¹ Jerubi Baali bijua, Abimeleki, den gedi o yiatiegu, Cecemi, ki yedi o yiatieba yeni o naá diegu nni yaaba yeni bi cugli nni yaaba kuli, ² "N mia yi ke yin maadi ya maama ne, Cecemi yudanba ń gbadi, 'Be n ŋani ipo ki cie: Jerbi Baali bijaba piilele yeni ń diedi yi bii, niyendo baba ń diedi yi i?' Yin ya tiani ke mini n tie i kpaba yeni i gbannandi." ³ O naá naataani den maadi o maama Cecemi yudanba kani, ke bi tuo ke bi ba taani Abimeleki po i, kelima bi den yedi, "O tie ti kpiilo i." ⁴ Bi den taa Baali Bereti dieli nni ligdibala piilele, ki teni o. Abimeleki den taa lanya ligi i, ki puogi a puapuaga yeni ti niyuoyuodi, ke bi ŋua o. ⁵ Abimeleki den gedi o baadiegu Ofrahi, ki kpaa o yuatieba, bonba piilele yeni, Jerubi Baali bijaba, tanyengu po. Jotami, Jerubi Baali sanbiani baba n den fidi ki ciadi, kelima o den sani ki wuoni. ⁶ Cecemi yeni Beti Millo yudanba kuli den taani ki gedi bu tiicianbu kani, kaa fagi yeni Cecemi tangu kani, ki dini Abimeleki li bali. ⁷ Jotami ń gbadi li maama, ke o gedi, ki doni Gerisimi juali po. O den kpaandi ki yedi li dogu yaaba, "Cengi mani nni, yinba Cecemi yudanba, lani n tie U Tienu mo ń cengi yi. ⁸ Dayenli, i tiidi den ñani ki bua dini ya bado n baa die ba. Bi den yedi Olifie tibu, 'Ya tie ti bado'. ⁹ Ama Olifie tibu den yedi yi, 'N ba ga ledi i, ki ŋa n kpama, ban kubi yaama ki kpiagdi U Tienu yeli, yeni bi nisaalba, ki nan guani ki lebdi ki ban ya die ya tiidi n sieni ii?' ¹⁰ I tiidi den yedi bu kankanbu, 'Cua na ki tua ti bado, ki ya die ti.' ¹¹ Bu kankanbu den yedi yi, 'N ba tieni ledi i, ki ŋa n malgu, yeni n luanŋana, ke n bua min guani ki ya die ya tiidi n sieni?' ¹² I tiidi den yedi ku daamɔgu tiiga, 'Cua na ki diedi ti.' ¹³ Ku daamɔngu tiiga den yedi yi, 'N ba ga ledi i, ki ŋa n daamɔnpaanma, yaama n mangdi i buli yeni bi nisaalba pala, ki guani ki lebdi ki ya die ya tiidi n sieni i? ¹⁴ Lanwani ii i tiidi kuli den taani ki yedi ku konkongu, 'Cuana ki tua ti yudaano.' ¹⁵ Ku konkongu den yedi i tiidi, 'I ya bua yin dini nni li bali, yeni li yantiaŋanli, yin cua ki wuoni n sɔngu, lanyaaka, u mu ba ña n kani i, ki gedi ki di ki buodi Liban Sedili tiimɔnbu.' ¹⁶ Lanwani ii, yin tieni yaali ya ŋani lan buali maama, yin dini Abimeleki li bali yeni, i tieni yaali n ŋani Jerubi Baali yeni o diegu po, lan buali maama n yeni, lani n cedi ke i dadi bi tuba lanbuali maama n yeni. ¹⁷ Ti ya maali n báa ń luni o miali maama, ki kɔni ipo ki faabi yi i yibalinba Madiani yaaba nui nni. ¹⁸ Ama dinne, i fii ki sedi n báa diegu po, ki kpaa o bijaba piilele kuli, tanyengu po. Lani ń pendi, ke i dini o potuado bijua, Abimeleki li bali, ke o ba diedi Cecemi udanba, kelima o tie i kpiilo. ¹⁹ Li ya tie ke yin