¹ Bi tɔtieba yudanba kuli yeni Kareya bijua Johanani, Hosayia bijua Jesania yeni bi niba kuli, ki cili yua n yabi ki cie, ki ban tuoni yua n waa ki cie, bikuli den nagni o sawalpualo, Jeremi kani. ² Bi den yedi o, "Ti cua a nintuali, yeni ti miabu. ŋan jaandi tipo ki mia a Tienu O Diedo, li nitaanli yaaba n sieni ne po, nani ŋan nua maama ne ti naa ji yabi nani tin den tie maama, ti nibima ji waa boncianla. ³ Buali a Tienu O Diedo, tin baa ye maama yeni tin ba tiendi yaala yeni maama." ⁴ Lanwani ii, Jeremi den yedi ba, "N gbadi i maama. Diidi mani, N ba jaandi i Tienu, O Diedo, nani yin mia nni maama yeni. Wan ba jiini nni ya maama kuli, N ba waani yi. N kan wuoni yi bá lanbonyenli." ⁵ Bi den yedi Jeremi, "O Diedo yua n tie o mɔmɔndaano ń tua ti kasiedi, ti ya ki ŋɔdi a Tienu, O Diedo ń bili ti ya ñɔbonli lan buali maama, wan ŋmali ti tuba. ⁶ Lan tie tipo bonŋanli ii, bonbiigu uu, li buali ke tin cɔlni O Diedo ti Tienu, tin sɔni a yua ya kani ne ñɔbonli, lanbuali maama i. Lanwani ii, li baa ŋani ki go mani tipo yeni tin cengi, ki go cɔlni O Diedo ti Tienu maama." ⁷ Dana piiga ń den pendi, O Diedo den Jiini o sawalpualo Jeremi, ki waani o o ñɔmaama. ⁸ Lanwani ii, Jeremi den yini Kareya bijua Johanani yeni bi tɔtieba yudanba, yeni li nitaanli kuli, ki cili yua n yabi ki cie ki ban tuoni yua n waa ki cie. ⁹ O den yedi ba, "O Diedo, Israyeli Tienu, yin sɔni nni yua ya nintuali ke n waani o i miabu yeni, O yedi ya maama ne, ¹⁰ 'I ya guani ki ye mi diema ne nni, N ba maa ki kaani yi, N kan pua ki mudi yi; N ba ŋuu ki seni yi, N kan ŋabi yi, kelima N ba pieni ki kaadi fala yeni min wuli ya yebiadma i yula po. ¹¹ Da jie mani Babiloni bado, yin den jie yua. Ji da jie o mani; O Diedo ñɔmaama n yeni, kelima N ye yeni yi, ki ba faabi yi, ki fie i miana o nui nni. ¹² Kelima N ba gbadi i niñima, ki waani yi min pia ya buama ipo, ki cedi yin guani ki kali i diema nni. ¹³ Ama, i ya yie, ki yedi, "Ti kan kali ya diema ne niinni" I ya yie, kaa cengi Mini O Diedo, i Tienu maama. ¹⁴ Li ya tie ke i yie, ki yedi, "N n, ti ki tuo! Ti ba gedi Ejipti diema nni i, naani ke tɔbu ki ye, naani ke ti kan gbadi naatina piebima, naani ke jiema ki pɔdi ti ke ti ba ti kpe mi koma po. Ti ba gedi ki ban ya ye lanpo i." ¹⁵ mɔla, yin cengi O Diedo ñɔmaama ne, yinba yaaba n sieni Juda diema nni ne. O Diedo, u paaciamu kuli daano, Israyeli Tienu yedi ya maama ne, 'I ya ñani ya diema ne nni, ki ba gedi ki ban kali Ejipti diema nni, ¹⁶ Yin jie ya tɔbu yeni nan ba naa yi Ejipti po. Mi koma yaama n bi tie i yanbani nan ba cuo yi Ejipti po, lanpo i ke i baan kpe ikuli. ¹⁷ Lanwani ii, yaaba n sani ki ñani ki gedi Ejipti diema nni ki baan ye ye lipo, bu tɔbu, mi koma yeni u yianbiadipuodikou n ba kpa ba. Bi siiga nni bá niyendo kan tindi. Bá niyendo kan sani ki ciadi ya fala yeni ya yebiadma ke n ba jiini bi yula po. ¹⁸ Kelima, O Diedo, u paaciamu kuli daano, Israyeli Tienu yedi ya maama ne: Nani N pabiencianli ń den cedi ke N jiini yipo ya fala yeni ya yebiadma yeni, N go ba jiini ipo li pabiencianli, li ya tie ke i ñani, ki gedi Ejipti diema nni. I ba tua ti solindi, ti jawaanciandi, ti sugdi yeni li ñuali bonli, bi ba taa i yeli ti solindi yeni i fee bonli, i go kan baa mi naa diema hali bada.'" ¹⁹ Jeremi go den yuandi ki yedi, "O Diedo ń yedi ya maama ne nua yinba Juda yaaba, yaaba n seini ne i. Yin da gedi Ejipti po! Min wani maadi yi i mɔmɔni i, ikuli nan bani ke dinne, N tie yinba yeni O Diedo siiga nni kasiedi. ²⁰ I bɔndi i yula i, ki sɔni nni O Diedo i Tienu nintuali, ki yedi, 'Jaandi ki mia tipo O Diedo ti Tienu nintuali. O Diedo, ti Tienu ń ba yedi ya maama kuli, ŋan waani ti, Ti ba tugi li maama ti yula po, ki cɔlni ma. ²¹ Kelima N waani yi dinne O Diedo maama kuli, ama i naa cengi O Diedo, i Tienu maama, i naa go cngi wan yedi nni ke min waani yi ya maama. ²² Lanwani ii, yin ya bani ke yin jagi ke i ba gedi naanpo yeni, bu tɔbu, mi koma yeni u yiapuodikou n ba kpa yi lanpo."