¹ Josiyasi bijua, Jowakimi ń den kaa ti badigbandi po ya yognu, li binnaali, O Diedo den maadi yeni Jeremi, ki yedi, ² "Lingi tigbakaali, ki diani min ba waani a ya maama kuli, ke mi nua Israyeli yeni Juda diema, yeni ya diema n sieni kuli. ŋan diani min waani a ya maama kuli, hali ki cili Josiayasi yognu, ki ban tuoni hali dinne. ³ Li ki kua Juda yaaba ba gbadi min bobni ya yebiadma, ki ba jiini bipo. Li ki kua yuakuli ba lebdi o pali, ki ŋa o tuonbiadi, lani n tie min mia sugli bi tagli yeni bi tuonbiadi kuli po." ⁴ Lanwani ii, Jeremi den yini Neriya bijua, Baruki, ke Baruki diani li tigbabikaali nni, O Diedo ń waani Jeremi ki yedi o, ke wan cedi ban diani ya maama kuli. ⁵ Jeremi den yuandi ki yedi Baruki, ki waani o, O den yedi, "Bi luoni nni li kpaadidieli nni, ke n kan fidi ki gedi O Diedo diegu nni. ⁶ Lanwani ii, n ba sɔni a O Diedo diegu nni ŋan ban cogi min cedi ke a diani yaali li tigbabikaali po. Mi ñɔlolima daali i, ke a ba cogi O Diedo maama yaama n ye li tigbabikaali po yeni, ki kpaandi ki waani bikuli O Diedo diegu nni, yuakuli ń gbadi. ⁷ Li ki kua ban mia sugli O Diedo ń gbadi bi miabu. Li ki kua yukuli ń lebdi o pali, ki ŋa o biadma, kelima O Diedo ń bobni ya yebiadma ki ba jiini u naabuolu po pia fala boncianla." ⁸ Lanwani ii, Neriya bjua, Baruki den tieni Jeremi o sawalpualo ń den waani o ke wan tieni yaali kuli. O den sedi O Diedo diegu nni, ki duoni o nialu ki cogi O Di edo maama yuakuli po. ⁹ Juda bado, Josiyasi bijua, Jowakimi bali binmuuli binli, o ŋmaayia, li den dagdi ke Jerusalema yaaba yeni yaaba n den ñani Juda dogi nni ki cua Jerusalema den bobni bu ñɔlolibu, ki bua ban kpiagi O Diedo. ¹⁰ Baruki den duoni u nialu, ki cogi Jeremi ń den cedi ke o diani O Diedo maama, yaama li tigbabikaali po yeni O Diedo diegu nni, o tidianlo, Cafani bijua Gemariya dieli nni, u Tienu diegu luolu polu, bu bulñɔcianbu kani. O den cogi hali ke yuakuli gbadi. ¹¹ Lanwani ii, Cafani yaabili, Gemariya bijua, Micayia den gbadi O Diedo maama yaama n den diani li tigbabikaali po yeni. ¹² O den jiidi ki kua o bado diegu nni, ki gedi o tidianlo dieli nni. Li sua ke bi judanba kuli kaa likani: o tidianlo Elicama, Cemayia bijua, Delayia, Acibori bijua, Elinatani yeni Sedekiyasi bijua Hananiya yeni bi judanba kuli. ¹³ Lanwani ii, Micayia den togdi ba Baruki ń den duoni u nialu, ki cogi ya maama ke bi niba kuli gbadi. ¹⁴ Lanwani ii, bi judanba kuli den sɔni Kuci yaabili, Celemiya, bijua, Netaniya bijua, Jehudi, Baruki kani. Jehudi den yedi Baruki, "Taa li tigbabikaali, ki mubni a nuu nni, ŋan den cogi ya maama O Diedo diegu nni ke yuakuli cengi yeni, ki cua na." Lanwani ii, Neriya bijua Baruki den taa li tigbabikaali, ki mubni o nuu nni, ki pundi bi yudanba kani. ¹⁵ Bi den yedi o, "Kali ki cogi tin gbadi." Baruki den cogi li tigbabikaali, bi kani. ¹⁶ Baruki ń den cogi li maama, ke bi