¹ Diidi Jeremi, o sawalpualo ń den diani ya tili Jerusalema, ki teni ya nikpelba n den sieni, ki ye i yonbi siiga, yeni salga yidkaaba, bi sawalpuaba yeni Nabukanesaari ń den cuo yaaba ki gedi yeni ba ti yonbidi Babiloni po. ² Li yigu, li den sua ke o bado Josiekini, o bado naá, yeni Juda yeni Jerusalema yudanba yeni bi yikodanba yeni a tuonsɔnbanda yeni ku badidiegu tuonsɔnba kuli, bi den ñani bikuli Jerusalema. ³ O den mubni li tili Safani bijua Eleyasa nuu nni i ke o gedi yeni Hilikiya bijua Gemariya, o bado Sedesiasi ń den sɔni yaaba Babiloni bado Nabukanesaari kani. ⁴ Li tisɔnkaali yeni den yedi ya maama ne i, "O Diedo U paaciamu kuli daano, Israyeli Tienu yedi wan cedi ki bi ñani yaaba kuli J gerusalema, ki gedi yeni ba ti yonbidi, Babiloni po yeni, ⁵ 'Yin maa ti diedi, ki kua. Yin tieni ti gɔgiditi, ki ŋuu i tiiluonkaadi, ki ya mua li luana. ⁶ Yin kuani bi puoba, ki mali a bila, i bijaba yeni i bisiaba, ki taa bi puoba, i bijaba ń kuani ba, ki puni i bisiaaba, bi ciaba ń kuani ba. Ban mali bi bijaba yeni bi bisiaba i nibima ń tandi, yin ya yabi. ⁷ Yin ya lingi mi yanduanma min gedi yeni yi ti yonbidi ya dogu nni yeni. Yin ya jaandi, ki miadi nni mi yanduanma, kelima, u dogu yanduanma tie i mo ya yanduanma i.' ⁸ Kelima O Diedo, u paaciamu kuli daano, Israyeli Tienu yedi mine, 'Da cedi mani ya sawalpuaba yeni ya tanbipuala n ye i siiga nni yeni ń bɔndi yi, ki kuani yi mi tudma nni, yin da daani bá yinba iba ya dangdi nni. ⁹ Kelima li tie ipo tofaama sawali i, n yeli po. Mini ka sɔni ba; O Diedo ñɔbonli n yeni.' ¹⁰ O Diedo go yedi mine, 'Babiloni ya diedi yi bina piilele, N ba todi yi, ki tii min den niani yi ya ñɔnianu, ki guani yeni yi idiema nni. ¹¹ Kelima, Mini mɔno bani min bobni bonli kuli maama ipo; Min bobni yaali tie mi yanduanma i, laa tie fala yeni yebiadma ka, ke lan teni yi saala po dandanli. ¹² Lanwani ii, i ya taagi n yeli, ki miadi nni nmo ba cengi yi, ki jiini yi i miabu. ¹³ Kelima, yinba n ba lingi nni, ki la nni, li ya tie ke i lingi nni yeni i pali kuli. ¹⁴ Lanwani ii, N ba cedi yin la nni; O Diedo ñɔbonli n yeni. N ba guani yeni i ŋalmani kuli; N ba ñani min den yayadi yi ya nibuoli siiga; kelima N ba guani yeni yi, yin den ya naakani ke n yayadi yi, ki gedi yeni yi ti yonbidi yeni.' ¹⁵ Nani yin kpaagi ki tua ke O Diedo cedi ke i baa bi sawalpuaba i siiga nni Babiloni dugu nni yeni, ¹⁶ O Diedo yedi o bado yua n kaa Dafiidi gbandi po yeni ya niba n ye u dogu nni, kaa gedi ti yonbidi yeni, ya maama ne. ¹⁷ O Diedo, ki pia gbenma Tienu yedi mine, Fangi mani i yula, N ba jiini bu tɔbu, mi koma yeni u yianbiigu bi po. Kelima N ba tieni ba nani ya kankana n bedi, ki biidi, kaa ji pia ŋmanma yeni i. ¹⁸ N ba fii bipo yeni bu tɔbu, mi koma yeni u yianbiipuodkou, ki cedi ban tua ti jawaanciandi bonli, ki tinga diema