¹ Samsoni den gedi Gasa, ki la li poconconli, ki kua ki dua o, o dieli nni. ² Gasa yaaba den gbadi o maama, "Samsoni cua nekanba." Gasa yaaba den lindi ki cebni li kani ŋasiili nni, bi den sedi bu buñɔcianbu kani ñiamungu, ki guu o ñama. Bi den see li ñiagu, ŋminnŋminli. likani. Bi den juogi bi ŋmiali nni, ki yedi, "Ti ba guudi o ñiamungu, hali lanfandi, tin kpa o." ³ Samsoni den dua u duanu po hali yɔgsiigu. Ku yɔgsiigu, o den fii ki figdi bu bulnɔcianbu ganli yeni li kudlaana daacaada yeni li daapanda kuli, ki bugi ki duoni ya juali n ye Hebrɔn po yeni, ki bili likuli lankani. ⁴ Lani ń pendi, Samsoni den la ya pua n kua Soreki tialu nni, ki dagi o. Li pua den yii Delila. ⁵ Filisiti yudanba den cua ki la li pua, ki yedi o, "Mɔndi ki niidi o jane, ki bandi o gbanmanciamu yeni ń ñani naakani, yeni tin ba tieni maama ki miidi o, ki tadgi o, ki fidi ki fiagi o. A ya tieni yeni, ti siiga, yuakuli ba teni a ligdibala tudli n kobga (1.100) ⁶ Lanwani ii, Delila den yedi Samsoni, "N mia ŋa, ke ŋan waani nni a gbanmanciamu ne ń ñani naani, yeni ban ba tieni maama ki miidi a, ki paadi a." ⁷ Samsoni den yedi o, "Bi ya loli nni yeni dabanbaabi lele, yii n dá sɔngi, n ba tadgi, ki ya tie nani ja kuli yei i. ⁸ Lanwani ii, Filisiti yudanba den cua yeni dabanbaabi lele, yii n dá sɔngi, ki teni Dalila, ke o loli Samsoni. ⁹ O den cedi ke bi jaba kua ki wuoni o dieli liiga po i. O ji den yedi Samsoni, "Haya! Samsoni, Filisiti yaaba n ludi, ki ba pigni a yeni!" Ama, Samsoni den cie i dabanbaabi yeni nana u mu ń yi sia ya suobu yeni i. Lanwani ii, o pua den ki fidi ki bandi o gbanmanciamu ń ñani naani. ¹⁰ Delila den yedi Samsoni, "Diidi, a bɔndi nni, ki pua nni mi tofaama. N mia ŋa ŋan waani nni ban ba tieni maama ki miidi a, ki tadgi a." ¹¹ O den yedi o, "Bi ya loli nni yeni baabpaani, yii n dá ki loli bonli, ba tadgi, ki ya tie nani ja kuli yeni i." ¹² Delila den taa baabpaani ki loli Samsoni, ki ji yedi o, "Samsoni, Filisiti yaaba n paa, ki bua pigni a yeni!" Bi niba den wuo li dieli nni liiga po, ki ba ña ki pigni o. Ama, Samsoni den cie i baabpaani yeni na kunkungaali yeni i. ¹³ Delila den yedi Samsoni, "Hali yeni mɔla kuli, a dá likubi nni, ki bɔndi, ki pua nni mi tofaama i. Waani nni ban ba tieni maama, ki miidi a, ki tagdi a." Samsoni den yedi o, "A ya lugi n yupianleledi ne, ki kuani i gaalsiedi nni, ki lugi ki tabni yeni a luga maasini, n ba tadgi, ki tua nani ja kuli yeni i." ¹⁴ Delila den juuni ke o guani, ke o nagni mi lugma tiagu, ki dadi o yupianleledi, ki kuani i gaalsiedi nni, ki lugi ki tabni yeni mi lugma maasini, ki ji yedi o, " Samsoni,Filisiti yaaba n paa ki bua pigni a yeni! O den findi mi guama nni, ki dadi ki ŋabi wan den lugi o yupianleledi ki taani yeni ya lugma maasini yeni. ¹⁵ Delila den yedi o,"A ba tieni ledi ki yedi ' N bua ŋa,' ki nan ki tuo ki ba bɔgdi nni a ŋasiili i? A bɔndi nni taalma taa n yeni, ki naa waani nni a gbanmanciamu ne ń ñani naani. ¹⁶ Daali kuli, o den li niidi o, ki mabindi