¹ Sedesiyasi ń den kaa ti gbandi po Juda diema nni ya yognu, li binpiiga, ke Nabukanesaari ji pia bina piiga a niini, Babilona badgbandi po, O Diedo den maadi yeni Jeremi. ² Lanyognu i, ke Babiloni tigola den gaani ki cebni Jerusalema, ke bi den cuo Jeremi ki lluoni li kpaardieli nni, Juda bado diegu luolu nni. ³ Juda bado, Sedesiyasi n den cuo ki luoni o,ki yedi, "Be n cedi ke a pua sawali, ki yedi, 'O Diedo yedi ya maama ne: Diidi, N ba taa u dogu ne, ki tieni Babiloni bado nuu nni, wani n ba diedi li dogu. ⁴ Juda bado Sedesiyasi kan sani ki ciadi Kalide yaaba nui nni, laa pia tama, ke bi kan taa o ki tieni Babiloni bado nui nni. O ñɔbu ba tuogi Babi loni bado ñɔbu, o ninbina mo ń tuogi Babiloni bado ninbina. ⁵ O ba gedi yeni Sedesiyasi Babiloni. O baa ye lanpo i, hali yeni ya yognu ke N ba gedi ki la o. O Diedo ñɔbonli n yeni. I ba pua bu tɔbu yeni Kalide yaaba, ama i kan paadi ba.'" ⁶ Jeremi den yedi, "O Diedo maadi yeni nni, ki yedi, ⁷ Diidi, a yiado, Calumi bijua, Hanameli paa u sanu nni, ki ba cua a kani, ki yedi, "Daa n kuanu yu n ye Anatoti yeni, wun tua a kuanu, kelima, fini n pia yiko ŋan daa li kuanu."" ⁸ Lanwani ii, nani O Diedo ń den bili o ñɔbonli maama yeni, Hanameli, n yiado bijua cua n kani, n diegu luolu nni, ki yedi nni, 'Daa n kuanu yu n ye Anatoti, Benjamina diema nni yeni, kelima fini n pia yiko yeni ŋan di lan ya faali, lanwani ii, fini n pia ti yikodi yeni ŋan daa li kuanu, wun tua a kuancelu.' Lanwani ii, n ji den bandi ke Jeremi, o sawalpualo ń pua ya sawali, ki yedi yaali yeni tie O Diedo ya maama i. ⁹ Lanwani ii, n den daa n yiado bijua, Hanameli kuanu yu n ye Anatoti yeni, ki bigni ki sua ke u dunga den dagdi piiga n dibala lele (17). ¹⁰ Lanwani ii, n den ba kasiedinba, ke ti diani tili nni. N den bigni li ligi. ¹¹ N den yuandi ki taa u tinkuadu ŋantaadi tili, ke li nibiñiili maalima ye lipo, nani yiko ń den buali maama yeni, ki pugni yiko tili yaali n ki pia nubiñiili yeni. ¹² N den taa ya lili ke li nibiñiili banma ye lopo yeni, ki teni Neriya bijua Baaruki, Maceseyia yaabili, n yiado bijua Anameli yeni kasiedinba yaaba n dieni li ŋantaadi tili yeni nunbu nni, yeni Jufinba yaaba, yaaba n den kaa badidiegu kpaadidieli luolu nni yeni. ¹³ Lanwani ii, n den bili Baaruki li ñɔbonli, bikuli nintuali, ki yedi, ¹⁴ O Diedo, U paaciamu kuli daano, Israyeli Tienu yedi ya maama ne: ŋan taa li ŋantaaditili yaali n pia li nibiñiili banma yeni yaali n ki ñii nibili kuli, ki tieni ku yɔgu bobli nni, lani n tie li tila ń waagi ki ye. ¹⁵ Kelima, O Diedo, ki pia gbenma, Israyeli Tienu yedi ya maama ne: Bi go baa daa ti diedi, i kuani yeni ku daamɔngu tiidi kuani mi diema nni." ¹⁶ Min den taa li ŋantaaditila, ki teni