¹ O Diedo den maadi yeni Jeemi, Babiloni kɔnbla judaano Nebusaradani ń den ñani o Rama kpaadidieli nni. O den la ke Jeremi luoli yeni i kudseseli yeni Juda yeni Jerusalema kpaada yaaba n sieni, ke bi bua gedi yeni ba ti yonbidi Babiloni po. ² A kɔnbali yudaano den taa Jeremi, osawalpualo, ki yedi o, O Diedo i Tienu n jiini ya yebiadma ne u dogu ne po. ³ Lanwani ii, O Diedo n cua yeni ya fala ne. O tieni nani wan den puoni, ki bili ya ñɔbonli, ya yognu ke li nitaanli den tieni ti tuonbiadi, ki yie ke bi kan cengi o maama. Lani n cedi ke ya falabiado ne kua i dogu nni yaaba. ⁴ Ama, mɔla wani ii, Diidi, N lodi dinne ya kudseseli n den luoli a nui, ki ŋa a yeni mi yanduanma. Li ya tie ke li tie a buama, a ba fidi ki ŋɔdi nni Babiloni po, N ba kubi a lan buali maama. Ama a ya diidi ki sua ke laa tie a buama, ke ŋan ŋɔdi nni Babiloni po, ŋan tieni ŋan bua maama. Diidi ya tinfanma n bili a nintuali. A ba fidi ki gedi ŋan bua naani, ke li baa ŋani opo." ⁵ Jeremi ń den see, kaa jiini o libakuli, Nebusaradani den yedi o, "Gedi Cafani yaabili, Ahikami bijua, Gedaliya kani, Babiloni bado ń dini yua Juda bali yeni. A ba fidi ki gedi ki ya ye o kani, lanyaaka ŋan li gedi ŋan faadi naani ke li ŋani apo." A kɔnbala yudaano den teni Jeremi ti jiedi yeni bu paabu, ki cabi o. ⁶ Lanwani ii, Jeremi den gedi Ahikami bijua, Gedaliya kani, Misipa dogu po. O ye yeni wani, ya niba n den sieni siiga. ⁷ Yan jakɔnda n den sieni, ki ye ku muagu po den gbadi ke Babiloni bado dini Ahikami bijua, Gedaliya i, Juda bali, ke wani n baa die bi jaba, bi puoba, a bila yeni ya luoda n sieni kaa pia libakuli, ban den ki gedi yeni yaaba babiloni po, ti yonbidi yeni. ⁸ Lanwani ii, bi den gedi Misipa po, Gedaliya kani. Li niba n den tie: Netaniya bijua, Isimayeli, Kareya bijaba Johanani yeni Jonatani, Tanumeti bijua, Serayia Efayi, Netofa yua bi yeni Maakati yua bijua, Jaasaniya, bani yeni bi niba. ⁹ Cafani yaabili, Ahikami bijua, Gedaliya den poli ki ñani li ñɔbonli bani yeni bi niba po, ki yedi ba, "Yin da jie mani, yin ya tuuni Babiloni yaaba po. Yin ya ye mi diema nni, ki tuuni Babiloni bado po, yeni, bona kili ba cuoni ipo yin bua maama. ¹⁰ Diidi mani, Mini n ye Misipa, ki gaani ban suani Babiloni yaaba ti kani. Lanwani ii, yin cie ku daaɔngu tiidi bonluana yeni ya ya tiidi n sieni bonluana yeni mi kpama kuli ki begni likuli i tiadi nni. Yin ya ye yin kali ya dociami nni." ¹¹ Juda yaaba, yaaba n den ye Mowabi diema nni, yeni Ammoni, yeni Edomi yeni Babiloni bado ń den cabi bi niba ke bi ye Juda diema nni kuli, bikuli den gbadi ke Babiloni bado dini Cafani yaabili, Ahikami bijua, Gedaliya i Juda diema nni bali, ke o die bi niba kuli. ¹² Lanwani ii, Juda diema nni yaaba den ñani ban den yayadi ba, ke bi yeye naani, ki guani Juda diema nni, Misipa dogu nni, Gedaliya kani. Bi den taa ku kpaagu, ki cie i tiidi luana hali boncianla. ¹³ Kareya bijua, Johanani yeni bi tɔtieba yudanba kuli, yaaba n den ya i tinkundogi kuli den guani Misipa, Gedaliya kani. ¹⁴ Bi den yedi o, " A gbadi ke Ammoni diema bado, Baalisi sɔni Netaniya bijua Isimayeli ke wan kpa ŋa aa?" Ama, Ahikami bijua Gedaliya den ki tuo ke bi maama tie mɔmɔni. ¹⁵ Lanwani ii, Kareya bjua, Johanani den gedi Misipa li wuoli nni, ki yedi Gedaliya, "Cedi min min tieni dindini, ki gedi ki ban kpa Netaniya bijua Isimayeli. Nilo kan bandi ke mini n kpa o. Be cedi ke o bua wan kpa ŋa aa? Be cedi ke o bua Juda yaaba, yaaba n den yayadi, ki guani a kani yeni, ń sani ki yayadi ii, bii ban bolini Yuda diema nni yaaba yaaba n sieni yeni ii? ¹⁶ Ama Ahikami bijua Gedaliya den yedi Kareya bijua Johanani, "Da tieni lani, kelima, a pua tofaama i Isimayeli po."