¹ O Diedo Maleki den ñani Gilgali, ki gedi Bocimi, ki yedi, "N ñani yi Ejipti diema nni, ki cua yeni yi minden poli ki niani i yaajanba yadiema nni. N den yedi, 'N kan miidi min den loli ya ŋantaado yeni i yaajanaba hali bada ² I kan loli ŋantaadoba kuli yeni ya nibuoli n kua li diema nni. Yin pua ki figdi, ki mumudi bi buli yeni bi padbinbinda. Ama, i nan ki cɔlni n ñɔmaama. Be n cedi ke i tieni yeni? ³ Lanya po i, ke n yedi yi, 'N kan deli ki yaani Kanana yaaba ipo, yinba yeni bani n baa taani ki kua, bi buli mo baa tie ipo nani diagu yeni i"' ⁴ O Diedo Maleki ń maadi Israyeli nitaanli lanya maama, li nitaanli kuli den yigni, ki buudi. ⁵ Bi den yini li kaanu Bocimi (yaaba n buudi). Bi den yidi O Diedo po salga likani. ⁶ Josuwe ń den cabi li nitaanli, buolu kuli den guani ki kuni wuu paadi ya dogu, ki ba kali ki diedi u. ⁷ Israyeli nitaanli den ŋua O Diedo ñɔmaama Josuwe miali banlu kuli yeni wan den kpe, ki ŋa yaaba ke bi dá fo, ki la O Diedo ń tieni ya ŋanbli kuli Israyeli buolu po ya miali banlu kuli. ⁸ O Diedo naaciemo, Nuni bijua, Josuwe den kpe, ki pia bina kobga n bina piiga (110). ⁹ Bi den piini o wan den baa ya diema Timinati, Efrayima juana dogu nni, ke mi ye Gaaci juali jienu po. ¹⁰ Lanya nifiima den buli, ki ŋɔdi bi yaajanba. Nifiitɔma n den yuandi ki fii bi ya puoli, bani yaaba n den ki bani O Diedo bii wan tieni Israyeli buolu po ya ŋanbli. ¹¹ Israyeli nitaanli den tieni yaali n bia O Diedo nintuali, ki ŋɔdi, ki gbaani, ki pugi o bulo Baali. ¹² Bi den yaadi ki ŋa O Diedo, bi yaajanba Tienu, yua n den ñani ba Ejipti diema nni. Bi den ŋɔdi i buli, ya nibuoli n den kaa bi siiga nni ya buli, ki gbaandi ki pugi yi. Bi den fiini O Diedo pabienli, kelima ¹³ bi den yaadi ki ŋa O Diedo, ki ŋua ki pugi, i buli Baali yeni Acitoreti. ¹⁴ O Diedo den fiini o pabienli Israyeli nitaanli po, ke o cedi ke ya nibuoli yaaba n lindi ba yeni, tɔgola diedi ba. O den taa ba ki tieni bi yibalinba nui nni, nani yonbi yeni, ke bi kubi ba yeni u paalu, lanwani ii, bi ji den ki pia ya fidu ke bi ba tuogi ki paadi bi yibalinba. ¹⁵ Israyeli yaaba ya den tuogi ya nibuolu kuli bu tɔbu, O Diedo den yi sedi bipo yeni mi biadma nani wan den poli ki waani ba maama yeni, bi den falabiado ya yebiadma nni i. ¹⁶ Lanwani ii, O Diedo den puni ba bi yudanba, yaaba n tie buujiaba, ke bi faabi ba bi yibalinba, bi sanjiaba nui nni. ¹⁷ Ama, yeni lani kuli, bi naa den cengi bi yudanba maama. Bi den fiini mi yenyiema, ki buli ki ŋa O Diedo, ki ŋɔdi i buli nani a concona yeni, ki gbaandi ki pugi yi. Bi buli ki ŋa bi yaajanba yaaba den ŋua O Diedo yeni ya sanu, ki yie O Diedo ñɔmaama, kaa tuo ki ba cɔlni ma, nani bi yaajanba yeni. ¹⁸ O Diedo den puni ba bi yudanba, li yudanba yaaba n tie buujiaba yeni den yi gobdi ba,ki faabdi ba bi yibaliba nui nni, bi miali banlu kuli. Bi yibalinba ya den wangi ba fala, ke bi buudi, O Diedo den yi gbia bi niñima. ¹⁹ Ama o yudaano, o buujialo ya ti kpe, kase ban buli ki ŋa O Diedo ñɔmaama, ki yaali n bia ki cie bi yajanba ń den tiendi yaali. Bi den yi ŋɔdi ki ya gbaandi, ki pugi i buli boncianla. Bi den yie kaa ŋa i buli pugma yeni ti tuonbiadi tienma, nani bi tujuagma ń den tie maama yeni. ²⁰ O Diedo go den fiini o pabienli Israyeli yaaba po, ke o yedi, "Nani u nibuolu ne ń miidi min den loli ya ŋantaado yeni bi yaajanba yeni, kelima bi nan ji ki cengi n maama. ²¹ N ji kan deli ki yaani bipo Josuwe ń kpe ki ŋa ya nibuoli bi siiga. ²² N ba tieni yeni, ki dia Israyeli nitaanli ku diagu, n ba diidi bi ya ba tuo ki ŋɔdi ki cɔlni O Diedo ń bili ba ya sanu, bi yaajanba ń den ŋua ya sanu yeni." ²³ Lanya po i, ke O Diedo den ki deli ki yaani li nibuoli tonma, ki cedi ke bi taani ki ye yeni ba, ki nan taa ba ki tieni Josuwe nuu nni.