¹ A dana waamu ń pendi, ban taagi ya yognu kpanu yoma muuli yeni, Samsoni den cuo ŋuabuali, ki gedi ki bua fuondi o denpua. O den yedi o pali nni, "N ba kua n denpua dieli nni." Ama, o pua báa den yie, ke o ka kua. ² O pua baa den yedi, "N den tama ke a nani o, ki ki pua o i, ke n taa o ki teni a potondo. O ninsawaaga ye, hali ki go ŋani ki cie wani, bii waa ŋani ii? taa wani wan tua o kpelo lebdu." ³ Samsoni den yedi ba, "Mɔla wani ii, n ya tieni Filisitini yaaba biadma, li nan kan tua npo tagli." ⁴ Samsoni den gedi ki cuo saacila kobitaa, ki taani bi juona, ki loli a, alie lie, ki taa u naamaanu, ki loli juona lie kuli siiga. ⁵ O ya cuoni u naamaanu, wan ŋa a saacila ban kua Filisitini yaaba kuanu nni, ke bi ceni bi kpaangu, ki loli bonbaba, ki bili bontintiana mo. A saacila yeni den sia u kuanu, ki taani yeni ku daamɔgu tiidi kuani, yeni Olifie tiidi kuani kuli. ⁶ Filistini yaaba den buali biyaba, "ŋma n sɔni lanya tuonli?" Bi den waani ba ke Timini yua Samsoni n sia bi kuani, kelima o cuado taa Samsoni denpua, ki teni o potondo. Lanyapo i, ke Filisitini yaaba den gedi ki juu o pua yeni o báa kuli. ⁷ Samsoni den yedi ba, "Yin tieni yaali n yeni ii? Lanwani ii n ba tuu n panli yo, lan fidi ki gbeni," ⁸ O den pua ki janbi ba, ki jia ba bonjena ki bili ba. Lani ń pendi, ke o gedi ki ban kua Etami tanlongu nni, ki ye likani. ⁹ Filisitini yaaba den bobni ki cua, ki bua pua u tɔbu yeni Juda buolu yaaba, ki kaani bi tɔgoli Lehi dogu nni. ¹⁰ Juda yaaba den buali, "Be yapo i ke i cua ki bua pua u tɔbu yeni ti?" Bi den jiini, "Ti cua ki bua loli Samsoni, ki gedi ki tieni o nani wan tieni ti maama yeni i." ¹¹ Lanwani ii, Juda yaaba jaba tuda taa den jiidi ku tanlongu nni, Etami tangu kani, ki yedi Samsoni, "ŋaa bani ke Filisi tini yaaba n die ti ii? A nan sɔni ti be ya tuona n yeni?" Samsoni den yedi ba, "Bi lingi nni mi maama, ke nmo tieniba yeni." ¹² Bi den yedi Samsoni, "Ti jiidi ki cua ke tin loli a, ki teni Filisiti yaaba i." Samsoni den yedi ba, "Poli mani ke yinba iba kan kpa nni." ¹³ Bi den jiini o, "N -n, ti ba loli a yeni i baaba baba i, ki tieni a Filisiti yaaba nui nni. Ti poli ke ti kan kpa o." Lanwani ii, bi den loli o yeni baabpaani lie, ki ñani o ku tanlongu nni. ¹⁴ Wan den pundi Lehi, Filisiti yaaba den yigni ki togdi o. O Diedo Foŋanma den kua o niinni, ki pugni o u gbanmanu yeni u fidu. Ya baabi n den luoli o nui yeni den tua nani ban juu ya gaali yeni i, ki sondi ki baa. ¹⁵ Samsoni den la ya ŋunyaagu n sɔngi, ki taa, kp kpaa jaba tudli yeni li ŋunyaagu. ¹⁶ Samsoni den yedi, "N kpaa bi niba ki dogin dogni yeni ku ŋunyaagu, Yeni ŋunyaagu, n kpaa jaba tudli." ¹⁷ Samsoni ń den maadi yeni ki gbeni, o den luni ku ŋunyaagu, ki yini likani Ramati Lehi, (ku ŋunyaagu juali). ¹⁸ U ñuñuunu den cuo Samsoni, ke o jaandi ki mia O Diedo, ki yedi, "A puni a naaciemo u sanu ke n paadi ba yeni ti kpiagdi. Ama mɔlane, n ji ba kpe yeni ñuñuunu yo oo, n ji ba baa ki kpe yaaba n ki kua kɔnciagu ne siiga nni ii?" ¹⁹ U Tienu den pua ki yagdi ku tangu, ke mi ñima pudi li ñinbunli nni, ke Samsoni ñuni, ke o yama duani, ke o guani ki baa o paalu. O den yini li ñinbunli, Eni Akore, lani n tie "Yua jaandi ñinbunli." Hali yeni mɔla kuli, li ñinbunli dá ye Lehi. ²⁰ Samsoni den tua Israyeli gobdika bina piilie i, ya yogu ke Filisti yaaba den die ba.