¹ Efrayima yaaba den taani bi niba, ki ppɔndi Safoni, ki sɔni ke bi yedi Jefita, "Be n cedi ke a gedi ki pua bu tɔbu yeni Amoni yaaba, ki nan ki yini ti ke tin yegi yeni a? Ti ba juu fini yeni a diegu kuli." ² Jefita den yedi ba, "Mini yeni n nitaanli den baa mi maama, ke mi tua tipo janjanma yeni Amoni yaaba. N den yini yi, ke i naa tuo ki ba faabi ti bi nui nni. ³ Min den sua ke i ki kpendi ki ba taani ti, n den luni n miali, ki paani n pali ki gedi ki ban tuogi yeni Amoni yaaba, ke O Diedo taani nni ke n paadi ba. Be yapo i, ke i cua dinne, ki bua pua bu tɔbu yeni nni?" ⁴ Jefita den taani Gileyadi jakɔnda ke bi tuogi Efrayima yaaba, ki paadi ba. Gileyadi yaaba den kɔni yeni Efrayima yaaba kelima, bi den maadi ba ya maama ne, "Yinba Gileyadi yaaba, i ki tie dotieba ka, i ñani Efrayima diema nni i, ki sani ki kua Manase diema nni." ⁵ Gileyadi yaaba den gedi ki jia Efrayima yaaba sanu, Jurden kpenu kani,ban ba duodi naani ki kuni. Efrayima yua ya sani ki pundi likani ki yedi, "Cabi mani nni u sanu min puodi," Gileyadi yaaba den yi yedi o, "A tie Efrayima yua yo oo?", o ya yedi, "N -n" ⁶ ban yedi o, "Yedi: Ciboleti," o ya yedi, "Siboleti" (kelima, o kan fidi ki yini ki teli lan buali maama), Gileyadi niba den yi cuo o i, ki kpa o, Jurden kpenpuodkaanu. Bi den kpaa Efrayima yaaba tuda piina n niba tuda lie li yognuu tɔbu nni. ⁷ Jefita den tua Israyeli gobdika, ki tieni bina luoba. Lanwani ii, Jefita,Gileyadi yua den kpe, ke bi piini o Gileyadi docianyendu nni i. ⁸ Jefita ya jamaano ń pendi, Betelhema jua, Ibisani n tua Israyeli gobdika. ⁹ O den pia bijaba piitaa. O den puni bi nilanba o bisiaba, ke bi kuani ba, ke omo taa bi nilanba bisiaba, ke o bijaba kuani ba ke bi tua bi puoba. O den tua Israyeli gobdika bina lele i. ¹⁰ Ibisani den kpe ke bi piini o Betelhema. ¹¹ Wani ń pendi, Sebuloni jua, Elini n den tua Israyeli gobdika. O den gobdi Israyeli diema bina piiga. ¹² Sebuloni yua, Eloni den kpe, ke bi piini o Ayijalɔn dogu nni, Sebuloni diema nni. ¹³ Eloni jamaano ń pendi, Hileli bijua Abidoni, Piratoni yua n den tua gobdika Israyeli diema nni. ¹⁴ O den pia bijaba piina yeni yaabila piitaa, bikuli jaba. Bi den yi jagi ŋunbi piilele; o den gobdi Israyeli diema bina niin. ¹⁵ Piratoni yua, Hileli bujua, Abidoni den kpe ke bi piini o Piratoni dogu nni, Efrayima diema nni, Amaleki yaaba juana diema nni.