¹ O Diedo ji den ŋa i nilanbuoli, ke bi ye mi diema nni, ki baa bigidi Israyeli yaaba, yaaba n den ki ki kpeli ki tieni Kanana kuama nni tɔbu yeni. ² O den tieni yeni, ke wan tundi Israyeli nifiipanma yaaba n dá den ki bani tɔbu yeni, ke ban baa u tɔgŋamu. ³ Li nilanbuoli n ne: Filisitini badtieba mu yeni bi diema niba, Kanana yaaba kuli, Sidoni yaaba, yeni Hifiti niba, yaaba n kua Liban juana diema nni, ki cili Baali Hermoni juacianli, ki ban pundi hali Hamati dogu bulñɔbu. ⁴ O Diedo den ŋa li nilanbuoli bi siiga nni, ke wan tundi Israyeli buolu yaaba, ki bandi bi ya ba tuo ki ŋɔdi wan den bili ya ñɔmaama bi yaajanba po, ke Moyiisi waani ba yeni. ⁵ Lanwani ii, Israyeli yaaba den kua Kanana yaaba, Hiti yaaba, Amori yaaba, Perisi yaaba, Hifi yaaba yeni Jebusi yaaba siiga nni. ⁶ Bi den taa bi bisiaba ki kuani ke bi tua bi puoba, ki puni ba bimo ya bisiaba ke bi kuani, bi den ŋua ki padi a pada, ki pugi bi buli. ⁷ Israyeli nitaanli den tieni yaali bia O Diedo nintuali, ki sundi bi Tienu po. Bi den pugi Baali yeni Acera buli i. ⁸ Lanyapo i, ke O Diedo pabienli den fii ki ŋubi nani u mu yeni Israyeli yaaba po, ke o cabi ke Arami Naharayimi bado Kusihani Risihatayima tɔgola kɔni ki paadi ba, ki diedi ba. Israyeli yaaba den tuuni a tuonpaala o bado Kusihani Risihatayima yeni o niba po hali bina niin. ⁹ Israyeli yaaba den buudi, ki mia O Diedo todli, o den puni ba ya nilo n ba faabi ba, ki ñani ba fala nni: lani n tie Kenasi bijua, Kalebi waalo Otinayeli. ¹⁰ O Diedo foŋanma den pugni o u paalu, ke o tua Israyeli yaaba gobdika, ki bobni bu tɔbu. O Diedo den todi o ke o paadi Arami bado Kusihani Risihatayima yeni o jakɔda. ¹¹ Mi diema den baa mi yanduanma hali bina piina. Lanya puoli, Kenasi bijua Otiniyeli den kpe. ¹² Lani ń den pendi, Israyeli yaaba go den tieni yaali bia O Diedo nintuali, ke o puni Moabi bado, Eglɔn u paalu, ke o kɔni, ki diedi Israyeli yaaba. ¹³ Eglɔn den puogi Amoni yaaba, yeni Amaleki yaaba, ke bi taani o ki kɔni, ki paadi Israyeli yaaba, ki diedi Kpakpa tiidi dociamu Jeriko. ¹⁴ Israyeli yaaba den tuuni a tuonpaala Moabi bado Eglɔn yeni o niba po hali piiga n bina niin. ¹⁵ Israyeli yaaba den buudi ki mia O Diedo li todli, o den puni ba ya nilo n ba faabi ba. Lani n tie Gera bijua Ehudi, ke o tie gamo, ki tie Benjameni buolu yua. Israyeli yaaba den sɔni o yeni bu paabu ke wan teni Moabi bado Eglɔn. ¹⁶ Ehudi de maa o jugsiega, ke ki mani ciani lie kuli, ke ki fagmu pundi nuukpandunli; o den ñagni ga o ciaga nni, ki guani u jienu po, ki yie o tiadi ki naa. ¹⁷ O den pundi ki teni o bado Eglɔn bi paabu. Eglɔn den tie ya nilo n gbengi boncianla. ¹⁸ Ehudi den teni bi paabu, ke wani yeni yaaba n den tugi lebdi ki ñani. ¹⁹ Ehudi wani ń den pundi Gilgali, ban kpiedi a tana buli naankani yeni, o den guani ki lebdi, ki yedi, "N pia ŋasiili sawali n yonbdaano o bado po." O bado Eglɔn den yedi, "N naacenba, ña mani ke n dá bua o u juogu waamu!" Ke o naacenba ñani, ki ŋa o. ²⁰ Ke Ehudi kua, ki sua ki o kaa o baba i, mi fawaapuama dieli nni, ke Ehudi nagni, ki yedi o, "N pia ya sawali n ñani U Tienu kani, apo." Ke o bado fii o kankaanu po, ki sedi. ²¹ Ke Ehudi tuuni yeni o nuuganu o jienu ciaga nni, ki nɔdi ki jugsiega, ki muu, ki miini o bado tugu nni. ²² ki jugsiega baali mɔko den kua ki milni, ke mi kpama ñani, ki lia, ki milni li baali. ki jugsiega den poni o puoli po, ke mi kpama lia ki pibni ga, kelima Ehudi den ki dadi ki ñani ki jugsiega o tugu nni. ²³ Ehudi den ñani ki guani ki luoni mi fawapuama dieli ki kpali yeni i dieluodpiemi, ki ñani, ki ban caa. ²⁴ Ehudi den ñani yo, ke o bado naacenba nagni ki sua ke li dieli gana luo, ki kpaali, bi den maali, "O bado kua ki ñanmuaga i, mi fawapuama dieli nni." ²⁵ Bi den guudi ki ban cɔgi, ke waa luodi mi fawaapuama dieli bulñɔna, ke bi ji tiadi, ki taa ki sedabga ki luodi li dieli, bulñɔna ki sua ke bi canbaa bili ki kpe o . ²⁶ O bado naacenba ń ki maali ban ba tieni maama yeni, Ehudi den sani ki tɔgni ban kpiedi i buli naani yeni a tana yeni, ki sani ki gedi Seyira dogu nni. ²⁷ Wan den pundi, o den doni Efrayima juali po, ki piebi li naatunli, ke Israyeli yaaba jiidi ki taani o, ke o ga bi liiga ke bi jiidi. ²⁸ O den yedi ba, "Ya ŋua mani nni, kelima O Diedo bua taa ti yibalinba, Moabi yaaba, ki tieni ti nui nni." Bi den ŋɔdi o, ke bi ban sedi ki pigni Jurden kpenu puodma kani, kaa tuo ke Moabi yaaba ba puodi u kpenu. ²⁹ Lanyognu, bi den kpaa Moabi niba yaaba n ki luo tuda piiga (10.000). bikuli jakɔnda baba. bá niyendo den ki fidi ki ciadi. ³⁰ Li daali, Israyeli yaaba den kɔni ki paadi Moabi yaaba, ke mi diema baa mi yanduanma hali bina piiniin. ³¹ Ehudi jamaano ń pendi, ya faabka n den yuand ki cua den tie Anati bijua Sihamgari; wani n den kpaa Filisiti yaaba niba kobi luoba (600) yeni u naamuupiemu, ki faabi Israyeli yaaba yeni fala.