¹ Jerubi Baali, Jedeyɔn den yagdi ki fii siŋaapanpangu ki yegi yeni ya niba n den taani ki ba ciani o kuli, ke bi ban caani bi jondi Harodi ñinbuna kani.Madiani yaaba ya jondi den ye bi ya jieni po, kaa fagi yeni Morehi jualɔngu. ² O Diedo den yedi Jedeyɔn, "A tɔtieba yabdi hali boncianla yeni min taa Madiani yaaba ki tieni a nuu nni, liyapo, Israyeli yaaba kan fangi nni, bi ba yedi, 'Ti paaciamu n faabi ti.' ³ Lanwani ii, ŋan kpaandi, yuakuli ń gbadi, ki yedi, 'Yua n bani ke o tie jawaandaano, yua n bani ke o jie kuli, wan ña Gileyadi juali, ti siiga, ki guani ki kuni.'" Lanwani ii, niba tuda piilie n tuda lie den lebdi ku kuni, ki ŋa niba tuda piiga, ke bi ye yeni o. ⁴ O Diedo go den yedi Jedeyɔn, " Bi niba go yabdi ki kandi. Taa ba yin jiidi mi ñima nni, N ba wadi ba lankani i, ki dagni lan buali maama. N ya yedi a yuane dagdi wan yegi yeni a, o ba yegi yeni a; ama, n ya yedi one kan yegi yeni a, o kan yegi yeni a." ⁵ Jedeyɔn den taa bi niba ke bi jiidi mi ñima nni, ke O Diedo yedi o, "ŋan paadi ki sieni yaaba n ñu nani sangbanlo yeni, bibá, yaaba n gbaani ki ñuni mo bibá. ⁶ Niba kobitaa n den yi kabi mi ñima bi nuu nni, ki ya lagdi nani sangbanlo yeni . Yaaba n sieni kuli den gbaani ki ñuni mi ñima. ⁷ O Diedo den yedi Jedeyɔn, "Niba kobitaa yaaba kabi mi ñima bi nuu nni ki ñuni yeni ya po, n ba fidi ki faabi yi, ki taa Madiani yaaba ki tieni a nuu nni." ŋan cedi ya niba n sieni kuli ń guani ki kuni bi denpo." ⁸ Jedeyɔn den taa tɔtieba kobitaa yeni, ki ga yaaba n sieni ki ba guani ki kuni yeni kani bi jiema yeni bi naatuna, ki cabi ba ke bi guani ki kuni bi denpo, ki gedi yeni tɔtieba kobitaa yeni. Madiani yaaba jondi den ye ku jualɔngu nni, ke bimo ye polu po. ⁹ Li ñiagu, ke O Diedo yedi o, " Fii ki kua a yibalinba jondi nni, kelima Mini n ba cedi ŋan kɔni ki paadi ba. ¹⁰ Ama a ya jie, ki kan fidi ki jiidi a baba, ŋan yegi yeni a naaciemo Puura, ¹¹ Yin cengi ban maadi ya maama, man pugni yi u paalu, yin tuogi ba, ki kua bi jondi nni." Lanwani ii, Jedeyɔn den yegi yeni Puura ki jiidi ki ban pundi ti jondi guudkaaba kani. ¹² Madiani yaaba, Amaleki yaaba yeni puoli po yaaba kuli den kpaa bi jondi ki kali ku jualɔngu nni, ki gobi, ki yabi nani ti naasuudi yeni. Nilo den kan fidi ki cɔdi bi yuoyuodi. Bi den yabi nani mi ñincianma jaali kpentanbiini yeni i. ¹³ Jedeyɔn ń den pundi bi guudkaaba likani, li sua ke o nilo togdi o lielo wan la yaali ti dangdi nni. Li nilo den yedi, "Diidi! N duani ki dangi, n dangdi nni, n la ciecieli ke li bindi Madiiani yaaba jondi