¹ O Diedo den maadi yeni Jeremi ya maama ne, ki yedi, ² "O Diedo, Israyeli Tienu n yedi a, 'Diani min ba waani a ya maama kuli tili nni. ³ Kelima, diidi, a dan kpendi, O Diedo ñɔmaama n yeni; lanyugnu, N ba guani yeni N buolu, Israyeli yeni Juda kuli ŋalmani. Mini, O Diedo n yedi yeni. Kelima N ba guani yeni ba Min den puni bi yaajanba ya diema nni yeni, ban kali ki diedi ma.'" ⁴ O Diedo ń yedi ya maama, ke mi nua Israyeli yeni Juda n yeni, ⁵ " O Diedo yedi ya maama ne, 'Min gbia ya fuugu yeni naa tie yanduanma fuugu ka, ama jawaanciandi fuugu i. ⁶ Buali mani ki diidi o ja ya ba fidi ki mali biga. Be nan cedi ke n nua bi jawaaba, ke bi ñii bi ciamu, nani ya pua n bua mali yeni ii? Be nan cedi ke bikuli ŋmidi bi nunmu, nani bi yia yeni ii? ⁷ Sola yeni li daali fala! Kelima landaali kan ya pia li lieli. Li baa tie Jakɔbo buolu po jawaanciandi i, ama, o ba baa mi faabma. ⁸ O Diedo, U Paaciamu kuli daano ñɔbonli n ne: Kelima landaali i ke N ba cie bi tuli nni ban laa ya yonbipiana, ki ŋabi ban loli yi yeni ya kpaadi, lanwani ii, nicanba ji kan ya kubi yi ti yonbidi. ⁹ Ama, bi baa ŋua ki pugi O Diedo bi Tienu, ki tuuni o badciamo Dafiidi po, Min ba kaani yua ti gbandi po bipo. ¹⁰ Lanwani ii, fini n naaciemo Jakɔbo, da jie libakuli; ŋan go da yagni a yama, Israyeli. Kelima, diidi, N ba ñani yinba yeni i puolŋuani, yin ye naapo, ti yonbidi yeni guani yeni yi, i diema nni. Jakɔbo ba guani o diema nni, ki ya ye yeni mi yanduanma, O baa ye li yanŋaali nni, jawaandi n ki ye naani. ¹¹ O Diedo ñɔbonli ne: Kelima N ye yeni yi, ki ba faabi yi. N ba yuandi ki bolini min den yayadi yi ke i gedi ya nibuoli nni, ama, N kan bolini yinba wani. Nani min den teni a i tundi yeni, n ba wani a fala, nani lan buali maama yeni. N ka fidi ki ŋa fini nani yua n ki pia tagliba kuli yeni.' ¹² Kelima, O Diedo yedi ya maama ne, 'A yiagu ki pia gbenma; a nala kua ti jɔgindi, ki kɔni boncianla. ¹³ Obakuli kan fidi ki tua a candanbaalo, ki buu a nala; tebguba kuli ki ye, ki ba tebi a yiagu. ¹⁴ A jaconcona kuli sundi apo o. Bi ji kan nagni a mɔno, ki buali ban diidi a nunga nni, Kelima, N pua ki duoli a nani n yibali yeni i, ki tundi a mi biadma tindi, kelima a tuonbiadi yeni a tagli yii n yabi kaa pia cɔli yeni po. ¹⁵ Be yapo i, ke kuudi ki miadi mi todma, ban pua ki duoldi a ya yognu uu? A yianu ki pia tebgu. Kelima a tuonbiadi yeni a tagli yia n ki pia cɔli yeni po, lani n cedi ke n tieni a yeni. ¹⁶ Lanwani ii, yaaba n dini a yeni, bi ba di bimo, a yibalinba kuli ba gedi ti yonbidi. Kelima, yaaba n doli a piama, ke mi tua tifagikaadi yeni, bi ba fagi bimo ya piama, bi ba pua ki mudi yaaba n pua ki mudi yi yeni mo. ¹⁷ Kelima N ba baa ku tebgu ipo; N ba tebi a nala kuli; O Diedo ñɔbonli n yeni. N ba tieni a yeni, kelima, bi tua: Siyɔn ji ki pia fuomaba kuli, obakuli ji ki yagni o yama Siyɔn po.'" ¹⁸ O Diedo yedi ya maama ne, "Diidi, N ba jie mi niñima, ki guani yeni Jakɔbo ŋalmani o diedi nni. Bi ba guani ki maa dociamu a diegbana po, Ya dociamu n pia a bilinguonpaana ba guani ki sedi wun den see naani. ¹⁹ I pamandayani a donda yeni i lanlaayieni yani ba fii ki loli li dogu nni, Kelima, n ba cedi ban mali ki pɔli ki pugni, N kan cedi ban wadi. N ba selni ba maama ke obakuli kan yagi bi yama. ²⁰ Bi nitaanli ba guani ki ya tie nani ban den tie maama yeni i. Bi nitaanli ba guani ki taani n nintuali nani kpiama yeni i. N fii ki sedi, ki mɔndi n nuni yaaba n wangi ba fala yeni po. ²¹ Bi yudanba ba ña bi nitaanli nni i. O ba fii bi siiga nni i, min dadi o, wan nagni n kani. N ya ki tieni yeni, ŋma ba paagi o pali, ki nagni n kani ii? O Diedo ñɔbonli n yeni. ²² Lanwani ii, i baa tie n buolu, ke nmo tie i Tienu. ²³ Diidi, O Diedo taafaaciangu n fuu yeni, O pabiencianli n yeni. Li taafaaciangu n fuu, ki yiini bi nibiadiba yula po yeni. ²⁴ O Diedo pabiencianli kan sɔngi, kase ke wan jagi ke o ba tieni yaali o pali nni tieni ki tii. Li daajuodkaali, i ba bandi lan bua yedi yaali kuli."