¹ Samsoni den gedi Timina, o den la o pua , ke o yama kua o niinni, o den tie Filistini yua bisalo i. ² Wan den guani ki kuni, oden maadi o báa, yeni o naá, "N la pua Timina dogu nni, o tie Filisitini yua bisalo i. N bua yin taa o npo, wan tua n denpua." ³ O báa yeni o naá den yedi o, "Pua ki ye a kpiiba siiga nni ne, bii li nitaanli bisiaba siiga nni ne ee? A ba gedi ki ban taa yaaba n ki kua kɔnciagu siiga nni i, a denpua aa? Samsoni den yedi o báa, "Taa o npo, kelima min la o, n yama kua o niinni boncianla." ⁴ Ama o naa yeni o baa den ki bani ke li maama tie O Diedo tuonli i, kelima, o den bua wan bɔdi janjanma i Filisitini yaaba po, (kelima li yogu, Filisitini yaaba n den die Israyeli). ⁵ Samsoni den yegi yeni o naá, yeni o báa, ki caa Timina, ban pundi Timina daamɔngu tiidi kuanu nni, ke o la li yangbanpanli, ke li togdi Samsoni, ki buudi, ki nanli o. ⁶ Ke O Diedo Foŋanma kua o niinni, ke o cuo o yangbanlo, ki dadi ki padi o nani ban padi ki ŋuabiga maama yeni, o nan den ki muubi jatiagu. Ama, o den ki tigdi o báa bii o naá wan tieni yaali. ⁷ O den gedi ki boe yeni o pua, Samsoni den diidi ki sua ke o yama kua o pua yeni niinni. ⁸ Danaba n pendi, o den guani ki caa li pocaali, o den pɔni ki ba diidi o yangbankpimo. O den la ke i sii gobi o yangbankpiemo, ki tagi ti siadi, ki gbieni o. ⁹ O den bɔdi ti siadi ki tieni o nuu nni, ki di ki caa. Wan den guani o báa yeni o naá kani, o den teni bimo, ke bi dini li siadi. Ama, o den ki waani ba ke li siadi ñani yangbankpiemo niinni i. ¹⁰ Samsoni baa den jiidi ki gedi o pua ń ye naani, ki Samsoni bobni mi pocaajiema u badu po, nani bi jawaaba ń yi maani ki tie maama yeni. ¹¹ O pua kpiiba ń den la Samsoni, bi den yini o pua dɔnlinba bonba piitaa, ke bi ye yeni o. ¹² Samsono den yedi ba, "Cedi mani min telini yi i telmi. I siiga nni, yua n fidi ki bundi, ki waani li niima nni, u badu danleleda ne siiga, n ba lani yi leni sogdigbana piitaa yeni badliada piitaa. ¹³ Ama, i ya ki waani nni li niima nni, yinba n ba teni nni leni sogdigbana piitaa yeni badliada piitaa." Ke bi yedi o, "Telini ti a telmi, tin cengi." ¹⁴ Ke o yedi ba, "Mi bonjiema ñani yua n di niinni; li bonmanli mo ñani o gbanmandaano niinni." Ama, o canba den ki fidi ki bundi li daataali daali. ¹⁵ Li daanaali daali, bi niba yeni den yedi Samsoni denpua, "Tieni ania, a calo ń bundi tipo u tilmu yeni, lanyaaka, ti ba juu fini yeni a baadiegu kuli. I yini o ke wan cua ki fie ti piama, ki kuani ti mi cacagma nni yo oo?" ¹⁶ Samsono denpua den cili ki buudi o nintuali, ki tua, " ŋan tieni yaali kuli ne tie naga i, ŋaa bua nni. A tilini n kpiiba u tilmu, a naa waani nni li niima nni." Samsoni den yedi o, "Diidi, n ya ki waani n baa yeni n naa, n ji ba waani fini yo oo?" ¹⁷ O pua yeni den buudi u badu danleleda yaa den sieni. Li danleleli daali, o den waani o denpua u telmu niima nni, kelima o den mabni o boncianla. Omo den togdi o kpiiba u telmu niima nni. ¹⁸ Li danleleli daali, ki sua ke u yienu da ki baa, bi niba yeni den yediSamsoni, "Be n mani ki cie ti siadi? Be n pia u gbanmanu ki cie o yangbanlo? Samsoni den yedi ba, "I yaa bi bugni n naasali, ki koni, i bi kan bandi u telmu ne niima nni." ¹⁹ O Diedo Foŋanma den kua Samsoni yuli nni, ki pugni o u fidu. Samsona den gedi Acikeloni, Filisitini diema nni, ki kpaa jakɔnda piitaa. O den taa bi tiafagikaadi, ki ñani ti tialakaadi, ki teni yaaba n bundi u telmu. Samsoni den guani ki kuni o baadiegu yeni pabiencianli i. ²⁰ Bi den taa Samsoni denpua ki teni o potondo i.