nni, li den pundi jongu kani, ki pua gu, ke ku baa ki padi ki yayadi." ¹⁴ Wan togdi ya nilo den yedi, "Li ciecieli yeni ki tie bontɔli, ki kandi Jedeyɔn jugsiega, Israyeli yua, Jowasi bijua. U Tienu taa Madiani yeni u tɔtieba kuli ki tieni u nuu nni." ¹⁵ Jedeyɔn ń gbadi ti dangdi yeni ti bundima, o den gbaani ki pugi U Tienu. O den guani ki lebdi Israyeli tɔtieba jondi nni, ki yedi, " Fii mani! O Diedo taa Madiani tɔgoli ki tieni ti nuu nni. ¹⁶ O den bɔgdi jak̄ɔnda kobiitaa yeni caga taa i, ki mubni tɔtielo kuli naatunli yeni ñincuakuonli, ke u naamaanu ye li cuali nni. ¹⁷ O den yedi ba, " Diidi mani, yin ya nua nni, ki tiendi min ba tieni yaali. Ya nua mani nni! N ya pundi bi tɔtieba jondi kunga, ki tieni yaali , yimo ń tieni la. ¹⁸ N ya piebi li naatunli, mini yeni yaaba n yegi yeni nni, yinba mo ń piabi i naatuna ti jondi lindma kuli kani, ki tiani ki maadi, 'O Diedo po yeni Jedeyɔn po!'" ¹⁹ Lanwani ii, Jedeyɔn yeni ya jakɔndkobga n den yegi yeni o, den pundi bi tɔtieba jondi kunga, lan pundi ya yognu ke ban lebdi ti jondi guudkaaba, Madiani yaaba den lebdi li yognu bi guudkaaba. Bi den piebi a naatuna, ki mudi ban den muubi ya cuana. ²⁰ Li cagtaada kuli den piebi bi naatuna, ki mudi ban muubi ya cuana. Bi den muubi i naamaani u ganu po, ki muubi li naatunli u jienu po, ki piebi. Bi den tangi ki maadi, "O Diedo yeni Jedeyɔn jugsiega." ²¹ Bi den sedi ki lindi Madiani tɔnagli, Yuakuli den see kaanyendu, o buoli nni, ke Madiani tɔtieba tiini. Bi den tiini ki ña, ki yigni. ²² Ban den taani ki piebi li naatuna kobitaa ya yognu, O Diedo den kuani li ŋmadli Madiani yaaba siiga, ke bi ñani bi jugsiemu ki kpa biyaba bi tɔgoli nni. Bi tɔtieba den sani ki fagdi, ki pundi hali Beti Sihita, ki caa Serera gamu po, hali ki ban pundi Abeli Mehola bianu, Tabati diema nni. ²³ Israyeli yaaba den sɔni u tondu, ki yini Nafitali yaaba, Asiheri yeni Manase yaaba, ke bi taani ki ŋɔdi ki deli Madiani yaaba. ²⁴ Jedeyɔn den sɔni u tondu ke bi waania juana diema nni Efrayima yaaba, ki yedi ba,"Jiidi mani ki jia Madiani yaaba sanu, ki guudi ba Jurden kpenjaali kani, ki ban pundi hali Beti Bara, ki jia bi sanu." Lanwani ii, Efrayima yaaba kuli den taani ki sedi ki jia ba mi ñima puodkaanu, ki ban pundi Beti Bara yeni Jurden kpenu kani. ²⁵ Bi den cuo Madiani badbijaliedba, Orebi yeni Seebi. Bi den kpaa Orebi, Orebi tangu kani, ki kpaa Seebi mo, Seebi daamɔngu ŋanbkaanu kani. Bi den ŋɔdi ki deli Madiani yaaba, ki jia Orebi yeni Seebi yula ki gedi yeni Jedeyɔn kani, ke o ye Jurden kpenjaalieli po.