¹ Ehudi ń kpe, Israyeli yaaba go den tieni yaali bia boncianla O Diedo nintuali. ² O Diedo den taa ba ki tieni Kanana bado, yua n den kaa Hasɔri dociamu nni, Jabini nui nni i. O jakɔnda yudaano den yii Sisara, ki kua Haroceti Giyima dogu nni. ³ Israyeli yaaba den buudi ki fabni, ki mia O Diedo li todli, kelima, o bado Sisera den pia ti kudi tɔturdi kobi yiani; o den wangi Israyeli yaaba fala hali bina piilie. ⁴ Lanyognu, Lapidoti denpua, Debora den tie sawalpualo, wani n den jiagi ti buudi Israyeli diema nni ⁵ O den yi kaa Debora kpakpaldi yaadi n ye Ramha yeni Beteli siiga nni sɔngu, Efrayima juana diema nni, ke Israyeli yaaba den caa o kani ke o jiagi bipo bi buudi, bii bi maama. ⁶ O den sɔni u tondu, ke bi yini Kedeci dogu, Nafitali diema nni yua Abinoami bijua Baraki, ke o yedi o, "O Diedo, Israyeli Tienu bili yi ya ñɔbonli ne: 'Yin do Tabori juali po, ki yegi yeni Nafitali yeni Sebulɔn jakɔnda tuda piiga. ⁷ N ba cedi Jabini tɔtieba yudaano, Sisera yeni o jakɔnda yeni o tɔturdi ń tuogi yi Kisihɔn kpenkunu, min todi yi yin kɔni ki paadi ba.'" ⁸ Baraki den jiini o, "A ya ba yegi yeni nni, n ba gedi, ama a ya kan yegi yeni nni, n kan gedi." ⁹ O den yedi, "Laa pia tama, n ba ciani a. Ama a sancenli nan kan ya pia kpigdiba kuli apo, kelima, O Diedo ba taa Sisera miali ki tieni o pua ya nuu nni i." Lanwani ii, Debora den fii ki yegi yeni Baraki ke bi gedi Kedeci. ¹⁰ Baraki den yini Nafitali yeni Sebulɔn jakɔnda, ke bi cua Kedeci. Jakɔnda tuda piiga den ŋɔdi o, ke Debora ciani ba. ¹¹ Li den sua ke Hobabi, Moyiisi cuado puolŋuanu, Heberi, Keneti buolu yua, den paadi yeni Keneti buolu yaaba, ki gedi ki caani o jongu Kedeci, ki kuli bu tiicianbu. ¹² Ban maadi Sisera ke Abinoami bijua, Baraki doni Tabori juali po, ¹³ Sisera den taani o tɔturdi kuli, tudayian yeni o jakɔnda yaaba n den ye Harociti dogu nni, ke bi gedi Kisihɔn kpenkunu. ¹⁴ Debora den yedi Baraki, "Ya caa, kelima dinne i ke O Diedo ba cedi ŋan kɔni ki paadi Sisera yeni o jakɔnda. O Diedo ka yegi yeni a aa? Lanwani ii, Baraki den yegi yeni jakɔnda tuda piiga, ke bi ñani Tabori juali, ki jiidi ¹⁵ O Diedo den cedi ke li ŋmadli kua Sisera yeni o jakɔnda siiga. Baraki jakɔnda den woli ba, ke Sisera jiidi ki ŋa o tɔturgu, ki sani yeni o taana. ¹⁶ Ama Baraki yeni o jakɔnda den ŋɔdi ki deli ti tɔturdi yeni bi yibalinba, ki ban pundi Haroceti, ki kpaa a jakɔnda kuli yeni ki jugsiega, bá niyendo den ki sani ki ciadi. ¹⁷ Sisera den sani taapiena ki ban pundi Keneti yua, Heberi denpua Jayeli jongu nni, kelima Hasɔri bado Jabini diegu yeni bi diegu yaaba den mani yeni biyaba. ¹⁸ Jayeli den ñani ki tuogi Siselra, ki yedi o, "N daano, guani ki kua ti deni, ki da jie libakuli." Lanwani ii, o den guani ki kua u jongu nni, ke Jayeli taa bu kpalbu ki pini o. ¹⁹ O den mia Jayeli, "Puni nni mi ñima, min ñu, kelima u ñuñuunu pia nni hali boncianla." O den biidi ki naaŋanbadga, ki teni o mi naaŋanma ke o ñuni, ke o guani ki pini o yeni bu kpalbu. ²⁰ O den yedi Jayeli, "Sedi ku jongu bulñɔbu kani. Nilo ya cua ki buali, 'Nilo ki ye ne ee? ŋan yedi o ke N n.'" ²¹ Lanwani ii, Heberi denpua Jayeli den taa ku jongu kpakpaali ki mubni o nuu nni, ki nagni o kani, kelima, o den cɔgi boncianla, ke mi guama mo pia o boncianla,Jayeli den taa ku jongu kpakpaali, ki muu o kpianu, ki kpa, hali ke li ban poni tiipo, ke o kpe. ²² Baraki den ŋua ki deli Sisera, ke Jayeli ñani, ki tuogi o, ki yedi o, "Cua na, min waania ŋan lingi yua." O den ŋɔdi o, ki kua ku jongu nni, ki sua ke Sisera kpe ki dua, ke li kpakpaali caa o kpianu. ²³ Lanya daali i, ke O Diedo den cedi ke Kanana bado Jabini dini i fee, Israyeli yaaba nintuali. ²⁴ Israyeli yaaba den tieni u fidu, ki waani Kanana bado Jabini falaciamo hali ki ban bolini o.