¹ Abimeleki ń kpe ke li pendi, Dodo yaabili, Puha bijua, Tola, Isakari buolu yua, ke o den kua Camiri, Efrayima juana dogu nni. Wani n den fii ki faabi Israyeli yaaba. ² O den gobdi Israyeli piilie n bina taa. O den kpe, ke bi piini o Camiri dogu nni. ³ Wani ń pendi, Gileyadi jua, Jayiri n den tuani. Omo den gobdi Israyeli piilie n bina lie. ⁴ O den pia bijaba piitaa, ke bi jagi ŋunbi piitaa, ki die dociami piitaa, Gileyadi diema nni; hali yeni dinne, bi yii l diema, Jayiri dogi i. ⁵ Jayiri den kpe, ke bi piini o Kamoni. ⁶ Israyeli yaaba go den tieni yaali bia O Diedo nintuali, bi den buli, ki ŋa O Diedo, kaa ji pugi o, ki nan ŋua Baali buli, Acitoreti, Arami yaaba buli, Sidoni yaaba buli, Moabi yaaba buli, Amoni yaaba buli yeni Filisitini yaaba buli, ki pugi yi. ⁷ O Diedo pabienli den co nani u mu yeni i, Israyeli yaaba po. Lanyapo i, ke o den taa ba ki tieni ba Filisitini yaaba yeni Amoni yaaba nui nni. ⁸ Ki cili li binli ki ya caa hali piiga n bina niin, bi den mabni Israyeli yaaba, yaaba n den ye Jurden kpenpuoli, Gileyadi, Amoni yaaba diema nni, ki waani ba fala boncianla. ⁹ Amoni yaaba den yuandi ki puodi Jurden kpenu, ki gedi ki pua bu tɔbu yeni Juda buolu yaaba, Benjameni buolu yaaba yeni Efrayima cugli nni yaaba. Lanwani ii, Israyeli yaaba den ye falaciamo nni i. ¹⁰ Lanyapo i, ke Israyeli yaaba den buudi ki mia O Diedo, ki yedi, "Ti tieni ti tuonbiadi a nintuali, kelima ti buli ki ŋa Fini ti Tienu, ki nan ŋua ki pugi Baali buli." ¹¹ O Diedo den yedi Israyeli nitaanli, "N den ki faabi yi Ejipti yaaba, Amori yaaba, Amoni yaaba yeni Filisitini yaaba nui nni ii? ¹² ki go pugni, Sidoni yaaba, Amaleki yaaba yeni Mawoni yaaba ń den mabindi yi, ki wangi yi fala, i den mia nni, ke N faabi yi yeni bi paaciamu fala nni. ¹³ Ama i go buli ki ŋa nni, kinan ŋua ki pugi i buli. N ji kan ya tundi ki faabdi yi yognu kuli. ¹⁴ Gedi mani ki ban mia yin pugi ya buli. Li buli n ba faabi yin ye fala nni ya yognu kuli." ¹⁵ Israyeli yaaba den yedi O Diedo, "Ti tieni ti tuonbiadi boncianla. Tieni ti ŋan faadi maama, ama, ŋan faabi ti dinne wani." ¹⁶ Bi den ñani i buli bi tiadi nni, ki luni, ki ji ŋua ki pugi O Diedo baba. Lanwani ii, O Diedo den gbadi mi niñima bi falaciamo po. ¹⁷ Amoni yaaba den taani ki caani bi tɔbu jondi Gileyadi diema nni. Israyeli yaaba mo den caani bi tɔbu jondi Misipa dogu nni. ¹⁸ Gileyadi yaaba yudanba den buali biyaba, "ŋma n ba ga liiga ki cili bu tɔbu yeni Amoni yaaba? Yua n fidi ki ga liiga, wani n ba diedi yaaba n ye Gileyadi diemanni kuli."