tieni Jerubi Baali yeni o diegu maama ya tie yeni yantiaŋanli, Abimeleki ń mangi i pala yeni i yema, imo ń mangi o pali yeni o yema. ²⁰ Ama, li ya ki tie yeni, u mu ba ña Abimeleki kani, ki juu, ki buodi Cecemi yeni Beti Millo yaaba. U mu ba ña Cecemi yeni Beti Millo kani, ki juu ki buodi Abimeleki." ²¹ Jotami den sani ki yaadi ki gedi Beeri. O den ye lankani i, kelima li den fagi yeni o kpelo Abimeleki. ²² Abimeleki den diedi Israyeli, bina taa i. ²³ U Tienu den sɔni u maalbiigu Abimeleki yeni Cecemi yaaba yudanba siiga. Cecemi yaaba yudanba den lindi Abimeleki puoli, ki fiini mi yiema opo. ²⁴ U Tienu den tieni yeni ki bua tuu Jerubi Baali bijaba piilele yeni kuuma panli i. Ke bi ninjua Abimeleki n nan den bobni li kuuma, ki dini li panli, ke Cecemi yaaba mo pia i tagli kelima, bani nden todi o ke o kpaa o ninjaba. ²⁵ Lanwani ii, Cecemi yudanba den wuoni bi sanjiaba, ke ban yi duani ki guudi li juali sanu po, ki ya jiagi, ki pua ki fenli a sanpenda ń tugi yaali li sanu po. Bi den togdi Abimeleki li maama. ²⁶ Ebedi bijua Gaali den cua Cecemi, o kpiiba kani, ke bi waa udogu nni. Cecemi yudanba den waani bi dudugdi Gaali po. ²⁷ Bi den gedi u kuanu po, ki ban taagi ku daamɔntiidi luana, ke bi ba ŋmiani ki ñani ku daamɔngu. Bi den bobni u badu, ki kua bi bulo dieli nni, ki dini, ki ñuni, ki guo, ki soli Abimeleki. ²⁸ Ebedi bijua Gaali den yedi, "Abimeleki tie ŋma i, Cecemi ne, ti tie o laa nibuolu i, ke o baa die ti ii? O ki tie Jerubi Baali bijua ka aa? Sebuli ka tie yua n gobdi u dogu uu? Tin ya ŋua Hamori, wani n cili ki diedi Cecemi dogu! Be n cedi ke ti baa ŋua Abimeleki? ²⁹ N bi sugni ke mini ń ya gobdi ya nitaanli ne! Mini n bi ba yaani Abimeleki. N bi ba kpaandi ki yedi Abimeleki, "Taani a tɔgoli, yin tuogi nni.'" ³⁰ Sebuli, u dogu gobdika ń gbadi Ebedi bijua, Gaali maama, ke o pali beni. ³¹ O den sɔni u tondu, ke bi maadi Abimeleki, "Diidi, Ebedi bijua Gaali yeni o kpiiba cua Cecemi nni ne, ki tigi u dogu nni yaaba ke ban fiini mi yiema apo. ³² ŋan fii ku ñiagu, fini yeni ya jakɔnda n ye yeni a, ki cua ki wuoni ti kpaandi nni. ³³ ku siŋaagu nni, u yienu ya pudi, yin pibni, ki cebni u dogu. Gaali yeni o niba ya fii ki ba tuogi yi, yin sɔni ba yin bani maama." ³⁴ Lanwani ii, Abimeleki den fii ñiagu, wani yeni o jakɔnda, ki bɔgdi caga na, ki gedi ki wuoni ki ba baa Cecemi dogu. ³⁵ Ebedi bijua Gaali den ñani, ki see u dogu bilinguonli bulñɔbu kani. Abimeleki yeni o jakɔnda den ñani bi wuonkaanu, ki sedi. ³⁶ Gaali ń la li niba, ke o yedi Sebuli, "Diidi, bi niba ñani li juali yuli po, ki jii!" Sebuli den jiini o, "Anua li juali junjungu i, ki tua ke li tie niba." 7 Gaali go den yedi, "Diidi, niba n ñani u dogu siiga juali