¹ Ya yognu ke bado den ki ye Israyeli diema nni, o ja den ye , ki tie Lefi yua, ki jɔndi ki kua obá Efrayima juana nni. O den dagi ki taa ponanbangu, ke o tie Betelhema dogu nni, Juda diema nni yua. ² Ama o ponanbangu den lindi o puoli, ke bi kɔni, ke o sani ki gedi o baadiegu, Betelhema po, Juda diema nni. O den ye lanpo i, ki tieni ŋmaali na. ³ O calo den fii ki ŋɔdi o, ki bua ban baagi o, wan guani ki kpeni o denpo. O den taa o naaciemo, ke o yegi yeni o, yeni ŋunbi lie. O pua den ga o cangu, ki kuani o o baadiegu. O pua báa ń la o, o pali den mangi. ⁴ O cuadbaa den ga o, ki kubi o o deni hali dana taa. Bi den di, ki ñu, ki dua lankani i. ⁵ Li daanaali daali, bi den yagdi, ki fii, ke o cabi, ki ba kuni, ama, o cuadbaa den yedi o cuado, "sedi ki tuudi a ñ̃ɔbu, ki fidi ki kuni." ⁶ Bani bonba lie kuli den guudi, ki dini, ki go ñuni yeni o diedaano. O pua báa den yedi, "Guudi, ki duani, ki mangi a pali li ya faa, ŋan ŋanbi ki bobni a cenli ii." ⁷ Lan den fandi, ke Lefi yua fii, ki cabi ki ba kuni, o cuadbaa go den niidi o, ke o go duani o deni. ⁸ Li daamuuli daali, o den yagdi ki fii, ki bobni o sancenli, o cuadbaa den yedi o, "Guudi ki siibi, ki ti fii, u yienu ń ba sɔngi ya yognu." Lanwani ii, bani bonba lie kuli den sedi ki dini. ⁹ Lefi ja ń fii, ki bobni, ki ba kuni , wani yeni o pua yeni o naaciemo, o cuadbaa den yedi o, "Diidi, u yienu nagi mi baama. Guudi, ki duani, ki ŋanbi ki bobni a sancenli, a ba fidi ki yagdi ki fii, ki kuni a denpo." ¹⁰ Ama, Lefi ja ji den ki bua ke o duani li ñiagu o cuado deni. O den fii ki paani o sanu. O den teli Jibusi po, lani n tie Jerusalema. O den piā ŋunbi lie, ki maani a gaana ipo, ke o ponanbangu yegi yeni o. ¹¹ Ban de nagi Betelhema, u yienu den ŋmani ki baa ki gbeni o, o naaciemo den yedi o, "Cedi tin jadi Jebusi yaaba dogu nni ki duani, lan faa." ¹² O canbaa den yedi o, "Ti kan jadi ki duani doglamu nni, naani n ki tie Israyeli yaaba diema. Ti ba pendi ki gedi Jibeya i, ki duani." ¹³ Lefi ja den yedi o naaciemo, "Cua na tin gedi ya dogi n ye liiga ne, ki duani lankani, Jibeya, bii Rama." ¹⁴ Bi den tugni bi sanu, ki ban nagi Jibeya, Benjamina buolu yaaba diema nni, ki sua ke u yienu wani baa o. ¹⁵ Bi den jadi ki ba duani Jibeya i, lan faa. Bi den gedi ki kali jongu, ama, obakuli den ki bua wan ga bi cangu, ban duani. ¹⁶ Li den pugni waamu, ke jakpelo ñani i kuani po, ki kuni li yenjuogu. O den tie Efrayima juana nni yua i, ki den gedi ki kua Jibeya. Ama likani dogtieba tie Benjamina buolu yaaba i. ¹⁷ O den yaadi o nuni, ki la a sancenda, ke bi kaa jongu. O jakpelo den buali ba, "I ñani le, ki caa le i?" ¹⁸ Lefi ja den yedi o, "Ti ñani Betelhema i, Juda diema nni, ki caa Efrayima juana nni, tinkundogu, n tie lanpo ya yua i. N den gedi Betelhema, Juda diema nni, n bi bua min pundi O Diedo gbandieli kani, ama, obakuli ki ye, ki ba ciani nni. ¹⁹ Ti pia ti muadi yeni ti jiedi, ti ŋunbi po, ti go pia kpanu mo yeni ku daamɔngu mo, mini yeni n potuado yeni n naaciemo po, bonliba kuli ki pɔdi ti." ²⁰ O jakpelo den biali ba, ki yedi, "Mi yanduanma ń ya ye yeni yi! N ba lingi ipo yaali n pɔdi yi kuli, ama, yin da duani jongu wani." ²¹ O jakpelo den ga Lefi ja o denpo, ke bi nigdi bi taana, ki dini, k ñuni lan buali maama. ²² Ban den kaa, ki di yeni li pamanli, u dogu nni niba, nibiadba den cua o jakpelo deni, ki sedi, ki lindi, ki cebni ku diegu, ki pua bu bulñɔbu. Bi den maadi yeni o jakpelo, yua n tie o diedaano, ki tua, "Ñani ya caano n cua a deni yeni na, tin dua yeni o." ²³ O diedaano den ñani bi kani ki yedi ba, "N- n, n kpiiba, n mia yi ke yin da sɔni lanya tuonjɔgindi! Nani wan tie n caano yeni, yin da sɔni lanya tuongundigu! ²⁴ Diidi mani, n pia n bisalo, ke o da ki bani ja, o caano mo ya puonanbangu mo ye. Cedi mani min ñani ba yin tieni yin bua yaali yeni ba. Ama, yin da tieni o nilo ne tuonbiadi!" ²⁵ Ama, bi nibiadba yeni den ki cengi o diedaano, lanwani ii, Lefi buolu ja den cuo o ponanbangu, ki ñani o, ki teni ba. Bi den cuo o, ki nii ki dua yeni o ki lebdi, hali yeni mi faama, ke bi ŋa o. ²⁶ ku siŋaapanpangu, o pua den gedi ki baa, ki bili o calo ń ye naani, o diedaano bulñɔbu nni, ki dua likani hali ke ban fandi ki gbeni. ²⁷ O calo den findi ku siŋaagu, ki luodi a gana, ki ñani, ki bua tugni o sanu. O den la ke o ponanbangu dua bu bulñɔbu kani, ke o nui maa li bulñɔkɔli po. ²⁸ Lefi buolu yua den yedo o denpua, "Fii, tin gedi." Ama, o den ki gbadi o pua ñɔbu nni maama. O den taa o pua ki maani o ŋunbo po, ki kuni yeni o. ²⁹ Lefi buolu yua ń pundi o deni, o den taa ki juga, ki jia ki podpodi o denpua nandi, nanga nanga, piiga n biini lie, ki sɔni yeni li biini ki teni Israyeli yaaba ban ye naani kuli. ³⁰ Yaaba n den lani kuli, den yedi, "Hali Israyeli yaaba ń ñani Ejipti diema nni, ya bonli ne buolu dá ki kpeli ki tieni, ti go ki kpeli ki la li bonli buolu hali yeni ti kaa ya yognu ne. Tin kpaagi li tuada po bonŋanla, ki taani tiyaba, ki bandi tin ba jagi maama!"