o boncianla yeni mi maacianma, ke o ti nandi mi kuuma. ¹⁷ Lanwani ii, Samsoni den kadi ki waani o i mɔmɔni, ki yedi o, " Hali min mali, pengu dá ki tuuni n yuli po, kelima n tie U Tienu ń gagdi yua hali o naá tugu nni i. Bi ya kuo nni, n gbanmanu ba yaadi ki ŋa nni i, lanwani ii, n ba tadgi ki tua nani ja kuli yeni i." ¹⁸ Delila ń diidi ki sua ke Samsoni waani o bonli kuli lan buali maama, kaa wuoni o libakuli yeni, o den sɔni ki yini Filisiti yudanba, ki maadi ba, "Mɔla wani ii, yin bobni ki cua, kelima o waani nni bonli kuli o yema po o." Lanwani ii, Filisiti yudanba ji den bobni ki caa, ki kubi a ligdibala i. ¹⁹ Delila den cedi ke Samsoni duani o pana po ki guani i. O den yini jayendo ke o cua ki kuo o, ki ñani o yupianleledi, ke o diidi ki sua ke o tadgi, kelima, o gbanmancaimu den yaadi ki ŋa o. ²⁰ Delila den yedi o, " Samsoni, Filisiti yaaba ludi ki ba pigni a! O den findi o guama nni, ki yedi, "N tidi ba ña nani kpiama yeni i, ki fegi ki ŋmadi." O den ki bani ke O Diedo ŋa o. ²¹ Filisiti yaaba den cuo o, ki pudi o ninbina. Bi den taa o, ki gedi yeni Gasa, ki loli o yeni ti kumɔndi kudseseli. O den dia, ki bindo li naatanli, ki naana li naali li kpaadidieli nni. v 22 Ama, ban den kuo o yeni, o yudi ji den guani ki pudi i. ²³ Filisiti yudanba den taani, ki bua padi bi bulo Dagoni li padcianli, ki mangi bi pala. Bi den yedi, "Ti bulo cuo ti yibali, Samsoni ki tieni ti nui nni." ²⁴ Bi niba ń den la Samsoni, bi den yigni ki dondi bi bulo, ki tua, "Ti bulo cuo ti yibali Samsoni, ki tieni ti nui nni. Wani yua n den bolini ti dogu, ki kpaa ti siiga nni, bi niba boncianla." ²⁵ Ban den cili bi badu, bi den yedi, "Yini mani Samsoni wan tieni ku jelgu tipo, tin baa ki laa waamu." Bi den ñani Samsoni li kpaadidieli nni, ki cedi ke o jeli ku jelgu, ke bi laa. Bi den sieni o ki kuli ku dɔngu jaantalginba kani i. ²⁶ Samsoni den den yedi ya jawaalo n den kubi o nuu, ki dadi o, "Cedi min sii ku dɔngu jaantalginba, ki sedi ki deni." ²⁷ Ku dɔngu den gbie yeni niba baba i, bijaba yeni bi puoba. Filisiti yudanba kuli den ye li dɔngu nni. Ku dɔngu poli po den pia ya niba n pundi tuda taa (3.000), bi jaba yeni bi puoba kuli, ke bi ñuadi Samsoni jelgu. ²⁸ Samsoni den jaandi ki mia O Diedo, ki yedi, "O Diedo, U Tienu, n mia ŋa ke ŋan tiadi npo! Pugni nni u fidu, mini n baba, min baa ki tuu Filisiti yaaba n nuni fiadima panli." ²⁹ Samsoni den cuo ku dɔngu ń tua ya jaantalglieda yeni, yenli o nuuganu, tianli mo, o nuujienu, ki buani, ki tudi. ³⁰ Samsoni den yedi, "Cedi min kpe yeni Filisiti yaaba!" O den tudi yeni u paalu, ke ku dɔngu libi Filisiti yudanba po, yeni ya niba n den ye lieni kulo po. Lanwani ii, wan den kpaa ya niba, ki mo kpe den yabi ki cie wan kpaa yaaba kuli o yema nni. ³¹ Lanwani ii, o ninjaba yeni o diegu nni yaaba den jiidi ki cua likani. Bi den taa o ki guani ki kuni yeni o, ki ban piini o Sora yeni Ecitawoli siiga nni, o báa Manowa kakuli nni. Samsoni den tua Israyeli gobdika, ki tieni bina piilie i.