¹ Jefita den tie jakɔndbiemo i, ama o den tie poconconli ya bujua i, o báa n den tie Gileyadi. ² Gileyadi denpua mo den mali o bijatianba. O denpua bonjamu ń kpedi, ki fandi, bi den deli ki yaani Jefita, ki yedi o, "A kan di ti baadiegu faaliba kuli, kelima, a tie potiano ya biga i." ³ Lanwani ii, Jefita den sani ki ñani o baadiegu, ki yaadi o nijaba kani ki gedi ki ye Tobi diema nni. A puapuaga n den ŋɔdi Jefita, ki yegdi yeni o. ⁴ Lan den tieni a bina waamu, Amoni yaaba den pua bu tɔbu yeni Israyeli yaaba. ⁵ Ban den ye bi tɔbu nni yeni Amoni yaaba yeni, Gileyadi yudanba den gedi Tobi, ki bua guani ki kpeni yeni Jefta bi diema nni. ⁶ Bi den yedi Jefita, "Cua ti diema nni, ki ga ti tɔgoli liiga tin kɔni yeni Amoni yaaba." ⁷ Jefita den yedi Gileyadi yudanba, "I den nani nni, ki deli ki ñani nni n baadiegu. Be nan ji cedi ke i ji cua ki lingi nni, ya yogu ke i ye fala nni ii? ⁸ Gileyadi nikpelba den yedi Jefita, "Yaali n cedi ke ti tiadi apo, ki cua ki baa a po, tie ke ti bua ŋan cua ki todi ti tin kɔni ki paadi Amoni yaaba, ŋan ji diedi yaaba n ye Gileyadi nni kuli i." ⁹ Jefita den yedi Gileyadi nikpelba, "I ya kuni yeni nni denpo, ke O Diedo taani ti, ke ti ban kɔni ki paadi Amoni yaaba, mini n ba tua i gobdika." ¹⁰ Gileyadi nikpelba den yedi Jefita, "O Diedo ń ya tie tinba yeni fini siiga nni kasiedi, li ya tie ke ti ki tieni nani tin jagi, ki yedi maama yeni!" ¹¹ Lanwani ii, Jefita den yegi yeni Gileyadi nikpelba ki kuni, ke li nitaanli den gandi o ki tieni o bi liiga yua. Jefita ń den gedi Misipa, O Diedo nintuali, den togdi ban niani o yaali kuli. ¹² Jefita den yuandi ki sɔni a tonda Amoni yaaba bado kani, ki yedi o, "Be ya kɔnli n ye fini yeni tinba siiga? Be cedi ke a cua ki bua diedi ti diema?" ¹³ Amoni yaaba bado den guani ki jiini o tonda, ki yedi, "Kelima Israyeli yaaba ń den ñani Ejipti diema nni, bi den cua ki diedi n diema, ki cili Arinoni, ki ban gedi hali Jaboki, ki pendi lankani, ki ban pundi Jurden kpenu. Mɔlane, n bua ŋan guani ki ŋmiani ti li diema mi yanduanma nni." ¹⁴ Jefita go den sɔni a tonda Amoni yaaba bado kani, ¹⁵ ki yedi o, "Jefita ń den yedi o ya maama n ne: Israyeli yaaba den diedi Moabi diema yeni Amoni yaaba diema, ¹⁶ Ama, ban den ñani Ejipti diema nni, Israyeli yaaba den tɔgni mi fanpienma nni, ki kogni ku mɔgmɔngu, ki gedi Kadeci. ¹⁷ Israyeli yaaba den sɔni u tondu Edomi bado kani, ki yedi o, 'Ti mia ŋa ke ŋan cabi ti tin pɔndi a diema ki gedi tin caa naani' Edomi bado den ki tuo. Bi go den sɔni u tondu Moabi bado kani, ama o mo den yie i. Lanwani ii, Israyeli yaaba den ye Kadeci i. ¹⁸ Israyeli yaaba den tɔgni mi fanpienma nni, ki kogni Edomi yeni Moabi diema, ki teli Moabi diema puoli, ki ban kali Arinoni kpepuoli. Ama bi den ki kua Moabi yaaba diema nni, kelima Arinoni kpenu n den tie u bianu. ¹⁹ Israyeli yaaba den sɔni a tonda, Siyɔn po, Amori yaaba bado kani, yaaba n die Hecibɔn diema yeni; Israyeli yaaba den yedi o, 'Ti mia ŋa ke ŋan cabi ti u sanu, tin pɔndi a diema ki gedi ti ya diema nni. ²⁰ Ama, Siyɔn den ki dugi Israyeli yaaba po, ki ba cabi ba ban pɔndi o diema. Lanwani ii, Siyɔn den taani o tɔgoli ke bi pua bu tɔbu yeni Israyeli yaaba. ²¹ O Diedo, Israyeli yaaba Tienu den taa Siyɔn yeni o niba ki tieni Israyeli yaaba nuu nni, ke bi kɔni ki paadi ba. Lanwani