¹ Lanya daali, Debora yeni Abinoami bijua, Baraki den yini ya yanbu ne: ² Bi yudanba ń ga Israyeli yudandi, Israyeli niba, bikuli yanbuadanba bu tɔbu po, yeni li pamancianli, Ti kpiagdi O Diedo yeli! ³ Ya cengi mani, yinba bi badtieba, Yin fangi i yula, yinba bi yudanba! Mini, N ba yiini i yani O Diedo po; N ba yiini ki dondi O Diedo, Israyeli Tienu ⁴ O Diedo, ŋan den ñani Seyiri, ŋan den ñani Edomi diema nni, ki cuoni, ki tinga den digbi, ke ti tawaldi migi boncianla; ki taaga mo den mini boncianla. ⁵ A juana den digbi O Diedo nintuali; Sinaayi juali mɔno den digbi O Diedo, Israyeli Tienu nintuali. ⁶ Anati bijua, Camigari jamaano yogu, Jayeli jamaano yogu, bi sancenba den lɔgdi a sanjaciama, bi sancenba den lagdi, ki tɔgi mu sanbulmu i. ⁷ A jakɔnda den ki yabi Israyeli diema nni, hali ya yognu ke mini Debora ga ti yudandi, ki tua canaá ki gobdi Israyeli! ⁸ Ban den ŋɔdi i buli ya yognu, bu tɔbu den pua u dociamu bulñɔbu kani, ama Israyeli yaaba, tuda piina siiga, a kan den la kpaali bii gbankɔndigu. ⁹ N pali mani Israyeli yudanba po, N jaandi ba N go jaandi ya niba n tuo yeni bi yanbuama. Ti miadi O Diedo yedŋanma bipo. ¹⁰ Yinba yaaba n jagi i ŋunpieni, yinba yaaba n kaa a cabladkaana po, yeni yinba yaaba n cuoni a sanjala po, yin tieni mi maalma boncianla. ¹¹ Cengi mani yaaba n lu mi ñima u ñinluunkaanu. Bi yiini ki tiadi O Diedo teginma yeni o ŋanbli, yeni Israyeli jakɔnda teginma yeni bi tuonŋanli. O Diedo buolu den jiidi, ki gedi ki sedi yibalinba dociami bulñɔna kani. ¹² Debora. Da gɔa ka, findi! Findi, findi ki yiini bu yanbu! Baraki, fii ki cuo a yonbi, fini Abinoami bijua. ¹³ Yaaba n ciadi bu tɔbu nni ŋɔdi bi badtieba; O Diedo nitaanli taani ki jiidi ki cua yeni a jakɔnda. ¹⁴ Bi den ñani Efrayima ki cua, bani yaaba ya yaajanba tie Amaleki yaaba; Benjamini buolu yaaba den ŋɔdi a puoli po. Bi yudanba den ñani Maciiri, ki jiidi, ki cua, ke a jakɔnda yudanba ñani Sebulɔn, ki cua. ¹⁵ Isakari badbijaba den taani Debora po; Isakari mo den taa Baraki po i. Bi den cɔlni o maama, ki ŋɔdi o tontoni, ki jiidi ki cua. Rubeni buolu yaaba siiga, ku ñɔniagu den yabdi ba. ¹⁶ Be n den cedi ke i kaa a yankpaala siiga, ki cengi ba ke bi piebi ki yii bi yankuli? Lani n yeni, Rubeni yaaba wani ii, den se yeni ñɔniagu baba i. ¹⁷ Gileyadi buolu yaaba wani den se Jurden kpekunu i; ke Dani yaaba mo, be n cedi ke bi den se yeni bi ñinbiadi, ki buali ban ba tieni maama? Aciheri yaaba mo den se mi ñincianma jaali kani i, bi ñinbiadi ń se se naani. ¹⁸ Sebulɔn yeni Nafitali yaaba n den luni bi miana bu tɔbu po, ki kua bu tɔbu guagu nni. ¹⁹ Bi badtieba den cua, ki pua bu tɔbu; Kanana badtieba den tieni bu tɔbu Taanaci dogu nni, kaa fagi yeni Megido kpenu. Ama bi den ki baa tiafagikaadi, ki buali ligi. ²⁰ A ŋmaabila den ñani tanpoli, ki pua bu tɔbu. A den ñani ŋaljanli nni, ki taa a sanu, ki jiidi ki tuogi bu tɔbu yeni Sisera. ²¹ Kisihɔn kpenu ñima n den puubi, ki kɔdi ba. Kisihɔn kpenu, yuu n den ye hali yognu. N den yedi n pali nni, Todi nni, ki ŋma a jakɔnda yeni u paaciamu! ²² Lanwani ii, i taama taawoga den mɔa, bi tandanba ń den jagdi ki ŋa yii, ki tiini ki bua fie bi miana. ²³ O Diedo Maleki den yedi, 'Soli mani Merosi!' 'Soli mani li dogu niba!' Kelima baa den cua ki ba todi O Diedo. Baa den taani O Diedo ń den pua ya tɔbu yeni a jakɔndbiama.' ²⁴ O Diedo ń yadi o yedŋanma Jayeli po, ki cie puoba kuli Jayeli, Keneti buolu yua Heberi denpua, Jayeli, o baa mi yedŋanma, ki cie ya puoba n kua ti jondi nni kuli. ²⁵ O ja den mia o mi ñima, ke o teni o mi naaŋanma; O den cua yeni opo mi naaŋankpama, ya tadñukaaga n ŋani, ki dagdi yeni bi badbijaba. ²⁶ O den taa li kpakpaali yeni o nuuganu, ki taa hama yenu o nuujienu; O den pua Sisera yuli yeni Hama, ki kpaa li kpakpaali, ki miini o yuli nni. O den kpaa li kpakpaali ke li ñani o yuli poyenpo, ki ban poni potɔpo. ²⁷ O den baa, ki bili Jayeli taana tiipo, O den kpe, ki bili Jayeli taana tiipo. Ban den kpa o yeni mi jama naani yeni, o den baa ki bili lankani i. ²⁸ Sisera naá den duandi li takobonli, ki buali yeni ti yanyagdi, 'Be n cedi hali yeni mɔla kuli, ke waa taa o tɔturgu ki sani ki kpeni ii? Be n cedi ke o tantaawoga yaa n dia o tɔturgu ki jalgi, ki waagi yeni mi kpenma aa? ²⁹ O den tiadi o potuada siiga, bi yanfodanba ń den maali yaali: ³⁰ Bi da ki fidi ki bɔgdi ti tifagkaadi bi ii? Jakɔndo kuli jafanyendo, bii bilie, kpalcianyenbu tie Sisera ya biinu. Li ya su ke kpalciandi lie ba loli yaaba n fagi o tulu nni te ?. ³¹ Lanwani ii, O Diedo, a yibalinba ń bodi cain! Ama, a dɔnlinba ń pugdi nani u yienu ń yi pudi ya yognu, a paaciamu po yeni." Lanwani ii, mi yanduanma den kali mi diama nni hali bina piina.