po, ki jii, ke cagyenli tɔgni bi jabaaba tibu sanu ki mo kpendi. ³⁸ Lanwani ii, Sebuli den yedi o, "A japaamaama yeni ji ye le i, fini ka den yedi, Abimeleki tie ŋma i, ke ti baa ŋua o oo? ŋan den fali ya niba yeni ka kpendi ne ee? Ji ña ki tuogi ba, bu tɔbu." ³⁹ Gaali den ñani ki ga Cecemi yaaba liiga ki ba tuogi Abimeleki. ⁴⁰ Abimeleki den deli o ke o sani. Bi den pua ki duoli bi niba boncianla, ke bi baa baa, ki bili ki ban pundi hali u dociamu bilinguonli bulñɔbu kani. ⁴¹ Abimeleki den ban sedi Aruma dogu nni. Sebuli den deli ki yaani Gali yeni o kpiiba ki ñani ba Cecemi dogu nni. ⁴² Lan den fiifaa, Cecemi yaaba den bobindi ki caa i kuani nni, ke bi waani Abimeleki. ⁴³ O den taa o jakɔnda, ki bɔgdi ba caga taa, ke bi wuoni i kuani nni, ki ba ludi ki baa. O den diidi ki sua ke bi niba ña u dogu nni, ke o tuogi ba ki pua ki kpaa ba. ⁴⁴ Abimeleki yeni o ya cagli den gedi ki pigni u dogu bilinguonli bulñɔna. Ya caglieda n sieni den gedi ki tuogi yaaba n den ye i kuani nni, ki kpaa ba. ⁴⁵ Li daali, Abimeleki den ye li kɔnli nni yeni u dogu yaaba. O den paadi li dogu, ki kpaa u niba. O den pua ki guli a bilinguona, ki papagi mi yaama likani tinga po. ⁴⁶ Cecemi diefagdili yudanba ń den gbadi li laabaali, bi den sani ki kua bi bulo Eli Beriti dieli nni. ⁴⁷ Bi den waani Abimeleki ke bi yudanba kuli sani ki kua Cecemi diefagdili nni. ⁴⁸ Abimeleki den doni Salmoni juali po, wani yeni o jakɔnda. Abimeleki den cua tibenli, ki bugi, ki puogi yaaba n yegi yeni o, "Yin la ke n tieni yaali ne, imo ń tieni, nani min tieni maama yeni." ⁴⁹ Lanwani ii, bi mo den cua yuakuli tibenli, ki bugi ki ŋɔdi Abimeleki. Bi den bili li tibena ki tabni li diefagdili guona, ki juu, lanwani ii, yaaba n den ye Cecemi diefagdili nni kuli den kpe, li jaba yeni li puoba den pundi niba tudli (1.000). ⁵⁰ Abimeleki den yuadi ki gedi Tebesi, o lindi ki cebni li dogu, ki paadi u. ⁵¹ Ama, diefagdipaali den ye li dogu nni, bi jaba, bi poba yeni li dogu yudanba kuli den sani ki kua li diefagdili nni, ki luoni, ki doni ki ye poli po. ⁵² Abimeleki den nagni li diefagdili kani, ki pundi li bulñɔbu kani, ki bua juu li. ⁵³ Ama, pua den luni nanbindu ke li mabi Abimeleki yuli ki mudi. ⁵⁴ Ke o tiani tontoni ki yini ya jawaalo n kubi o tɔtiadi, ki yedi o, "Nɔdi a jugsiega, ki dudi nni, ban da ti yedi, ' Pua n kpaa o.'" Lanwani ii, o jawaalo yeni n den muu o, ke o kpe. ⁵⁵ Israyeli yaaba ń la ke Abimeleki kpe, ke bi guani ki kuni bidenpo. ⁵⁶ Lanwani ii, U Tienu den tuu Abimeleki ń den sɔni o báa po ya tuonbiadi, ki kpaa o ninjaba piilele yeni panli. ⁵⁷ U Tuenu den cedi ke Cecemi yaaba tuonbiadi tagli guani ki doni bu yula po, nani Jerubi Baali bijua Jotami ń den soli ba maama yeni.