¹ O Diedo go den maadi yeni Jeremi, mi liema, ki sua ke o dá ye u badidiegu kpaadidieli nni, ki yedi, ² O Diedo, yua n tagi bonli kuli, O Diedo yua n tagi ki tinga, ki bili ga kaanyendu, O yeli n tie O Diedo, ³ Taa n yeli, N ba jiini a, ki waani a bonli kuli, N ba waani a ya bancianma yeni ya yaalidgu bona, ke ŋaa bani, kaa go kpeli ki gbadi mo.' ⁴ Kelima, O Diedo, Israyeli Tienu maadi ya maama ne, ke mi nua u dogu ne diedi, yeni Juda baditieba diedi yaadi n tua diegbendi, kelima, bu tɔbu janjanma po, ⁵ Kalide yaaba kpendi ki ba kɔni ki paadi yi, ki gbieni i diedi yeni bi tinkpiba, min ba kpa yaaba, n pabiencianli po, N ba buli ba n nunga kelima, Jerusalema niba biadma po. ⁶ Ama, diidi, N ba lingi u tebgu u dogu po, N ba paagi ba, N ba gbieni ba yeni li diiguoli, mi yanduanma, yeni payenli buama. ⁷ Kelima, N ba guani ki kpeni yeni Juda yeni Israyeli yonbi; N ba guani ki maani ba, ki kaani ba nani kpiama yeni i. ⁸ N ba yuandi ki ŋuudi ki ŋanbi ba, ki piini ban den tugi ya tagli n nintuali yeni. N ba di sugli bi tagli kuli po, ban tugi yii, n nintuali yeni, yeni ban den fiini ya yenyiema yeni. ⁹ Kelima u dogu ne ba kpandi ki tua pamanli bonli npo, ki tinga po nibuoli kuli ba gbadi i pamandanyani yeni ti kpiagdi yeni a donda yani, kelima min tieni ya ŋanbli bipo. U dogu yaaba kuli ba digbi yeni li pamanli, kelima min tieni ba ya ŋanma kuli bi dogu po. ¹⁰ O Diedo yedi ya maama ne, 'Yin maadi ya kaanu maama, ki tua, "Ne wani tie nifanu i, naani ke niba ki ye, ki buali yandi," Juda dociami nni yeni Jerusalema sanjala po, nifanu baba, niba ń ki ye naani, ki buali yandi, N yedi yi, i go ba gbadi: ¹¹ I pamandanyani, yani li pamankandikaali yigni, ki cikpenga yeni o pocaano pocaayani, yaaba n kpendi U Tienu diegu nni yeni bu paabu, ki tua, "Tieni mani O Diedo, u paaiamu kuli daano balga, kelima, O Diedo ŋanma yeni o buacianma ki pia gbenma!" Kelima, N ba cedi yaaba n den gedi ti yonbidi ń guani ki kpeni, min kaani ba bi diema nni nani kpiama yeni,' O Diedo n yedi yeni. ¹² O Diedo, u paaciamu kuli daano yedi mine 'U nifanu kaanu ne, naani ke nilo ki ye, ki buali yanga ne, N ba cedi i yankpaakaani yeni a bi ynkpaaba ń guani ki ya kpaa bi yankuli i dociami nni kuli. ¹³ A juana diema dociami nni, i tiali yeni niganu po diema nni, Benjamina diema nni yeni Jerusalema tinkundogi nni yeni Juda dociami nni kuli, ti yandi go ba ya ye yaaba n cɔdi ba nui nni, O Diedo n yedi yeni. ¹⁴ Diidi! O Diedo yedi ya maama ne, A dana kpendi, ke N ba tieni min den niani Israyeli diegu yeni Juda diegu po yaali. ¹⁵ Li dana yeni li yognu ya pundi, n ba cedi benpaanli yaali n tiegi, ń pudi Dafiidi po, yua n baa juagi ti buudi yeni i m ɔmɔni, ki ŋua mi teginma sanu mi diema nni. ¹⁶ Lanya dana nni, Juda ba baa mi faabima, Jerusalema ń ye ye mi yanduanma nni, kelima ban baa yi o maama n ne, "O Diedo n tie ti teginma.'" ¹⁷ Kelima, O Diedo yedi ya maama ne: 'Dafiidi diegu nni kan luo ya ja n ba kali Israyeli gbandi po, ¹⁸ Lefi diegu nni mo kan luo ya salga yidkaaba n baa waangi a padjuukaana, ki juugi mi jiema paabu yeni li ñincabli yognu kuli.'" ¹⁹ O Diedo den maadiyeni Jeremi, ki yedi, ²⁰ "O Diedo yedi mine: 'I ya ba fidi ki cedi u yienu yeni ku ñiagu ń pedi, ki lebdi, ki da go tiendi lan buali ya yognu, ²¹ Lanwani ii, i ba fidi ki miidi, ki fidi min loli ya ŋantaado yeni n naaciemo, Dafiidi, maama ke o ji kan baa ya bonjaga n ba kali o badigbandi po, yeni min pia ya ŋantaado yeni n naacenba, Lefi yaaba salga yidkaaba. ²² Nani yin kan fidi ki bigni, ki bandi tanpoli ń kpedi maama, ki go kan fidi ki cɔdi mi ñincianma kpentanbiini yeni, N ba cedi n naaciemo, Dafiidi puolŋuani yeni n naacenba Lefi yaaba puolŋuani, yaaba n tuuni n nintuali ń pɔli ki nɔbi yeni i.'" ²³ O Diedo den maadi yeni Jeremi, ki yedi, ²⁴ "ŋaa gbadi bi niba ń maadi ya maama, ki tua, 'O Diedo ń den gandi ya dielierdi yeni, o ñɔli ki ŋa ti o oo? Yeni i, ke bi fali n buolu, bani ya po ani ii, baa ji tie buolu mɔno, bi nunga nni. ²⁵ Mni O Diedo n yedi ya maama ne, 'Li ya tie ke Mini ka bili u yienu yenu ku ñiagu ń baa cuoni maama, kaa bili tanpoli yeni ki tinga yikodi, yeni lan cuoni maama, ²⁶ lanwani ii, n ba ñɔli ki ŋa n naacenba Jakɔbo yeni Dafiidi puolŋuani, n kan cedi bi siiga nni nilo ń ya gobdi Adrahama, Isaaka yeni Jakɔbo puolŋuani. Kelima, N ba gbadi bi po mi niñima, ki guani ki kpeni yeni ban de gedi yeni yaaba ti yonbidi yeni.'"