ii, Israyeli yaaba den diedi Amori niba yaaba n den ya li dogu nni diema kuli. ²² Israyeli yaaba den diedi bonli kuli Amori yaaba diema nni, ki cili Arnoni, ki ban pundi Jaboki, ki go taa mi fanpienma, ki ban tuoni Jurden kpenu. ²³ Lanwani ii, O Diedo, Israyeli yaaba Tienu den deli ki yaani Amori yaaba yo, ke Israyeli yaaba fidi ki pundi, mɔlane, a ji bua ŋan diedi bi diema yo oo? ²⁴ I kan gedi ki diedi i bulo Cemoci ń puni yi ya diema aa? Lanwani ii, lan ga maama kuli i, O Diedo ti Tienu ń puni ti ya diema kuli, li buali ke tin diedi ma i. ²⁵ Mɔlane, fini n cie Sippori bijua, Balaki, Moabi yaaba bado oo? O den tuo ki tieni maamaba yeni Israyeli yaaba aa? O den kpeli ki bɔdi tɔbu yeni Israyeli yaaba aa? ²⁶ Hali Israyeli yaaba ń kua Hecibɔn diema nni yeni mi dogbila kuli, yeni Aroweri yeni mi dogbila kuli, yeni li dociami kuli n baagi Arnoni kpenjaali kuli, bina kobitaa n yeni. Be nan cedi ke ŋaa den fie li diema lanyognu kuli? ²⁷ Mini nan ki tieni a yaali n bia, ama fini n tieni nni ti tuonbiadi, ki cua ki pigni nni yeni bu tɔbu. O Diedo yua n tie ti buudi yudaano ba jia ti buudi Israyeli yaaba yeni Amoni yaaba siiga." ²⁸ Ama, Amoni yaaba bado den ki cengi Jefita ń den sɔni ke bi tuodi ki waani o ya maama. ²⁹ O Diedo Foŋanma den kua Jefita yuli nni, ke o kua Gileyadi nni, ki gedi Manase diema nni, ki gedi Misipa, Gileyadi diema nni. O den ñani Misipa, ki kua kua Amoni yaaba siiga. ³⁰ Jefita den niani O Diedo u ñɔnianu, ki yedi, "A ya cedi ke n kɔni ki paadi Amoni yaaba yeni ti kpiagdi, ³¹ N ya Amoni yaaba po, ki kpendi n denpo, yeni mi yanduanma, ke yua n tuogi nni kuli, o baa tie O Diedo paabu i. N ba puni wani O Diedo wan tua padjuukaali." ³² Lanwani ii, Jefita den kua Amoniyaaba siiga, ki pua bu tɔbu yeni ba, ke O Diedo cedi ke o paadi ba yeni ti kpiagdi. ³³ O den paadi ba, ki kpa ba boncianla, ki cili Aroweri, ki ya caa Miniti, o den fie dociami piilie, hali yeni Abeli Keramimi. Lanwani ii, Israyeli yaaba den paadi Amoni yaaba cain, ki diedi ba. ³⁴ Jefita den pundi Misipa, o denpo, ke o bisalo ñani ki ba tuogi o yeni bi gangapuaba yeni a cajelda. Wani n den tie o bonpoyenga. wani yaaka, o ki pia bonjaga ki buali bonpuoga. ³⁵ Jefita ń li la o bisalo ke o togdi o ki bua biali o, ke o padi o tialakaadi, ki yedi, "Hain! N bisalo! A tuogi nni, ki kuani nni u nufanu nni, fini n tie yaaba n lingi npo li yubɔnli siiga nni yendo! Kelima, n niani O Diedo u ñɔnianu, ki nan kan fidi ki kandi li nɔnianu po." ³⁶ Ke o bisalo yedi o, "N báa, a niani O Diedo u ñɔnianu, tieni nni ŋan niani yaali kuli, kelima, O Diedo bua tuu a yibalinba, Amoni yaaba po li panli i." ³⁷ O den yedi o báa, " ŋan da kandi li ñɔnianu po mini ya po. Ama ŋan puni nni ŋmaali lie, n ba gedi a juana po, mini yeni n dɔnlinba ki ban jaandi ki buudi, yeni min ba kpe kaa bani ja yeni yapo." ³⁸ O den yedi, "Gedi." O den cedi ke o gedi a juana po, ki ban buudi ki jaandi yeni o dɔnlinba yeni wan tie powandiali, ki ba kpe, kaa kuni ja yeni yapo. ³⁹ ŋmaali lie po ń pendi, ke o guani o báa kani, ke o kuani o ñonianu nani wan den niani maama yeni. Lanwani ii, o ji den kpe kaa bandi ja, ke li ji tua Israyeli yaaba po bogdili, ⁴⁰ Binli kuli, Israyeli yaaba bisiaba, bi jifanba ba gedi, ki tiadi, ki jaandi ki buudi dana na, Gileyadi yua Jefita bisalo po.