Neriya bijua, Baaruki, n den jaandi ki mia U Tienu, ki yedi, ¹⁷ Sola tipo, O Diedo, ti Diedo! Diidi, Fini n tagi tanpoli yeni ki tinga yeni a paaciamu yeni a bancianma. ŋan jagi yaali kuli, li tienma nan ki paa apo. ¹⁸ A den waani a teginma ŋan den loli a ŋantaado ya yognu yeni bi yaajanba, ki cedi ke li ŋantaado fidma tagli guni ki jiidi bi yaabila a tuda po. Fini n tie O Diedo, u paaciamu kuli daano, a yeli n yeni. ¹⁹ A bancianma ki pia bianu, a yabindi mo ki pia bianu, kelima a tuonciama kuli po, a nuni luodi i kaani kuli, ki nua i nibuoli kuli tuada, fini n pa yuakuli o tɔgu yeni o tuada pani. ²⁰ A tieni mi bancianma yeni yaalidgu bona Ejipti diema nni. Hali yeni dinne, Israyeli diema nni ne, yeni bi niba kuli kani, a yeli ñani, ki dɔgdi a paaciamu, nani tin bani maama yeni. ²¹ Kelima, a tieni mi bancianma yeni yaalidgu bona, ki kuani ba ti jawaanciandi, ki daa ki faabi a buolu, ki ñani ba Ejipti diema nni, yeni a paaciamu. ²² Lanwani ii, a den yuandi ki teni ba ŋan den poli ki niani bi yaajanba ke a ba puni ba ya diema yeni, ya diema nni ke mi naaŋanma yeni ti siadi puubi. ²³ Lanwani ii, bi den kua li diema nni, ki kali, ki diedi ma. Ama, bi den ki cengi a maama, kaa cɔlni a ñɔmaama mo. ŋan den bili ba li ñɔbonli, ke ban tieni yaali yeni, bi naa den tieni libakuli, lanwani ii, a den jiini bipo fali yeni ya yebiadma ne. ²⁴ Diidi mani! Yibalinba gaani ki lindi, ki cebni u dogu, ki ba paadi, ki diedi u. Kelima bu tɔbu, mi koma yeni u yiabiadipuodkou n ba cedi ban kɔni yeni ya yibalinba, Kelide yaaba ń paadi ba, ki diedi u dogu. Kelima, ŋan yedi ke yaali n ba tieni yeni, lani n ji tiendi mɔlane, a nunbu nni yeni. ²⁵ A den yuandi ki yedi nni Fini abá, "Lingi kasiedinba, ban tieni kasiedi, ki bigni i ligi ki daa a yuli po kuanu, ba yeni u dogu ne ń kua Kalide yaaba nui nni mɔno."" ²⁶ O Diedo den maadi yeni Jeremi, ki yedi, ²⁷ Diidi! Mini n tie O Diedo, bi nisaalba kuli ya Tienu. Bonliba ye, ki paa Mini ya po, ke N kan fidi ki tieni ii? ²⁸ Ama, O Diedo den yedi ya maama ne, 'Diidi, N taa ya dogu ne ki tieni Kalide yaaba yeni Babiloni bado, Nabukanesaari nui nni. Wani n ba paadi u, ki diedi u. ²⁹ Kalide yaaba, yaaba n pua bu tɔbu yeni u dogu ne, ba kua u dogu nni, ki sia u u mu, wun di ki buodi, u ba di ki buodi, ki taani yeni u diedi yeni ban juugi a ŋuba yeni tulaale, ki gbaandi ki pugi o bulo Baali ya diedi yula po yeni, ki puuni bulitoe mi jiema paabu, ki bua ban biidi n pali yeni. ³⁰ Kelima, Israyeli yeni Juda yaaba tiendi ti tuonbiadi n nintuali, hali bi panma nni i. Israyeli yaaba biidi n pali yeni bi tuadibiadi. O Diedo ñɔbonli n yeni. ³¹ O Diedo yedi, Hali ban maa u naa dogu, u li tie npo pabiidli yeni pabienli bonli baba