gbadi, yuakuli den gbagi yeni ti jawaandi, ki yedi o lielo yeni Baruki, " Li buali ke tin togdi tin gbadi ya maama ne o bado i. ¹⁷ Bi den buali Baruki, waani ti lan tieni maama, ke Jeremi waani a ya maama ne, ki cedi ke a diani? ¹⁸ Baruki den yedi ba, "O yaadi ki maadi nni li maama kuli,ke n diani yeni mi magñima li tigbabikaali po." ¹⁹ Lanwani ii, bi yudanba den yedi Baruki, "Gedi fini yeni Jeremi, yin ba wuoni naani ke nilo kan la yi, ki bandi yi ye naani." ²⁰ Lanwani ii, bi den bili li tigbabikaali o tidianlo Elicama tuonsɔnkaanu i, ki gedi u luolu nni, ki ban togdi li maama kuli o bado. ²¹ O bado den sɔni Jehudi, ke o ba taa li tigbabikaali. Jehudi den kua o tidianlo dieli nni ki ban taa li tigbabikaali, ki guani ki cogi o bado yeni bi yudanba kuli nintuali, ke bi see o bado kani. ²² Li den tie ŋmaayia, ti waadi yogni i, li sua ke bi cuoni u mu ki ba tongi o bado kankaanu kani. ²³ Jehudi ya den cogi juudi taa bii juudi na, o bado den yi taa ki penga ki jia wan cogi yaali yeni, ki lu u mufanu nni, hali ki ban juu li tigbabikaali kuli ki gbeni. ²⁴ Ama, li naa den kuani o bado lanyaaka o naacenba jawaani, ke bi ba biidi bi pala, ki loli bu ñɔbu, ki padi bi tiadi. ²⁵ Elinatani, Deliya yeni Gemariya den gbaani ki mia o bado ke wan da juu li tigbabikaali, ama, o den ki cengi bi maama. ²⁶ Lanwani ii o bado den sɔni Jerammeyeli, o kpiilo, Asiriyeli bijua, Serayia yeni Abideli bijua, Celemiya, ke ban lingi Baruki yeni Jeremi, o sawalpualo ki cuo ba, ama O Diedo nan den wuoni ba o. ²⁷ Lanwani ii, o bado ń den juu ya tigbabikaali ke Baruki den cogi ki waani o yeni, Jeremi ń den cedi ke o diani yaama yeni, O Diedo den maadi yeni Jeremi, ki yedi, ²⁸ "Guani ki lingi tigbabikaatɔli, ki diani ya maama n den ye li tikpeli po yeni, o bado Jowakimi ń den juu ya tili yeni. ²⁹ ŋan juandi ki waani Juda bado Jowakimi ya maama ne: 'A juu li tigbabikaali, ki yedi, "Be n cedi ke a diani lanya maama ne, 'Babiloni bado ba cua ki pua ki mudi mi naa diema, kelima o ba bolini bi niba yeni ti yandi kuli i, mi diema nni ii?"" ³⁰ Lanya po i ke O Diedo yedi ya maama ne, ke mi nua fini Juda bado, Jowakimi: "A puolŋuanu ba yendo ki ye ki ba kali Dafiidi badigbandi po. Ama, fini wani a kuuma baa bili u yienu nni, hali ki pili, ki yuandi ku ñiagu waadi ń kua a gbannandi. ³¹ Kelima, n ba dadi fini yeni a puolŋuani yeni a naacenba tuba, ki dugni i tuonbiadi tagli po. N ba jiini ipo yeni Jerusalema po, yeni Juda yaaba po min den bili ipo ya yebiadma, ki maadi yeni yi yognu kuli ke i naa cengi yeni." ³² Lanwani ii, Jeremi den lingi tigbabikaatɔli, ki teni Neriya bijua, Baruki, o kadadianlo. Baruki den diani Jeremi, o sawalpualo ń yedi o ke wan diani ya maama kuli, ya maama n den ye Juda bado Jwakimi ń den juu ya tigbabikaali yeni. Hali o den cedi ke o diani maatɔma yaama bia ki cie, ki pugni mipo li tigbabikaali nni.