¹ Efrayima buolu yaaba den yedi Jedeyɔn, "Be cedi ke a tieni ti lani i? ŋan caa ki bapigni Madiani yaaba, a nan den ki yini ti." Ki bieni bi pali opo, ki fuu yeni o. ² Jedeyɔn den jiini ba, "Min tieni yaali yeni yin tieni yaali, lile n cie lilieli? Efrayima yaaba ń liegi yaali ki cie Abiyeseri yaaba cie ya bonluonkaali ii? ³ U Tienu ki cedi ke yinba ka cuo Madiani badijaliediba aa; Orebi yeni Seebi ! Tinba tieni be ya tuonli i, ke li cie i ya tuonli ii? Wan den jiini ba yeni, bi pala den sɔngi. ⁴ Jedeyɔn den pundi Jurden kpenu kani, ki puodi u, wani yeni o jakɔnda kobiitaa yeni. Bi den cɔgi boncianla, ama, bi nan den li ŋua ki deli ba i. ⁵ O den yedi Sukɔti yaaba, "N mia yi ke yin baa kpanu ki teni ya jakɔnda n yegi yeni nni ne, kelima bi cɔgi boncianla, ke ti nan ŋua ki deli Madiani badtieba Sebiha yeni Salmuna i." ⁶ Ke likani yudanba yedi, "Sebiha yeni Salmuna ji ye i nui nni na aa? Be n ba cedi tin teni a tɔgoli mi jiema?" ⁷ Jedeyɔn den yedi, "O Diedo ya cedi ke ti cuo Sebiha yeni Salmuna, n ba pua ki duoli i gbanu yeni mi fanpienma nni konkoni yeni mi kongɔba i." ⁸ O den ñani likani, ki gedi Pnuweli, ki maadi likani mo ya niba yeni i, ama Penuweli yaaba mo den jiini o nani Sukɔti yaaba ń den jiini o maama yeni i. ⁹ O den jiini Penuweli yaaba mo ki yedi ba, "N ya guani ki pendi ne yeni mi yanduanma, n ba pua ki mudi i diefagdili yaali n kpedi ne." ¹⁰ Sebiha yeni Salmuna den ye Karkɔri dogu nni yeni bi tɔgoli, nani niba piiga n tuda mu yeni (15.000), yaaba n den sieni puoli yaaba tɔgoli kuli siiga, kelima, bi den kpaa niba tuda kobga n tuda piilie (120.000), ban den bangi ya jakɔnda, ki jugsiega tɔbu nunfanbu. ¹¹ Jedeyɔn den tɔgni Noba yeni Jogbeha jondi yaaba ń tɔgi ya sanu i, ki ban pundi ki ludi o yibalinba tɔgoli, ke bi kaa mi yanduanma nni, kaa bani tɔbu po. ¹² Sebiha yeni Salmuna den sani, nani Jedeyɔn den ŋua ki deli ba yeni, o den ban cuo li Madiani badliedba, Sbiha yeni Salmuna, ki pua ki yadi bi tɔgoli. ¹³ Jowasi bijua, Jedeyɔn den ñani bu tɔbu, ki guani ki kuni, ki tɔgni Heresi juali sanu. ¹⁴ O den cendi Sukɔti jawaalo, ki buali o, ki cedi ke o dugni ba Sukɔti yikodanba yeni bi yudanba piilele n bilele yela. ¹⁵ Jedeyɔn den guani Sukɔti niba kani, ki yedi ba, "Diidi mani Sabiha yeni Salmuna, yin den sugi nni yaaba ya po ki tua, 'A fidi ki cuo Sebiha yeni Salmuna na aa? ke ti ba teni a tɔgoli mi jiema aa.'" ¹⁶ Jedeyɔn den gandi Sukɔti yikodanba yeni bi yudanba, ki pua ba yeni mi fanpienma nni konkoni yeni mi kongɔba finfinba, hali ki duoli bi gbanu boncianla. ¹⁷ O den yuadi ki pua ki mudi Penuweli diefagdili yaali n kpedi yeni, ki kpaa li dociamu nni niba. ¹⁸ Jedeyɔn den yedi Sebiha yeni Salmuna, "Yin den kpaa ya