¹ Ama, li binli ŋmaalelelo nni, Elicama yaabili, Netaniya bijua, Isimayeli den ñani badidiegu, ki ki cua yeni o bado jakɔnda; bi den tie jakɔnda piiga i, ki yegi yeni o, ki cua Misipa, Ahikami bijua, Gedaliya kani. Bi den taani ki dini mi jiama Misipa yeni i. ² Ama, Netaniya bijua, Isimayeli yeni wan den yegi yeni ya niba den tuodi ki fii ki gedi ki pigni Cafani yaabili, Ahikami bijua, Gedaliya yeni mu jugsiemu. Isimayeli den kpaa Gedaliya, Babiloni bado ń den dini yua Juda diema nni bali, ki guuni o mi diema yeni. ³ Isimayeli den yuandi ki kpaa Juda yaaba, yaaba n den ye yeni Gedaliya, yeni Babiloni jakɔnda yaaba n de ye likani kuli. ⁴ Li den tieni dana lie, wan kpa o bado Gedaliya, ke bi niba ki bani. ⁵ Bi niba den ñani Cecemi yeni Silo yeni Samaari po. Bi den tie jaba piiniin, yaaba n kuo bi langbiali, ki bi tialakaadi papadi, ke bi gbanu po jia jia. Bi den kubi bu paabu, u Tienu diegu po: mi jiema, li ŋubli, tulaale, ki bua puni U Tienu. ⁶ Nataniya bijua Isimayeli den ñani Misipa po ki tuogi li jaba, ke bi paa u sanu. O den cuoni, ki buudi, ki tuogi ba. Wan den tuogi ba, o den yedi ba, "Cua mani Gedaliya, Ayikami bijua kani na!" ⁷ Ban den kua u dogu nni, Nataniya bijua Isimayeli yeni wan den yegi yeni ya jakɔnda den kodi ba, ki luni li caakuonli nni. ⁸ Ama, jaba piiga den ye bi siiga nni, ki yedi Isimayeli, "Da kpa ti, kelima ti pia ŋalmani, ke li wuo ku muagu nni: kpanu bima, mi kpama, yeni ti siadi." Lanwani ii, o den ki kpaa bani yeni bi yegni. ⁹ Isimayeli ń den kpaa bi niba ki luni ya caakuonli nni yeni, o bado Asa n den cedi ke bi gbiidi li, ke lan tua opo wuonkaanu, wan den pua bu tɔbu yeni Israyeli bado, Baciha. Netaniya bijua Isimayeli den gbieni lanya caakuonli i, yeni wan den kpaa ya niba. ¹⁰ Isimayeli den yuandi ki cuo ya niba n sieni Misipa dogu nni, lani n tie o bado bisiaba, yeni ya niba n sieni kuli, ke a jakɔnda yudaano Nebusaradani den guuni Ahikami bijua Gedaliya yeni. Lanwani ii, Netaniya bijua, Isimayeli den cuo bikuli, ki ba puodi ki gedi yeni ba ti yonbidi Ammoni yaaba po. ¹¹ Ama, Kareya bijua, Johanani yeni bi tɔtieba kuli ń den gbadi Isimayeli ń den sɔni ya biadma. ¹² Bi den taa bi tɔtieba kuli, ke bi ŋɔdi ki ba pua bu tɔbu yeni Netaniya bijua Isimayeli. Bi den ban nandi o Gabewɔn ñincianma kani. ¹³ Ya niba n den ye yeni Isimayeli ń den la Kareya bijua Johanani yeni o jakɔnda, bi pali den mangi boncianla. ¹⁴ Lanwani ii, Isimayeli ń den cuo yaaba Misipa po, ti yonbidi yeni, den guani ki ŋɔdi Kareya bijua, Johanani. ¹⁵ Ama, Netaniya bijua Isimayeli den sani yeni jaba niin ki ciadi Johanani. O den ŋɔdi Ammoni yaaba. ¹⁶ Kareya bijua Johanani yeni ya jakɔnda n den ye yeni o Misipa po, den den taa ban faabi ya niba Isimayeli nuu nni yeni, li sua ke bi kpaa o bado Gedaliya, Ahikami bijua o. Johanani den taa a jakɔndibiema, bi tɔtieba, bi puoba yeni a bila yeni badidiegu tuonsɔnba, ban den faabi yaaba Gabewɔn yeni. ¹⁷ Bi den gedi ki kali Geruti Kimihami dogu nni, ke wuu fagi yeni Betehema. Bi den bua gedi Ejipti diema nni i. ¹⁸ Kelima bi den jie Kalide yaaba. hali Isimayeli ń kpaa o bado, Gedaliya, Ahikami bijua, yua ke Babiloni badiciamo den dini o Juda diema bali, ke wan ya guu mi diema yeni.