¹ Israyeli nitaanli go den tieni yaali n bia boncianla, O Diedo nintuali, o den taa ba ki tieni Madiani yaaba nuu nni hali bina lele. ² Madiani yaaba den wangi Israyeli yaaba falaciamo, ki mabindi ba yeni u paalu. Madiani yaaba po, Israyeli yaaba den lingi i wuonkaani, a juana nni, a tanlona nni, ti tankuodi nni, yeni ya wuonkaani n paa boncianla. ³ Israyeli yaaba ya koni, ki buli bi kuani, Madiani yaaba yeni Amaleki yaaba, yeni puoli po diema yaaba yi gedi ki naa ba, ki woli ba. ⁴ Bi den yi cua ki caani bi jondi, ki kali ki kuli ba, ki ya biidi bi kpaandi ki ya caa hali Gasa. Bi ba fie ti kpaandi nni jiedi kuli, ki taani yeni ti yandi, i nee, yeni i ŋunbi kuli. ⁵ Bi ya doni ki pundi yeni bi yankuli, ki kpaa bi jondi, bi yi tie nani ti naasuudi yeni,nilo kan fidi ki cɔdi bani yeni bi yoyuodi kuli ń dɔa maama. Bi den yi kua mi diema nni, ki taa ban la yaali kuli, ki biidi yaali n sieni. ⁶ Madiani yaaba den waani Israyeli yaaba fala boncianla, hali ke bi buudi ki mia O Diedo li todli. ⁷ Israyeli yaaba ń den jaandi ki mia O Diedo li todli, kelima Madiani yaaba po, ⁸ O Diedo den sɔni sawalpualo Israyeli yaaba kani. O sawalpualo den yedi ba, "O Diedo ń yedi yi ya maama n ne: 'Mini n den ñani yi Ejipti diema nni, yin den tie naani yonbi. ⁹ Mini n faabi yi Ejipti yaaba yeni yaaba n den wangi yi fala kuli ya nui nni. Mini n den deli ki yaani ba, ki puni yi bi diema, ke i cua ki kali. ¹⁰ N den yedi yi, "Mini n tie O Diedo, i Tienu; N den bili yi li ñɔbonli ke yin da ŋua ki pugi yin kaa yeni Amori yaaba yeni ya buli." Ama i nan den ki clni n ñɔmaama.'" ¹¹ O Diedo Maleki den cua ki kali Jowasi, Abiyeseri buolu yua tiicianbu kani, Ofriha dogu nni, Li yognu ke Jowasi bijua Jedeyɔn den pua kpanu difiandi u jalu nni. ki bua wan wuoni, Madiani yaaba ń da la li bima ¹² O Diedo Maleki den dɔgdi opo, ki yedi o, "O Diedo ye yeni a, fini o jakɔndbiemo!" ¹³ Jedeyɔn den yedi o, "Hain, Canbáa, li ya tie ke O Diedo ye yeni ti, be n nan cedi ke ti yema kuli tie nanda? Wan tieni ya ŋanbcianli ke ti yaajanba togdi ti yeni ye le i, bi den togdi ti, 'O Diedo ka den ñani ti Ejipti diema nni, ki cua yeni ti ne ee?' Ama, O Diedo ji ñɔli ki ŋa ti Madiani yaaba nui nni." ¹⁴ O Diedo den diidi Jedeyɔn, ki yedi o, "Gedi yeni ŋan pia ya fidu ki ban faabi Israyeli yaaba Madiani yaaba nui nni, Mini ka sɔni ŋa aa? ¹⁵ Jedeyɔn den yedi o, Hain, n Diedo, n ba tieni ledi i, ki faabi Israyeli yaaba? Diidi, n diegu n tie Manase buolu nni yaagu n tadi ki cie, mini n go tie ti diegu nni, ti báa sanbiani. ¹⁶ O Diedo den yedi o, "Mini n ba yegi yeni a, a ba paadi Madiani tɔgoli nani niyendo yeni i." ¹⁷ Jedeyɔn den guani ki yedi o, "Li ya tie ke a pali mani npo, ŋan tieni maalma yaalidgu bonli, ki waani ke fini n maadi yeni nni. ¹⁸ N mia ŋan da siedi nekanba hali mi ba guani, ki cua yeni n paabu ki waani a nintuali." O Diedo den yedi, "N ba ba guudi hali yeni a guanma." ¹⁹ Jedeyɔn den kuni ki ban kodi ŋuabuaga, ki baa mi yoma, cancaaga, ki pua ya kpanu n ki pia dabinli. O den tieni ti nandi ku baabuogu nni, ki kuodi mi nankpiñima sanli nni, ki guani yeni likuli bu tibu kani, ki waani o Diedo nintuali. ²⁰ U Tienu Maleki den yedi o, "Taa ti nandi yeni ya kpanu n ki pia dabinli ki maani ku tangu po, ki wuli mi nankpinñima likuli po." Jedeyɔn den tieni yeni i. ²¹ Lanwani ii, O Diedo Maleki den yugdi o nuu yeni u gbiamu. O den sii ti nandi yeni ya kpanu n ki pia dabinli yeni u gbiamu juoga; ke u mu ñani ku tangu nni, ki dini ki buadi ti nandi