¹ Matani bijua, Cefatiya, Pecuri bijua, Gedaliya, Celemiya bijua, Jehukali, yeni Malkija bijua, Pacihuri den gbadi Jeremi, o sawalpualo ń den yedi ya maama, ki tua, ² "O Diedo yedi ya maama ne: Ya nilo n ba sieni u naa dogu nni, bu tɔbu, mi koma yeni u yianbiadipuodikou n ba kpa o. Ama, yaaba n taa bi yula ki cabi Babiloni yaaba, ki ŋɔdi ba, bani n ba fie bi miana. ban wani ba sani ki ciadi mi kuuma, ki ya fo. ³ O Diedo yedi ya maama ne, Bi ba taa u dogu ne, ki tieni Babiloni tɔgola nui nni, ban pua ki paadi u." ⁴ Lanwani ii, bi yudanba den yedi o bado "Cedi tin kpa o ja ne, kelima o maama n wudi ti jakɔnda yaaba n sieni ki ba fidi ki mua mi jama yeni u dogu nni niba kuli ya gbanu. O kpaandi ki maadi li maama, li naa tie ke o bua tipo mi yanduanma ka, o lingi tipo fala yeni mi yebiadma i." ⁵ Lanwani ii, o bado Sedesiasi den yedi ba, "Diidi mani, o ye i nui nni, bá yeni min tie bado kuli, n naa pia i paalu, ki ba yie i maama." ⁶ Lanwani ii, bi den taa Jeremi ki luni o o bado bijua Malkija caakuonli nni. Li caakuonli yeni den ye badidiegu kpaadidieli luolu nni i. Bi den loli Jeremi i baabi, ki jiini o li caakuonli nni. Laa den pia ñima ama ti bɔgdi den ye lienni, ke Jeremi feli ki see li bɔgdi nni. ⁷ Etiyopi yua Ebedi Meleki den tie tuonsɔlo badidiegu, wani n den gbadi ke bi cuo o sawalpualo Jeremi ki luni li caakuonli nni. O den ñani badidiegu ki cua ki sua ke o bado kaa Benjamina bilinguonli bulñɔbu kani. ⁸ Lanwani ii Ebedi Maleki den nagni o bado, ki yedi o, ⁹ "Canbaa, O bado, a naacenba ń sɔni ya tuonli yeni naa ŋani, bi cuo o sawalpualo ki luni o li caakuonli nni, ki cedi ke mi koma ba kpa o lienni, kelima jiema ji ki ye u dogu nni." ¹⁰ Lanwani ii, o bado den ñani li ñɔbonli, ki sɔni Etiyopi yua Ebedi Maleki, ki yedi, "Lingi mani jaba piitaa (30) ban ban ñani Jeremi, o sawalpualo li caakuonli nni, wan da ti kpe lienni." ¹¹ Lanwani ii, Ebedi Maleki den lingi li jaba, ki kua o bado diegu nni, ki lingi a kpacala. O go den taa i baaba mo, ke bi luni likuli li caakuonli nni, ke Jeremi ń bobni obá, ke ban dadi ki ñani o li caakuonli nni. ¹² Etiyopi yua, Ebedi Maleki den yedi Jeremi, "Taa a kpacala ne, ki kubni i baabi tiipo, a ŋmiangu nni yeni a loga po." Jeremi den kubni a kpacala i baabi tiipo, wan loli oba naani kuli. ¹³ Bi den dadi ki ñani o li caakuonli nni. Lanwani ii, Jeremi ji den ye u badidiegu kpaadidieli luolu nni i. ¹⁴ O bado Sedesiasi den sɔni ki bi yini Jeremi ke o cua o deni, O Diedo diegu bulñɔtaabu kani. O bado den yedi Jeremi, "N bua min buali a buali i. ŋan da wuoni nni libakuli, ŋan jiini nni yeni i mɔni." ¹⁵ Jeremi den yedi o bado Sedesiasi, "N ya jiini a buali, a kan cedi ban kpa nni ii? Ama, n ya jiini a yeni i mɔmɔni, ki teni a n cegli, a nan kan tuo ki cengi n maama." ¹⁶ Ama, o bado den poli Jeremi nintuali, ki yedi, "O Diedo yua n fo yeli po, wani yua n tagi tikuli ne, N kan kpa ŋa, N go kan tieni a yaaba n lingi ke ban gbindi a miali nui nni." ¹⁷ Lanwani ii, Jeremi den yedi o bado Sedesiasi, " O Diedo, u paaciami kuli daano, Israyeli Tienu yedi ya maama ne: A ya ñani, ki taa a yuli ki tieni Babiloni bado yeni o yudanba nui nni, a ba faabi a miali, bi go kan juu ya dogu ne. Fini yeni a diegu nni niba baa fo. ¹⁸ Ama, a ya ki ñani ki taa a yuli ki tieni Babiloni bado yeni o naacenba nui nni, bi ba taa u dogu ne ki tieni Babiloni yaaba nui nni, ban juu u, amoko kan ciadi bi nui nni." ¹⁹ O bado sedesiasi den yedi Jeremi, "Ama, N jie Juda yaaba yaaba n sani ki ŋɔdi Babiloni yaaba ne i, kelima bi ba taa nni ki tieni bi nui nni, ban tieni nni mi biadma, ban bua maama i." ²⁰ Jeremi den yedi, "Bi kan taa ŋa ki tieni bi nui nni. ŋan cɔlni O Diedo maama, min yedi a yaama ne, a bona ba cuoni apo nani ŋan bua maama, hali ŋan faabi a miali. ²¹ Ama a ya yie ke a kan ña, O Diedo ń yedi ya maama yeni n ba tieni. ²² Diidi, Ya puoba n ñani fini Juda bado deni ne kuli, bi ba gedi yeni ba ki ban tieni ba Babiloni bado yeni o naacenba nui nni i. Li puoba ba yedi ŋa, 'A dɔnlinba bɔndi a, ki biani ŋan den pia yaali kuli, ki sani ki ŋa ŋa. A ji feli ki see ti bɔgdi nni n yeni, ke yaaba n den yedi ke bi bua ŋa yeni mi yanduanma yeni ji sani ki ñɔli, ki ŋa a.' ²³ Kelima bi ba ñani a denpuoba yeni a bila kuli, ki gedi yeni ba Babiloni yaaba kani, ki tieni ba bi nui nni, ki ŋa fini baba, ban cuo a, ki tieni Babiloni bado nui nni, ki juu u dogu ne." ²⁴ Lanwani ii, o bado Sedesiasi den yedi Jeremi, "Da cedi nilo ń gbadi ya maama ne, lani n tie ŋan da kpe. ²⁵ N naacenba ya gbadi ke mini yeni fini maadi mi maama, ke bi cua ki buali a, 'Waani ti fini yeni o bado ń maadi ya maama, ki da wuoni ti libakuli, lanyaaka, ti ba kpa ŋa i,' ²⁶ ŋan yedi ba, 'N mia o bado bu miabu, ke wan da cedi min guani Jonatan kpaadidieli nni, lanyaaka n ba kpe lienni i.'" ²⁷ Lanwani ii, u dogu yudanba kuli den cua Jeremi kani, ki buali o, ke o guani ki jiini ba nani o bado ń den yedi o ke wan jiini ba maama yeni, kelima bi nan den ki gbadi o bado yeni Jeremi ń den maadi ya maama. ²⁸ Lanwani ii, Jeremi den ye badidiegu kpaadidieli luolu nni i, hali yeni ya daali ke bi kɔni ki diedi Jerusalema dogu.