¹ O Diedo den maadi yeni Jeremi, Josiyasibijua, Josiyakimi ń den kaa ti baddigbandi po ya yognu, ki yedi o, ² "Gedi ki ban la Rekabi cugli nni yaaba, ki maadi yeni ba. ŋan gedi yeni ba O Diedo diegu kani, ki kuani ba dieyenli nni, ki teni ba mi daama ban ñu." ³ Lanwani ii, n den gedi ki la Habasiniya yaabili, Jeremiya bijua, Jaasaniya, ki taa wani yeni o ninjaba yeni bi bijaba yeni Rekabi diegu nni yaaba kuli. ⁴ N den kuani ba U Tienu diegu, Igdaliya bijua, Hanani, U Tienu nilo dieli nni. lanya diena den ki fagi yeni bi yudanba diena, ki ye Calumi bijua, Maaseyia, yua n tie li cugli bulñɔguudo dieli polu. ⁵ N den kabi mi daama mu tadkuamu nni, ki sieni kɔpinba Rekabi diegu yaaba nintuali, ki yedi ba, "Ñu mani ki daamɔngu." ⁶ Ama, bi den yedi, "Ti kan ñu daama, kelima ti yaaja Recabi bijua, Jonadabi den bili li ñɔbonli, ki kuani ti mi daama ki yedi ti, 'Yin da ñu daamɔngu, yinba yeni i puolŋuani kuli hali bada. ⁷ O go den kuani ti, ki yedi, yin da maa dieli, yin da buli bonpiabli, ki go da ŋuu daamɔngu tiidi mo; I tuonli ka yeni. Li buali ke yin ya kua ti jondi nni i, lani n tie yin waagi ki ye ya diema nni ke i kua , ki tie nani canba yeni.' ⁸ Ti cɔlni ti yaaja, Recabi bijua Jonadabi ñɔmaama i, kaa pɔdi bá lanbonyenli, ke tin da ñu daama ti miali bianu kuli, tinba yeni ti denpuoba, ti bijaba yeni ti bisiaba. ⁹ Ti go kan maa diegu ki kua, ti go ka ya pia daamɔngu tiidi kuanu mo, bii kuanu bakuli ke u tie ti kuancelu. ¹⁰ Ti li kua ti jondi nni i, ki cɔlni ti jaaja Jonadabi ń den bili ti ya ñɔbonli ¹¹ Ama, Babiloni bado, Nabukanesaari ń den tuogi mi diema yeni bu tɔbu, ti den yedi, 'Fii mani ti sani ki gedi Jerusalema, ki sani ki ciadi Kalide yeni Sili yaaba tɔgola.' Lan tieni maama ke ti ji ye Jerusalema nni n yeni." ¹² Lanwani ii, O Diedo den maadi yeni Jeremi ki yedi, ¹³ "O Diedo, ki pia gbenma, Israyeli Tienu yedi ya maama ne, 'Gedi ki ban waani Juda jaba yeni Jerusalema dogtieba, "I kan ga i tundi ki cɔlni n ñɔmaama aa? O Diedo ñɔbonli n yeni. ¹⁴ Recabi bijua Jonadabi ń den bili o bila ya ñɔbonli, ki kuani ba mi daama yeni, bi dá li bii ki cɔlni bi yaaja ñɔmaama hali yeni mɔla kuli. Ama Mini wani ii, N li kpaandi yognu kuli, kaa cedi, ama, i naa cengi n maama. ¹⁵ N sɔni n naacenba bi sawalpuaba i kani, n den wangi ba yognu kuli, ke ban yedi yi, 'Yuakuli ń lebdi o pali ki ŋa o mi biadma tuona, ki ya tiendi yaali n ŋani, i siiga nni obakuli ń da ŋua ki pugi i buli. Yin lebdi ki guani n kani ki ya ye min teni yinba yeni i yaajanba ya diema.' Ama, hali yeni mɔla kuli i naa bua ke i cengi n maama. ¹⁶ Recabi bijua Jonadabi wani ya puolŋuani cengi bi yaaja ñɔbonli, ki cɔlni wan o ñɔmaama, ama mini ya buolu wani yie kaa cengi maama.'" ¹⁷ Lanwani ii, O Diedo, u paaciamu kuli daano, Israyeli Tienu yedi ya maama ne, 'Diidi, N ba jiini Juda yaaba po yeni yaaba n kua Jerusalema kuli po, min den niani ba ya yebiadma kuli, ke i waani ba yeni, kelima, n maadi ba, bi naa cengi n maama; N ya yini ba mo, bi naa tuoni n yiini.'" ¹⁸ Jeremi den yedi Recabi diegu nni yaaba, "O Diedo, u paaciamu kuli daano, Israyeli Tienu yedi ya maama ne: I cengi i yaaja Jonadabi ñɔmaama, ki cɔlni o ñɔbonli hali yeni mɔla kuli. i cɔlni li ñɔbonli, kaa kandi bá lanbonyenli po. ¹⁹ Lanwani ii, O Diedo, u paaciamu kuli daano, Israyeli Tienu yedi ya maama ne, 'Recabi bijua, Jonadabi kan luo o puolŋuanu yua baa tuuni mini O Diedo po, hali ya yognu kuli.'" O Diedo ñɔmaama n yeni