¹ Israyeli nitaanli go den tieni yaali n bia O Diedo nintuali, o den taa ba ki tieni Filisitini yaaba nui nni, ke bi la fala bina piina. ² O ja den ye, ki tie Sora yua, ki tie Dani cugli nni yua, o den yii Manowa. O denpua den tie ŋɔlga i, o den ki mali biga. ³ O Diedo Maleki den dɔgdi o pua yeni po, ki yedi o, "Diidi, a tie ŋɔlga, kaa mali biga, ama, a ba taa u tugu, ki mali bonjaga. ⁴ Mɔlane, ŋan fangi a yuli, ki da ñu daamɔngu yeni daapaalma kuli, ki da ŋmani bii ki di O Diedo ń waani yi ke yaali n tie jɔgindi kuli. ⁵ Diidi, a ba punbi, ki mali bonjaga. Pengu kan tuuni o yuli po, o ki tie kuoka, kelima li biga baa tie yua n gagdi ki dagdi O Diedo po hali o naá tugu nni. Wani n ba cili ki faabi Israyeli yaaba Filisiti yaaba nui nni. ⁶ O pua den kpeni, ki togdi o calo, "U Tienu nilo cua n kani, ki tie nani U Tienu Maleki yeni, O bona pia yaalidgu. Mii buali o wan ñani naani, om ki waani nni o yeli. ⁷ O yedi nni, 'Diidi, a ba punbi ki mali bonjaga. Lanwani ii, ŋan da ñu daamɔngu, yeni daapaalma, ki da di ya jiema ke yiko waani ke mi tie jɔgindi, kelima li biga baa tie U Tienu ń tuodi ki gagdi yua, ki cili hali o naá tugu nni ki ya caa hali o kuuma.'" ⁸ Lanwani ii, Manowa den jaandi ki mia O Diedo, ki yedi, "O Diedo, n mia ŋa sugli ke ŋan cedi ŋan sɔni U Tienu nilo yua yeni ń guani, ki tundi ti, ki waani ti, tin ba mali ya biga yeni, tin ba tieni maama." ⁹ U Tienu den jiini Manowa jaandi, ki cedi ke U Tienu Maleki yeni guani o pua kani, wan den kaa u kuanu nniya yognu. Ama, o calo, Manowa den ki ye o kani li yognu. ¹⁰ Lanwani ii, o pua den sani tontoni, ki ban yedi o calo, "Diidi! O nilo yua n den cua n kani landaali yeni guani ki dɔgdi npo." ¹¹ Manowa den fii ki ŋɔdi o denpua. Wan pundi li nilo kani, o den buali o, "Fini n tie ya nilo n den dɔgdi ki maadi yeni n denpua, landaali yeni ii?" Li nilo den yedi, "Mini n yeni." ¹² Lanwani ii, Manowa den yedi, "ŋan maadi o ya maama yeni ya tii, ti ba cɔlni a laa fuuna i, ki biga yeni po, Ti ba tieni be i, li biga po, o ba juodi ledi i? ¹³ O Diedo Maleki den yedi Manowa, "O pua ń cɔlni min yedi o yaali, lan buali maama. ¹⁴ O kan ñu daamɔngu yeni daapaalma, ŋan da cedi wan di O Diedo ń kuani yi ya jiema ke mi jɔgni. Wan cɔlni mi waani o yaali bonŋanla." ¹⁵ Manowa den yedi O Diedo Maleki, "N mia ŋa ke ŋan guudi waamu, tin ŋanbi apo ki ŋuabuaga, ŋan je." ¹⁶ O Diedo Maleki den yedi Manowa, "Bá n ya guudi, n kan je i jiema. Ama i ya bobni padjuukaali, yin puni O Diedo (Manowa den ki bani ke o tie O Diedo Maleki.) ¹⁷ Manowa den buali O Diedo Maleki, "Waani ti a yeli, li ya tie ke ŋan yedi ya maama tii, tin fidi kipugi a." ¹⁸ O Diedo Maleki den buali o, "Be n cedi ke a buali nni n yeli? Li pia yaalidgu!" ¹⁹ Lanwani ii, Manowa den cuo ki ŋuabuaga, ki bobni mi jiema, ki padi ku tangu po, ki puniO Diedo. O den tieni yaalidgu bonli ke Manowa yeni o denpua la. ²⁰ U mupienu ń den ñani li padbinbindli po, ki liabi, ki do tanpoli, O Diedo Maleki den yugi ki doni u mupienu nni, ki yaadi. Manowa yeni o denpua ń den la lani, bi den baa ki labni. ²¹ O Diedo Maleki ji den ki guani ki dɔgdi Manowa yeni o denpua kani. Lani n den cedi ke Manowa bandi ke o bi tie O Diedo Maleki i. ²² Manowa den yedi o denpua, "Laa pia tama, ti ba kpe, kelima, ti la U Tienu!" ²³ Ama o denpua den yedi o, "O Diedo ya bi bua kpa ti, o bi kan ga ti padjuukaali yeni ti jiema paabu. O bi kan waani ti wan waani ti yaali ne kuli, o bi kan cedi tin gbadi li maama mɔno." ²⁴ Lan den pugni a dana waamu, Manowa denpua den mali bonjaga, ke o yini o Samisoni. Ki biga yeni den findi lan buali maama, ke O Diedo yadi o po mi yedŋanma. ²⁵ O Diedo Foŋanma den fiindi o gbanu, ki sua ke bi ye Mahane Dani, Sora yeni Ecitawoli siiga.