nni kuli po, bi ba tua ti solindi bonli, ti laadi yeni li ñuali bonli, yeni ya fee n ki pia sundma min yayadi ba ya nibuoli kuli siiga. ¹⁹ Kelima baa cengi N maama. O Diedo ñɔmaama n yeni; li ya dagdi min sɔni n naacenba bi sawalpuaba hali yognu kuli, kaa cedi, ama lankuli, bi yie kaa diadi bi tuba ki ba cengi n maama; O Diedo n yedi yeni.' ²⁰ Lanwani ii, yinba, min ñani yaaba Jerusalema, ki sɔni ba Babiloni, ti yonbidi yeni, yin cengi O Diedo maama, ²¹ O Diedo, U Paaciamu kuli daano, Israyeli Tienu yedi ya maama ne, ke mi nua Kolayia bijua, Ahabi yeni Maseyia bijua, Sedekia, bani yaaba n pua ipo mi tofaama sawali mini O Diedo yeli po yeni, N ba taa ba, ki tieni Babiloni bado Nabukanesaari nui nni, o ba kpa ba i nunbu nni i. ²² Lani ya pendi, ya niba n ñani Juda diema nni, ki ye ti yonbidi nni Babiloni dogu nni, baa taagi bi yela i, ki solni. Bi baa solni ki tua, O Diedo ń biani a fanma, ki tieni a nani wan den cedi ke bi juu Sedekiya yeni Ahabi, ke bi buodi u mu nni maama yeni. ²³ Li ba tieni yeni, kelima ban den tieni ya fee, yeni ya tuongunda Israyeli diema nni, ki dua yeni bi kuantalieba denpuoba, ki pua mi tofaama mini O Diedo yeli po, min den ki puogi ba ke ban tieni yaali, ki go yedi yaali yeni. Kelima Mini n bani bonli kuli; N tie bi tuobiadi po kuli kasiedi. O Diedo ñɔbonli n yeni.'" ²⁴ O Diedo, ki pia gbenma, Israyeli Tienu den puogi Jeremi, o sawalpualo ke wan yedi Nehelami yua, Cemayia, ya maama ne, ²⁵ 'Kelima, a diani a tila, a yuceli po, ki teni Jerusalema nitaanli kuli po, ki teni Maseyia bijua, Sefaniya, salga yidka, ki go teni salga yidkaaba kuli, ki yedi, ²⁶ "O Diedo n gandi a ke ŋan tua salga yidka, ki ga Jehoyiada, yua tie salga yidka kaanu, ke ŋan ya guu O Diedo diegu. Ke yaaba n yi bi yula sawalpuaba, li buali ke ŋan cuo ba ki kpaa ba a kpaada, ki lani ba a yonbipiana. ²⁷ To mɔla, be n nan cedi ke a ki jalgi Anatoti jua Jeremi, yua n yedi ke o tie sawalpualo, ki niagi yeni a aa? ²⁸ Kelima o diani li tili, ki sɔni ki teni ti Babiloni po, ki yedi, 'Yin ya bani ke i ba waagi ki ye lipo. Maa mani a diena lipo, ki kua, ki buli i kpintiidi yeni ti tiiluonkaadi, ki ya mua li luana."" ²⁹ Sefaniya, o sawalpualo den cogi li tili, o sawalpualo Jeremi nintuali i. ³⁰ Lani ń pendi, O Diedo den maadi yeni Jeremi ki yedi, ³¹ "sɔni u tondu, ban yedi yaaba n gedi ti yonbidi Babiloni po, ki yedi ba mine, 'O Diedo yedi ya maama ne, ke mi nua Nehalami jua Cemiyia: Nani Cemayia ń pua sawali ipo, ke mini ka sɔni o yeni, ke o pua yi mi tofaama, ki kuani yi mi tudma nni yeni, ³² Lanya po i, ke O Diedo yedi ya maama ne: Diidi, N ba dadi Nehelami jua, Cemayia yeni o puolŋuani tuba. Bi siiga nni, obakuli kan ya ye li nitaanli siiga. O kan la min ba tieni N buolu po ya ŋanma, kelima, o fiini mi yenyiema O Diedo po. O Diedo ñɔbonli n yeni.'"