niba Tabori yeni, den naani ledi i?" Bi den jiini o, "Bi den tie nani ŋan tie maama yeni i. Yuakuli, bi siiga den tie nani badbija yeni i." ¹⁹ Jedeyɔn den yedi, "Bi den tie n ninjaba i, n naabijaba. Ban den tie O Diedo ya miana yeni, i den ya ŋa ba yeni bi miana, nmo bi kan kpa yi." ²⁰ O den yedi o bijakpelo Jeteri, "Fii ki kpa ba!" Ama o jawaalo den jie, kaa nɔdi o jugsiega, kelima o dá den waa waamu. ²¹ Lanwani ii, Sebiha yeni Salmuna den yedi, "Fii abá, ki kpa ti! Kelima o nilo ń tie maama, o tuama mo dagdi yeni i." Jedeyɔn den fii, ki kpaa Sebiha yeni Salmuna. O go den jondi ya tila n den juani bi yoyuodi tulu nni. ²² Israyeli yaaba den yedi Jedeyɔn, "ŋan tuo ki tua ti bado. A biga ba kali a gbandi po, omo ya yaabili ń ti kali ti gbandi po, kelima a faabi ti Madiani yaaba nui nni." ²³ Jedeyɔn den yedi ba, "N kan fidi ki tua i bado, n bijua mo kan fidi ki tua i bado. O Diedo n ba tie i bado." ²⁴ Jedeyɔn den yedi ba, "N ba mia yi bonyenli: i siiga, yuakuli ń teni nni o tiafagkaadi nni tublenlenyenli." (Madiani yaaba den tuu wula tutuuda kelima bi den tie Isimayila yaaba i.) ²⁵ Bi den jiini, "Ti pala mani ke ti ba teni a yeni mi yanbuama." Bi den ladi kpalbu, ke yuakuli den taa o tiafagkaadi nni tutuudyenli ki bili bupo. ²⁶ Ban den teni o ya wula tutuuda kpiagu den pundi kilo bona piilie (Kg 20). ki pugni ya tiafagkaadi n tie tutuuda, ti kpalkpiagdi, Madiani badtieba badtiadi yeni bi laani, ki pugni bi yoyuodi tuli nni laani kuli. ²⁷ Jedeyɔn den taa a tutuuda yeni ki tagi bonnannanli, ki seni o dociamu Ofriha nni, ke Israyeli yaaba conbi bi yula ki caa ki pugi li, lan see naani. Lani n den tua diagu, Jedeyɔn yeni o diegu yaaba po. ²⁸ Lanwani ii, Israyeli yaaba den paadi Madiani yaaba hali ke bi ji den ki pia ya papaali n ba duoni bi yula, ki tuogi Israyeli yaaba. Mi diema den ye mi yanduanma nni hali bina piina, Jedeyɔn miali bianu. ²⁹ Jowasi bijua, Jerubi Baali den kuni ki ye o diecegu nni i. ³⁰ Jedeyɔn den pia bijaba piilele, o bimadmu, kelima o den pia bi puoba ke bi yabi. ³¹ O ponanbangu yua n den ye Cecemi mo den mali o bonjaga, ke Jedeyɔn den yini li biga Abimeleki. ³² Jowasi bijua Jedeyɔn den ciandi bonŋanla, ki ti kpe, ke bi piini o Ofriha dogu nni, o báa Jowasi, Abiyeseri cugli nni yua kakuli nni. ³³ Jedeyɔn ń den kpe, Israyeli yaaba tidi den tudi u sanu, ki ŋɔdi, ki pugi Baali buli. Bi den taa Baali Beriti i, ki tieni bi tienu. ³⁴ Israyeli yaaba den sundi ke bi den niani ke bi baa cɔlni O Diedo, bi Tienu, yua n faabi ba bi yibalinba yaaba n kagni ki lindi ba yeni nui nni. ³⁵ Bi den ki cɔlni ban den niani ya ñɔnianu Jerubi Baali, Jedeyɔn diegu po, wan den guani, ke bi tiadi wan ŋanbi Israyeli yaaba po ya ŋanbli kuli po.