¹ Lanyognu, bado den ki ye Israyeli diema nni. Dani buolu yaabila den lingi u kaanu, ban ba kua naani, kelima, bani dá den ki la bi tinbiinu Israyeli yaaba buoli siiga. ² Dani buolu nitaanli den sɔni bi siiga nni, jaba mu, yaaba n tie jakɔndbiema, ki ñani Sora yeni Ecitawoli, ke ban gɔdi, taatinga, ki kpaagi, ki bandi ki tinga ń dua maama. Bi den yedi ba, "Gedi mani ki ban lingi mi diema, ki diidi man tie maama." Bi den pundi Efilayima juana nni, Mika denpo, ki duani likani, ke li fandi. ³ Ban den nagni Mika dieli kani, bi den gbadi Lefi jawaalo nialu, ki bandi. Bi den sedi, ki buali o, "ŋma n cua yeni a nekanba?" A tuuni be ya tuonli nekanba? Be ya po i ke a ye nekanba? ⁴ O den jiini ba, "Mika n ŋanbi mi yema npo, o pa nni, ke n tie o salga yidka." ⁵ Bi den yedi o, "Ti mia ŋa, ŋan buali O Diedo wan diidi tiu cuoni ya sancenli ya baa ŋani tipo." ⁶ Salga yidka den guani ki jiini ba, "Ya caa mani yeni mi yanduanma, O Diedo baa ye yeni yi, yin caa naani kuli." ⁷ Lanwani ii, li jamuudba den fii, ki gedi Layici, ki la ke likani yaaba den ye yeni mi yanduanma, nani Sidoni yaaba mo den ye maama yeni. Li yanŋaali den ye bi siiga, ke bonliba kuli ki baagi ba. Obakuli den ki ye mi diema nni, ki die ba, bii, ki mabindi ba. Biden kua ki fagiyeni Sidoni yaaba, bi den ki pia maamaba kuli yeni nilo. ⁸ Bi den guani ki kuni bi buolu yaaba po, Sora yeni Ecitawoli. Bi kpiiba den buali ba, "I pia be i, ki ba togdi ti i sancenli po?" ⁹ Bi den yedi, "Cua mani na! Tin gedi ki kɔni ki paadi ba! Ti la li diema ke mi ŋani hali boncianla. Da kaa mani fanma. Tieni mani tonma, tin gedi ki ban baa li diema. ¹⁰ I ya gedi, i ba la li diema nni yaaba ke bi ye li yanŋaali nni, kaa bangi libakuli po, li diema go tiani! U Tienu n tieni lanya diema i nui nni. Likani ki pia yaali n pɔdi ba mi diema nni." ¹¹ Dani buolu yaaba, jaba kobi luoba, den ñani Sora yeni Ecitawoli, ki bobni bi jatiadi, bu tɔbu po. ¹² Bi den fii ki gedi ki caani bi jondi Kiriyati Jeyarimi dogu nni, Juda diema nni. Lanya po i, ke bi yii likani Maane Dani, hali yeni mɔla kuli, li ye Kiriyati Jeyarimi nintuali i. ¹³ Bi den fii likani, ki gedi Efrayima juana diema nni, ki pundi Mika denpo. ¹⁴ Jaba mu yaaba n den gedi ki ba kpaagi ki lingi mi diema yeni, den yedi bi kpiiba, " I bani ke ku diegu ne nni, dieyenli nni pia ban kpiedi, ki go duadi ya bonnannana yeni ti kudi, ki tagi i buli ii? Yin jagiyin ba tieni maama. ¹⁵ Bi jamuudiba yeni den gɔgdi ki kua Lefi jawaalo yeni kani, Mika dieli nni, ki ba fuondi o. ¹⁶ Dani Jaba, kobiluoba yeni den see bu bulñɔbu kani, ki kubi bi tɔtiadi. ¹⁷ Ya jamuudba n den gedi ki kpaagi mi diema yeni, den taa ban duadi yeni ban kpiedi ya bonnannana, ki taa o bulo yeni li tuonsɔntiadi, ki sua ke salga yidka see u bulñɔbu kani yeni jaba kobi luoba yaaba n kubi ti tɔtiadi yeni. ¹⁸ Ban den kua Mika dieli nni, ki taa o bulo yeni a bonnannana, yeni li tiabobinkaadi kuli yeni, salga yidka den buali ba, "I tiendi be n yeni ii?" ¹⁹ Bi den yedi o, "Suoni, ki da yedi libakuli, cuo a ñɔbu, ki ya ŋua ti, ki tua ti ŋmagdika yeni ti salga yidka. A ya tie dieyengu nni yeni niyendo salga yidka, yeni ŋan ba tua Israyeli buolu yeni o cugli nni salga yidka, be n ŋani ki cie?" ²⁰ Salga yidka pali den mangi. O den taa o bulo yeni ban duadi ki go kpiedi ya bonnannana yeni li tiabobinkaadi kuli, ki ŋɔdi Dani nitaanli. ²¹ Bi den ta bi sani ki ban caa. Bi den tieni a bila yeni ti yandi yeni a tuga liiga. ²² Ban den fagdi yeni Mika deni, o kuantalieba den taani ki yii, ki ba sieni Dani yaaba. ²³ Bi den yigni ki kabni Dani yaaba, bi den gbagi, ki buali Mika, "Be pia yi, ke i taani ki yii ti ii?" ²⁴ Mika den yedi, "I nan suni n bulo, ki taa n bonnannana, ki go taa n salga yidka ki ban caa. I ji sieni nni be i? Be n cedi ke i go buali nni, "Be n mabindi a aa?" ²⁵ Dani buolu yaaba den yedi o, "A bi kan cedi tin gbadi a ñɔbu nni maama, lanyaaka bi pabiendanba ti siiga ba guani ki kpa ŋa, ki bolni a diegu kuli." ²⁶ Lanwani ii, Dani buolu yaaba den tugni bi sanu. Mika ń den sua ke bi paalu cie o yuu, o den guani ki lebdi, ki kuni o denpo. ²⁷ Dani buolu yaaba den taa Mika ń den tagi ya bulo yeni ya bonnannana yeni o salga yidka ki pundi Layici dogu nni, ya diema nni ke li yanŋaali yeni mi yanduanma den ye yeni, ki kpaa li niba kuli yeni ki jugsiega, ki juu u dociamu. ²⁸ Niloba kuli den ki ye ki ba faabi ba, kelima, bi den kua ki fagi yeni Sidoni, bi go den ki pia ŋantaadoba kuli yeni nilo. Li den tie jualɔngu nni i, ki kuu yeni Beti Rehobi. Dani yaaba den guani ki maa li dociamu, ki kali li niinni. ²⁹ Bi den yini li dociamu Dani, bi yaaja yua n den tie Israyeli bijaba siiga nni yendo ya yeli. Ama li dociamu yeli den tie Layici i. ³⁰ Dani buolu yaaba den sieni o bulo yeni a bonnannana yeni bi pada po. Moyiisi yaabili, Jercihomi bijua, Jonatan, wani yeni o bijaba n den tie Dani buolu yaaba po salga yidkaaba, hali yeni ban den ti cua ki baa ba, ki cuo bi diema nni yaaba ki gedi yeni ba ti yonbdi. ³¹ Lanwani ii, bi den ŋua ki pugi Mika ń den tagi ya bonnannana i, ya yognu kuli, O Diedo gbandieli den ye Cilo i.