¹ O ja den ye Efrayima juali diema nni, ke bi yii o Mika. ² O den yedi o naá, "N den gbadi ke a solgi yua n suni a ligdibala tudli ǹ kobga (1.100). Diidi, Mini n den taa li dibala, mini n suni." O naa den yedi o, " N bijua, O Diedo ń yadi mi yedŋanma opo!" ³ O den ŋmiani o naá li dibala, tudli n kobga (1.100), ke o naá yedi, "N den paadi ki bili li dibala O Diedo po i, n den bua n ban kpiedi, ki go duadi kudi nannana n bijua po i, lanwani ii, n ba guani ki teni a li dibala. ⁴ Wan den ŋmiani o naá li dibala, o naá den teni dibala kobi lie, ki cedi ke yua duadi ti kudi duadi, ki go kpiedi nannana, ki sieni Mika dieli nni. ⁵ Mika den pia o jaandidieli, ki cedi ke bi tagi buli yeni ban kpiedi, ki go duadi ya bonannana yeni, li dieli nni, ki ga o bijaba nni, yendo, ke o tie o salga yidkaa. ⁶ Li yogu, bado den ki ye Israyeli diema nni, ke yuakuli tie wan bani maama. ⁷ Li yogu, jawaalo den ye Betelhema dogu, Juda diema nni, ki tie Juda buolu yua, ki tie Lefi buolu yua. O den ye likani , ki tuuni o tuona. ⁸ Li nilo den ñani Betelhema, ki gedi ki bua lingi wan baa ye naani. Wan den tie sancenlo yeni, o den pundi Efrayima juali nni, Mika denpo. ⁹ Mika den buali o, "A ñani le i?" o jawaalo den yedi o, "N tie Lefi yua i, ki ñani Betelhema, Juda diema nni, n gɔdi ki lingi min baa ye naani i." ¹⁰ Mika den yedi o, "ŋan kali n kani, ki ya tie n báa yeni n salga yidkaa, n baa pa ŋa dibala piiga binli nni, ki bobni a tiayiekaadi, yeni a daali jiema." Lanwani ii, Lefi ja den kua o dieli nni. ¹¹ Lefi buolu yua pali den mani yeni wan ye yeni Mika, o den tie o po nani o bijua yeni i. ¹² Mika den gagdi o jawaalo yeni, ke o tie opo salga yidka, ki ye o dieli nni. ¹³ Mika den yedi o, "N bani mɔla, ke O Diedo ba ŋanbi bonli kuli npo, kelima, n pia Lefi buolu yua, ke o tie n salga yidka."