¹ " Lanyognu, O Diedo, O Diedo den bili ya ñɔbonli ne: N baa tie Israyeli diegu kuli Tienu, ke bi mo tie N buolu." ² O Diedo den yedi ya maama ne, "Ya nibuolu n sani ki ciadi bu tɔbu yognu, kaa kpe mi fanpienma nni, mini n tieni bipo n ŋanbli, lanya po i, ke Israyeli ba kali ki fuodi yeni mi yanduanma." ³ O Diedo den la nni hali yognu ba, ki yedi nni, "Hali yugu, N buadi a yeni ya buama n ki pia gbenma. Lani n cedi ke N dadi a ki nagni n kani, ki baa kubi n ŋanma yeni n buaba ipo. ⁴ N ba guani ki maa ŋa, fini Israyeli, N cikpenga. N ba cedi ŋan guani ki bali a gangaamu, ki ña u badu jelgu yeni li pamankandikaali. ⁵ A ba guani ki ŋuu a daamɔngu tiidi, Samari juana po; bi kpakpaaba yaaba n ŋuu, ba ŋuu, ki ŋanbi, ki ti yendi yeni mi yanduanma. ⁶ Kelima, li daali kpendi, ke o kuaguudo ba kpaandi ki yedi, 'Fii mani tin gedi Siiyɔn O Diedo ti Tienu kani.' ⁷ Kelima, O Diedo yedi mine, "Yigni mani Jakɔbo po, i pamandanyigni! Yigni mani yeni li pamancianli i nibuoli badciamo po! Cedi mani ban gbadi a donda. Yedi mani, O Diedo faabi O buolu, Israyeli yaaba, ya niba n den sieni.' ⁸ Diidi, N ñani ba nijienu diema po. N ba ñani ba u tinbianu diema nni, ki taani ba. Bi siiga nni, a juama, yeni a diama ye; ya puoba n punbi yeni ya puoba n buudi u maditugikɔnu mo ye bi siiga. Nitaancianli n ba guani nekanba. ⁹ Bani n kpendi ki buudi yeni; N ciandi ba yeni i baagi. N gobdi ba bi sancenli nni mi ñima n puubi naani, u sansieru po. Bi kan tuudi libakuli, kelima Mini n tie Israyeli báa, Efrayima n tie n bijakpelo." ¹⁰ I nibuoli, yin cengi mani O Diedo ñɔmaama. Kpaandi mani ki yadi li maama hali i kpenkuni yeni fagma kpendega po. Yinba i nibuoli, yin yedi, 'Yua n den yayadi Israyeli buolu gɔa ki taandi ba, ki gobdi ba nani o yankpaalo ń gobdi o yandi maama yeni.' ¹¹ Kelima O Diedo daafaabi Jakɔbo, ki faabi o yaaba n den paa ki cie o nui nni. ¹² Lanwani ii, bi ba guani ki waani bi pamancianli Siyɔn juaciama po. Bi nunmu baa ñilgi, ki tuudi, kelima O Diedo ń ba puni ba ya piama kuli po, kpanu bima yeni mi daapaanma, mi kpapaanma yeni i yankuli, ti yanbidi yeni a yangbenga kuli. Kelima, bi yema baa tie nani ban jɔgi ya kpinkpaabu yeni i, ke jiwaandi yeni yanyagdiba kuli ji kan mabni ba. ¹³ Lanwani ii, bi jafanba ba jeli yeni li pamanli, ki cedi bi jawaba yeni a nikpela ń taani. Kelima, N ba lebdi bi pabɔnli, lan kpadi ki tua pamancianli. N ba jie bipo mi niñima, ki cedi ban sundi bi falabiado, ki tieni u badu yeni li pamankandikaali. ¹⁴ N ba guoni salga yidkaaba yeni mi nankpama. N buolu yaaba ba baa mi piama, lan dagdi ba. O Diedo n yedi yeni." ¹⁵ O Diedo yedi ya maama ne: "Bi gbia u nialu Rama dogu nni, li bubuuli yeni i kuumoe. Racihali n buudi o bila kumoe. O yie i baagi kuli, kelima, li bila ji ki pia miali." ¹⁶ O Diedo yedi mine, "Jiini a nialu, ki ŋa li bubuuli, ki fiadi a ninsiidi; kelima, a fala yeni a tuona ba baa i pani; a bila ba ba ña yibalinba diema nni ki guani ki kpeni. O Diedo ñɔbonli n yeni. ¹⁷ Li dandanli ye apo saala po; a puolŋuani ba puodi li kpaali, ki guani bi diema nni. O Diedo ñɔbonli n yeni." ¹⁸ N gbia ke Efrayima buudi ki fabni, ki tua, 'A dadi n tubli yeni fala, a tundi nni fala tundi nani ban ki maani ya naatonga tuonli yeni. Cedi tin guani, ti ba guani, kelima Fini O Diedo n tie ti Tienu. ¹⁹ Ti den yaadi ki ŋa a, ama, mɔla wani ii, ti biidi ti pala, ki mia ŋa sugli. A tundi ti, ke ti bandi ti tagli. Ti pua ti bena, kelima i fee po, tin den tieni ya tagli ti panma nni.' ²⁰ Efrayima ka tie n bibuadga aa? Wani ka tie n pali ń mani ya bijabuadga po oo? Kelima, bayeni min yedi o yaali n bia kuli, N nan da li tiani opo yeni n buama kuli. Yeni ke mi niñima cuo nni opo. N li bua o yeni i mɔmɔni