¹ Josiyasi bijua Sedesiasi ń den kaa ti badigbandi po ya yognu, ki ga Jowakimi bijua Jehuakini kaanu. Babiloni bado Nabukanesaari n den dini Sedesiasi Juda diema bali. ² Ama, Sedesiasi yeni o naacenba yeni mi dema nni niba nan den ki cengi O Diedo ń puogi o sawalpualo Jeremi wan yedi ba ya maama. ³ Lanwani ii, o bado Sedesiasi, Celemiyabijua Jehukali, yeni Maseyia bijua, Sefaniya, salga yidka den sɔni u tondu, o sawalpualo Jeremi kani ki yedi o, "Jaandi ki mia O Diedo, ti Tienu tipo." ⁴ Lanyognu, Jeremi den waa u dogu niba siiga, ke bi da ki cuo o ki luoni o li kpaadidieli nni. ⁵ Li sua ke Faarawɔn tɔgola den ñani Ejipti ki kpendi Jerusalema, ke Kalide tɔtieba, yaaba n den lindi ki cebni Jerusalema yeni gbadi Ejipti jakɔnda maama, ki sani ki ŋa Jerusalema. ⁶ Lanyognu, O Diedo den maadi yeni Jeremi, o sawalpualo, ki yedi, ⁷ "O Diedo, Isayeli Tienu yedi ya maama ne, Yin baan yedi Juda bado ya maama n ne, kelima wani n sɔni yi ke yin cua ban jaandi bipo N yeli po, "Diidi, Faarawɔn tɔgola yaaba n cua ki ba todi yi yeni, ji gɔa ki kuni bi diema nni i. ⁸ Kalide jakɔnda go ba guani nekanba, bi ba pua yeni yi bu tɔbu, ki diedi i dogu, ki juu i dociami.' ⁹ O Diedo yedi ya maama ne: 'Yin da bɔndi i yula ki ya tua ke Kalide tɔtieba sani ki yaadi, bi da ki yaadi, bi da li ye, ki kuu yi. ¹⁰ Bá i ya fidi ki paadi Kalide jakɔnda, ki ban sieni yin pua ki duoli yaaba baba i bi jondi nni, bani n ba ña ki juu i dogu." ¹¹ Faarawɔn tɔtieba ń den kpendi Jerusalema, ke Kalide jakɔnda gbadi ki sani ki yaadi n yeni, ¹² Jeremi den ñani Jerusalema, ki caa Benjamina diema nni. O den bua taani yeni lipo niba ban bɔgdi mu tinmu. ¹³ Wan den pundi Benjamina binlinguonli bulñɔbu kani, bi tɔtieba yudaano den ye likani, ke o yeli tie Jeriya, o den tie ananiya yaabili, Celemiya bijua i. O den cuo Jeremi, o sawalpualo, ki yedi, " A siani ki bua ŋɔdi Kalide tɔtieba i." ¹⁴ Ama, Jeremi den yedi o, "Li ki tie mɔni, mii tiini ki ŋua Kalide yaaba ka." Ama Jeriya nan den ki cengi o maama. O den taa Jeremi ki gedi yeni o bi judanba kani. ¹⁵ Bi yudanba pali den beni Jeremi po. Bi den pua o, ki luoni o li kpaadidieli nni, li den tie o tidianlo Jonatan dieli i, ke bi taa ke li tua kpaadidieli. ¹⁶ Lanwani ii bi den luoni Jeremi li caakuonli nni, ke o tie a dana hali boncianla. ¹⁷ O bada Sedesiasi den sɔni ke bi ba yini Jeremi li wuoli nni, ki cua yeni o o dieli nni. O bado den buali o o dieli nni, " O Diedo ki ŋa tonduba npo a kani ii?" Jeremi den jiini o, "A pia u tondu: Bi ba taa ŋa ki mubni a Babiloni bado nui nni." ¹⁸ Jeremi den yuandi ki yedi o bado Sedesiasi, "N tieni fini yeni a naacenba yeni u dogu nni niba be ya tuonbiadi i, k i cuo nni ki luoni nni li kpaadidieli nni ii? ¹⁹ I sawalpuaba ye le i, yaaba n den pua ipo sawali ki yedi ke Babiloni bado kan tuogi yi yeni tɔbu, ke tɔbu kan pua i diema nni ne, bi ji ye le i? ²⁰ Ama mɔla wani ii, n mia ŋa n canbaa, ke ŋan cengi n miabu! Ji da cedi min guani o tidianlo Jonatan kpaadidieli nni, lanyaaka n ba kpe lienni i." ²¹ Lanwani ii, Sedesiasi den ñani li ñɔbonli. O den cedi ke naacenba kubi o badidiegu kpaadidieli nni luolu nni i. Bi den yi teni o kpanu yenli, daali kuli, ya caa ke kpanu ban gbeni u dogu nni. Jeremi den li ye badidiegu kpaadidieli luolu nni i.