yeni kpanu kuli. O Diedo Maleki den yuandi ki yindi, ki yaadi, ke Jedeyɔn ji ki nua o. ²² Jedeyɔn ji den bandi ke li bi tie O Diedo Maleki i. Jedeyɔn den yedi, "Hain, N bia n yeni, Yonbdaano, O Diedo! Kelima n la O Diedo Maleki nunga yeni n nuni!" ²³ O Diedo den yedi o, "Da jie libakuli, a kan kpe." ²⁴ Lanwani ii, Jedeyɔn den maa li padbinbindli likani O Diedo po. O den yini li binbindli, "O Diedo n tie mi yanduanma." Hali yeni mɔla kuli, li padbinbindli da li ye Ofrati, Abiyeseri buolu diema nni. ²⁵ Li daali ñiagu, O Diedo den yedi Jedeyɔn, "Cuo a báa naatonli, ki go baa ya naatonlieli n pundi bina lele, ŋa pua ki mudi a báa Baali bulo padbinbindli, ki pua ki caadi ya daacaadu n caa o bulo kani. ²⁶ ŋan maa u wuonkaanu ne po padbinbindli O Diedo i Tienu po, ŋan maa li padbinbindli bonŋanla. ŋan padi li naatonlieli lan tua padjuukaali, li padbinbindli po, ŋan taa Baali bulo kani daacaadu, ŋan pua ki caadi ya daagu yeni ki juu li padjuukaali." ²⁷ Lanwani ii, Jedeyɔn den taa o naacenba bonba piiga, ke bi taani o ke o tieni O Diedo ń buali o ke wan tieni yaali. Ama, o den jie o diegu nni yaaba yeni u dogu nni yaaba, kaa tieni li u yensiinu, o den tieni li ku ñiagu i. ²⁸ Lan den fiifaa, ke u dogu nni niba findi, bi den sua ke Bali bulo padbinbindli mudi, ke u daacaadu mo caadi, ke bi padi ban yuandi ki maa ya padbinbindli po yeni, naatonlieli. ²⁹ U dogu nni yaaba den buali biyaba, "ŋma n sɔni lanya tuonli?" Ban den buali biyba, ki kpaagi, bi den ti yedi, "Jowasi bijua Jedeyɔn n tieni la." ³⁰ Lanwani ii, u dogu nni niba den yedi Jowasi, "Cua yeni a bijua na tin kpa o, kelima o pua ki mudi o bulo Baali padbinbindli, ki go caadi ya daacaadu n den caa o kani." ³¹ Jowasi den yedi yaaba n den jalgi o yeni, "Yinba n ba kɔni o bulo Baali po oo? I ba fidi ki faabi Baali ii? Yua n bigni ki ba kɔni Baali kɔnli, o ba kpe ke li dá ki fandi. Baali ya tie tienu, ban mudi o padbinbindli yeni, wani n bi ba ki ga o yuli." ³² Lanyapo i ke li daali, bi den yini Jedeyɔn, "Jerubi Baali" kelima o den yedi, "Cedi mani Baali ń kɔni yeni nni, ki fie o yuli," kelima mini Jedeyɔn n mudi Baali padbinbindli. ³³ Madini yaaba yeni Amaleki yaaba yeni puoli diema yaaba den taani. Bi den puodi Jurden kpenu, ki caani bi jondi Jesireyeli jualɔngu nni. ³⁴ Ama, O Diedo Foŋanma den fandi Jedeyɔn. Jedeyɔn den piebi li naatunli, ki yini ki taani Abiyeseri buolu yaaba, ke bi ŋɔdi o puoli po. ³⁵ O den sɔni u tondu ki waani Manase buolu yaaba kuli, ke bimo taani ki ba ŋɔdi o puoli po. O go den sɔni u tondu ki waani Asiheri buolu yaaba, Sebulɔn yeni Nafitali buoli yaaba, ki bi taani ki ba cendi o. ³⁶ Jedeyɔn den yedi O Diedo, "A ya bani ke a ba sɔni mini, min ban faabi Israyeli yaaba, nani ŋan yedi maama yeni, ³⁷ Diidi, n ba ladi ku pagbangu u jalu nni. Li ya tie ke ku mangu baa ku gbangu baba ya po, ki ŋa ke ki tinga yaaga n lindi gu yeni kuoni, n ba bandi ke a ba taa mini ya nuu i, ki faabi Israyeli nitaanli, nani ŋan yedi maama yeni. ³⁸ Li den tieni nani wan den maadi maama yeni. Jedeyɔn den yagdi ki fii, ki ŋmiani ku gbangu, ki ga ya mangu n ba gbie tadkuali. ³⁹ Lanwani ii, Jedeyɔn go den yedi U Tienu, "Lan da biidi a pali ka, n go pia maayenma ki ba maadi. N mia ŋa ke ŋan cabi nni min go bigni yeni ku gbangu ki pugni. Mɔla wani ii, ŋan cedi ku gbangu ń ya kuoni, ke ya tinfanma n lindi gu ń ya sɔngi, ku mangu po. ⁴⁰ U Tienu den tieni wan buali o yaali, li ñiagu. Ku gbangu den kuoni, ke ya tinfanma n lindi gu sɔngi yeni mi manma.