i. O Diedo ñɔbonli n yeni." ²¹ Tieni a sanu po mi maalma banma, ki da tudi. ŋan fangi a yuli ŋan cuoni a sanu po maama. Fuoni a yama ŋan cuoni ya sansieru po, ki bandi ŋan baa cuoni maama. N cikpenga Israyeli, guani ki kpeni na! Guani ki kpeni ŋan yeni ya dociami nni. ²² Hali yeni u laayognu i ke a baa waa ki puagi yeni mi conconma aa, N bisalo? Kelima O Diedo tagi bonpaanli ki tinga po. Lani n tie ke o pua ba dagi o ja. ²³ O Diedo, Ki pia gbenma, Israyeli Tienu yedi ya maama ne, "N ya guani ki kpeni yeni N buolu o diema nni, ban ba yedi yaali Juda diema nni yeni mi dociami nni n ne, 'O Diedo ń selgi Fini, mi teginma diegi yeni mi gagdiŋanma juali.' ²⁴ Kelima lankani i, ke Juda yeni o dociami niba yeni bi kpaakuola yeni bi yankpaala yeni bi yankuli kuli ba taani ki ya ye. ²⁵ Kelima n ba paagi yaaba cɔgi pala, ki teni ba mi ñima, ban ñu, ki pugni yaaba n tadgi mo, mi tuama." ²⁶ N den ti findi mi guamanma yognu i. ²⁷ Diidi mani, a dana kpendi, N ba lingi i nibuoli yeni i yanbuoli, ki buli Israyeli yeni Juda diema diedi nni; O Diedo ñɔbonli n yeni. ²⁸ Yognuba, N den kpaagi ba, ki ŋabi ba, ki bua ki mudi ba, ki bolini ba, ki tieni ba yaali n bia boncianla. Ama, ya dana n kpendi, N ba puni ba ki nunmanga, ki guani ki ŋuu ba, ki maa ki sieni ba, ki tieni li ŋanbli bipo; O Diedo ñɔbonli n yeni. ²⁹ Lanya dana nni, obakuli ji kan yedi, 'Bibaanba ŋmani a sankaaba ke a bila ñina suodi.' ³⁰ Kelima yuakuli ji ba kpe o tagli po i; yua n ŋmani o sankaaba, o ya ñina n baa suodi. ³¹ Diidi mani, a dana kpendi, ke N ba guani ki loli ŋantaadipaano yeni Israyeli diegu yeni Juda diegu; O Diedo ñɔbonli n yeni. ³² Li kan ya tie nani min den loli ya ŋantaado yeni bi yaajanba ka, Min den cuo bi nuu, ki ñani ba Ejipti diema nni, Li dana nni i, ke bi den fidi ki lodi li ŋantaado, yeni lankuli, Mini n li tie bi canbaa; O Diedo n yedi yeni. ³³ O Diedo ń yedi ya ñɔbonli n ne, Li dana nni, Min ba guani ki loli ya ŋantaado yeni Israyeli diegu n ne: N ba diani ki tabni li ŋantaado bi pala nni yeni bi yantiana nni, kelima N baa tie bi Tienu, ke bimo tie N buolu. ³⁴ Lanwani ii, niloba kuli ji kan waani o kuantaliolo, bii o kpiilo ki yedi, 'ŋan bandi O Diedo bonŋanla! Kelima bikuli, ki cili yua n waa ki cie, ki ban juodi yua n yabi ki cie, bikuli baa bani nni; kelima, n ba di sugli tagli po, ki sundi bi tuonbiadi po O Diedo ñɔbonli n yeni." ³⁵ O Diedo yedi ya maama ne; Mini O Diedo, yua n cedi ke u yienu ñigdi u yensiinu, ki cedi ke o ŋmaalo yeni a ŋmaabila yendi ku ñiagu. Mini n go bili mi ñincianma yeni mi ñingola ki puni a mi jama. N yeli n tie O Diedo, U Paaciamu kuli daano. O Diedo yedi ya maama ne, ³⁶ Ya daali ke min tagi yaali kuli ba lebdi, kaa ji ye n nuu nni, yeni, landaali ke Israyeli yeni o puolŋuani kuli kan ya ji tie n buolu, ki ye n nintuali hali yeni ya yognu kuli." ³⁷ O Diedo yedi ya maama ne, "Bi ya fidi ki bigni titalwadi ń kpedi ki yabi maama, ki go fidi bandi ki tinga tanpuuli ń tie maama, lanwani ii, nmo ba ña Israyeli yeni o puolŋuani maama nni cain, kelima ban tieni yaali kuli po; O Diedo ñɔbonli n yeni." ³⁸ O Diedo ń yedi ya maama n ne, Diidi mani, a dana kpendi, ke N ba guani ki maa Jerusalema dociamu mini O Diedo po, ki cili hali Hananeeli diefagdili, ki ban gedi hali mi logdima bulñɔbu kani. ³⁹ Bi ba guani ki bigni u dogu banlu, nintuali po, ki gedi Garebi juaga po, ki pegdi ki teli Gowati po. ⁴⁰ Bi ba bigni ki taani bi tinkpiba yeni mi fantanpienma jualɔngu, ki ya caa hali Kidironi jualɔngu po, ki ban taani yeni mi logma, i taama bulñɔbu po, bi ba gagdi ki ŋanbi lan ya tinfanma kuli, O Diedo po. Bi ji kan tudi ki lu, ki pua ki mudi u dogu, ki buali ban bolini u hali ya yognu ń tuu ya yognu kuli."