¹ Sedesiasi ń den kali Juda bali po li binyiali ŋmaapiiga, Babiloni bado, Nabukanesaari den cua yeni o tɔgola ki pua bu tɔbu yeni Jerusalema ki paadi ki diedi u. ² Sedesiasi bali piiga n binyenli binli, o ŋmaanaalo nni o dayiali daali, bi den pua ki mudi u dogu bilinguona. ³ Lanwani ii, Babiloni bado naacenba den taani ki kali u dogu sinsiiga nni bulñɔbu kani. Yaaba n den kali li taanciali n ne : Nergali Careseri, Samgari Nabo, yeni Sarsekimi yeni a kɔnbala yudaano. NergaliCareseri den tie ya yudaano n tie yanfodaano, ke yaaba n sieni tie Babiloni bado ya yudanba i. ⁴ Juda bado Sedesiasi yeni o jakɔnda ń den la Babiloni yaaba tantannli, bi den sani ki ñani. Bi den sani ki ñiagu, ki tɔgni o bado gɔgdigu bulñɔbu kani, ki taa u sanu ki baan ña mu lɔdmu bulñɔna kani. O Bado den ñani ki taa Araba dogu sanu. ⁵ Ama, Babiloni yaaba den ŋɔdi ki deli ba ki ban cuo o bado Jurden kpenu tialu nni, ke laa fagi yeni Jeriko. Bi den cuo o ki guani yeni, ki teni o Babiloni bado Nabukanesaari nuu nni, li den tie Ribla dogu nni, Hamati diema nni. Lankani i ke Nabukanesaari den jia Sedesiasi buudi. ⁶ Babiloni bado den cedi ke bi kodi o bado Sedesiasi bijaba o nintuali nni, Ribla dogu nni. O go den cedi ke bi kodi Juda bulcindanba kuli. ⁷ O den cedi ke bi cɔgi ki pudi Sedesiasi nuni, ki cedi ke bi loli o yeni ti kumɔndi baabu, ki gedi yeni o Babiloni diema nni. ⁸ Babiloni yaaba den yuandi ki juu Juda bado yeni o niba diedi. Bi go pua ki mumudi Jerusalema bilinguona. ⁹ Babiloni kɔnbala yudaano, Nabusaradani den cuo ya niba n den sieni u dogu nni ki gedi yeni ba ti yonbidi. Bi den taani yeni yaaba n den taa bi yula ki cabi Babiloni yaaba yeni yaaba n den sieni u dogu nni. ¹⁰ Ama Nebusaradani, a jakɔnda yudaano den cabi yaaba n tie luoda cain, kaa pia libakuli yeni, ke ban ya ye Juda diema nni. Li daali i, ke o den bɔgdi ba i kuani yeni ku daamɔngu tiidi kuani. ¹¹ Babiloni bado, Nabukanesaari den ñani li ñɔbonli ki bili Nebusaradani, o kɔnbala yudaano, ke li nua Jeremi o sawalpualo po. O den yedi, ¹² "Taa Jeremi, ki ya nua o bonŋanli, ki da tieni o yaali n ba biidi o pali. Wan li buali a yaali kuli, ŋan tieni opo. ¹³ Lanwani ii, Nebisaradani, a kɔnbala judaano, Nebucasibani, o bado tuonsɔnlo, yeni NergaliCariseri, o yudaano yeni Babiloni yudanba den deli ki ñani bi niba. ¹⁴ Li niba n den taa Jeremi, o sawalpualo, badidiegu kpaadidieli luolu nni, ki gedi yeni o Cafani yaabili, Ahikami bijua, Gedaliya kani, ke wan kubi o o diegu nni. Lanwani ii, Jeremi ji den ye bi niba siiga i. ¹⁵ O Diedo den maadi yeni Jeremi, ki sua ke o dá ye badidiegu kpaadidieli luolu nni, ki yedi, ¹⁶ "Maadi yeni Ebedi Maleki, Etiyopi yua, ki yedi o, 'O Diedo, u paaciamu kuli daano, Israyeli Tienu yedi ya maama ne: Diidi, N bobni ki ba jiini mi biadma u dogu ne po, li kan ya tie bipo yaali n ŋani ka ama, yebiadma i. Kelima, bikuli ba ga li falabiado landaali, a nunbu nni. ¹⁷ Ama, N ba faabi fini wani li daali mɔno i, bi kan taa ŋa ki tieni ŋan jie yaaba nui nni; O Diedo ñɔbonli n yeni. ¹⁸ Kelima, laa pia tama, ke n kan faabi a. Bu tɔbu jugsiega kan kpa ŋa. A ba sani ki ciadi mi kuuma, ki faabi a miali, kelima a dugi npo. O Diedo ñɔmaama n yeni.