, ban taa Babiloni bado, Nabukanesaari, wan ya tie n naaciemo. N ba caani o balkalkaanu jongu, ya tana ke fini Jeremi bubni ne nni i. Nabukanesaari ba caani o badijongu, kun ya yiini bipo i. ¹¹ Kelima, o ba cua ki tuogi Ejipti diema yaaba yeni bu tɔbu. Yua n dagdi ke wan kpe, o ba kpe. Yua n dagdi ke wan gedi ti yonbidi mo, o ba gedi ti yonbidi. Yua n dagdi yeni ki jugsiega mo, o ba kpe ki jugsiega kuuma i. ¹² N ba yuadi ki cedi ban juu Ejipti budiena kuli. Nabukanesaari ba juu li buli, ki taa butiani mo, ki gedi yeni yii ti yonbidi. O ba tigni Ejipti diema nani o yankpaalo n yi ñani o tialakaadi nni biabi maama yeni i. O ba ña li diema nni yeni ti kpiagdi yeni mi yanduanma i. ¹³ O ba pua ki mudi Heliyopolisi, Ejipti diema nni padbinbinda. O ba juu Ejipti diema nni budiena kuli.'"