i. Wun li kubi ya tuonbiadi n yeni hali yeni dinne. Lanwani ii, N ba paadi yeni ba, ki buli ba n nunga. ³² Kelima, Israyeli yeni Juda yaaba ń tieni ya biadma, yeni ban tieni ya tuonbiadi kuli, ki fiini n pabienli. Bani yeni bi baditieba, bi badibijaba, bi salga yidkaaba, bi sawalpuaba yeni ya niba n kaa Juda diema nni yeni Jerusalema dogtieba kuli. ³³ Bi buli nni bi nunga, ki teni nni bi punkpaali, bá yeni min tundi ba maama kuli. N bigni ke min cegli ba, ama bá niyendo ki tuo ki ba lebdi o pali yeni o tɔgu. ³⁴ Bi tagi bi cancaginbuli, ban taagi n yeli ya diegu nni, ki bua ban jɔgni n diegu. ³⁵ Bi maa a a padbinbinda a juaciama po, yeni Beni Hinomi jualɔngu nni, ki padi bi bijaba yeni bi bisiaba, ki juugi o bulo Baali po. Mini ka den puogi ba ke ban tieni lanya tuongunda. Li yantiali ki kpeli ki kua n yuli nni mɔno, ke bi ba tieni lanya tuonjɔgindi, ki tulni Juda diema, ban baa ti tuonbiadi nni.' ³⁶ Ama, mɔla wani ii, Mini, O Diedo, Israyeli Tienu n yedi ya maama ne, ke mi nua ŋan den maadi ya dogu po ki tua, 'Bi ba taa li dogu ki tieni Babiloni bado nui nni, ki cedi bu tɔbu, mi koma yeni ya yianbiadu n puodi ń naa ba, ban kɔni ki paadi ba, ki diedi u dogu.' ³⁷ Diidi, N ba ñani ba min den gedi yeni ba ya diema nni kuli, n pabiencianli yognu yeni, ki guani ki taani ba. N ba guani yeni ba, ki kaani ba nekanba, ban ya ye mi yanduanma nni. ³⁸ Lanwani ii, bi baa tie n buolu, ke nmo tie bi Tienu. ³⁹ N ba teni ba payenli yeni yantiayenli, ki waani ba ban baa kpiagdi n yeli maama, lan ya ŋani bipo yeni bi puolŋuani po, saala po. ⁴⁰ N ba yuandi ki loli ŋantaadipaano yua n ba waagi ki ye yeni ba. N ji kan buli ba n nunga, N baa tiendi bipo mi ŋanma baba i. N ba kuani li cɔlinli yeni li fangli bi pala nni, lani n tie ban da fagdi yeni nni, ki buli nni bi nunga. ⁴¹ Lanwani ii, n pali baa mani yeni min tiendi bipo ya ŋanma. N ba kaani ba yeni li papienli bonŋanla mi diema nni, ki ya bua ba yeni n pali kuli, hali yema nni. ⁴² Kelima, O Diedo yedi ya maama ne, 'Nani min den jiini ya fala yeni ya yebiadma bipo yeni, mini n go ba tieni bipo, min jagi ke n ba tieni ba ya ŋanma kuli. ⁴³ Lanwani ii, bi go ba daa i kuani mi diema ne niinni, yin maadi ya kaanu po, ki tua, 'Li tie diegbendi, pabiidli kaanu, niba yeni yandi ń ki ye naani. Bi taa li diema ki tieni Babiloni nui nni i." ⁴⁴ Bi ba bigni i ligi, ki lingi kasiedinba ki taani ba, ban diani a tinkuaditila, ban daa i kuani. Bi ba taani kasiedinba Benjamina diema nni, Jerusalema tinkundogi nni, yeni Juda dociami nni, ki taani yeni a juana yeni i tiali diema nni, yeni niganu po dociami nni kuli. Kelima, N ba guani yeni li yonbi yeni bi puolŋuani kuli, ban kpeni bi diema nni. O Diedo ñɔbonli n yeni.'"