¹ Israyeli yaaba kuli den taani ki cua nani niyendo yeni, ki taa Dani yaaba, ki ban gedi hali Beyerceba yaaba, ki taani yeni Jileyadi yaaba mɔno den ye, bikuli den taani biyaba O Diedo nintuali Misipa dogu nni. ² Buolu kuli yadanba den cugli kuli yudanba den den ye, ki kali U Tienu buolu nitaanli tantaanciangu. Jaba tuda kobi na (400.000), bikuli taatindanba, bikuli den bobni ki ba pua bu tɔbu, yeni ki jugsiega. ³ Benjamina yaaba den gbadi ke Israyeli yaaba tieni li taancianli Misipa po. Israyeli yaaba den yedi, "Waani ti lanya tuadbiadi ń tieni maama." ⁴ Lefi buolu yua, ban den kpaa ya pua calo den jiini, "N den pundi Jibeya, Benjamina yaaba diema nni, n den ye yeni n ponanbangu ki ba duani likani li ñiagu. ⁵ Ku ñiagu nni, Jibeya yudanba den cua ki sedi ki lindi n candiegu , ki bua kpa nni. Bi den fidi ki cuo n ponanbangu, ki kpaa wani ⁶ lanya po i ke n mo den taa n ponanbangu nandi ki jia ki podpodi, ki sɔni ki teni Israyeli diema nni, yaaba n den dini tinfaali kuli po, kelima bi tieni lanya tuonbiadi Israyeli diema nni i. ⁷ Mɔlane, Yinba Israyeli yaaba, yaaba n taani ne, yin teni yin pia ya gadi yeni ya cegli, tin diidi tin ba tieni maama." ⁸ Li nitaali kuli den fii nani niyendo yeni i, ki yedi, "Ti siiga nni, obakuli kan guani ki kuni o jongu nni, obakuli kan kuni o denpo! ⁹ Ama ti ba tɔa tiatia i, ki diidi tin ba tuogi Jibeya yaaba yeni bu tɔbu maama: Tiatia yeni n ba waani ti, tin ba taa ya sanbila ki tuogi ba. ¹⁰ Israyeli buolu yaaba kuli nni, niba kobga siiga, ti ba taa niba piiga, niba tudli siiga kuli, ti ba ñani niba kobga; niba tudapiiga siiga kuli, ti ba ñani niba tudli, bani n ba lingi ki taani mi jiema ya niba n ba gedi ki ban kɔni ki paadi Jibeya yaaba, Benjamina diema nni po, tin jiini ba ban tieni ya tuonbiadi Israyeli diema nni panli. ¹¹ Lanwani ii, Israyeli jakɔnda den taani nani niyendo yeni i, ki ba baa Jibeya dogu. ¹² Israyeli buoli den sɔni u tondu, ki bualiBenjamina buolu diema nniyaaba, ki yedi ba, "Be ya tuonbiadi, ke i tieni i diema nni, i siiga? ¹³ Lanyapo, yin ñani Jibeya nni ya nibiadba n sɔni li tuonbiadi, tin kpa ba, ki piini lanya tuonbiadi buolu, Israyeli yaaba siiga. ¹⁴ Benjamina yaaba mo den taani Jibeya dogu nni, ki ba bobni ki tuogi Israyeli yaaba bu tɔbu. ¹⁵ Benjamina diema nni yaaba ń den taani bi dogi nni kuli, ya jakɔnda, bu tɔbu po, den tie li daali tɔtieba tuda piilien tuda luoba (26.000), ban den bangi yaaba ban pua bu tɔbu maama yeni ki jugsiega. Ki pugni, Jibeya dogu nni mo den pia jakɔnda kobi lele (700), ban den gandi yaaba. ¹⁶ Bi tɔtieba yeni siiga, jakɔnda kobi lele den ye, bikuli ganbonba. Bikuli den ba fidi ki lugdi tanli, kicuo yugu, kaa luo gu. ¹⁷ Israyeli yaaba tɔtieba den tie bonba tuda kobina (400.000), kaa taani Benjamina yaaba, ban den bangi yaaba, ban pua bu tɔbu maama yeni ki jugsiega. Bikuli den tie jakɔnda i. ¹⁸ Israyeli yaaba den fii ki gedi Beteli, ki mia O Diedo i cegli. Bi den buali, "ŋma ba cili ki tuogi Benjamina diema nni yaaba tipo? O Diedo den yedi, "Juda buolu n ba cili ki tuogi ba." ¹⁹ Israyeli yaaba den fii ku siŋaagu nni, ki gedi ki caani bi jongu ki kuli Jibeya. ²⁰ Israyeli yaaba den ñani ki ba tuogi Benjamina diema nni yaaba. Bi den sagni bi tɔtieba Jibeya, ki ba tuogi ba. ²¹ Benjamina tɔtieba den ñani, ki kpaa Israyeli yaaba, jaba tuda piilie n tuda lie, li daali. ²² Ama, Israyeli yaaba den gedi ki jaandi, ki buudi O Diedo nintuali hali yeni ku yenjuogu, bi den buali O Diedo, "Tin go gedi ki ban pua bu tɔbu yeni ti kpiiba Benjamina yaaba aa?" O Diedo den yedi ba, "Tuogi mani ba!" ²³ Israyeli yaaba den paani bi pala, ki guani ki sagni bi tɔtieba nani ban den sagni ba maama kpiama yeni. ²⁴ Lanwani ii, Israyeli yaaba den tuogi Benjamina buolu yaaba mi liema. ²⁵ Li daalieli daali, Benjamina yaaba den ñani Jibeya, ki tuogi israyeli yaaba, bi den kpaa ba jaba piiga n tuda niin (18.000). Bikuli den tie yaaba n bangi bu tɔbu nunfanbu yeni ki jugsiega i. ²⁶ Israyeli tɔtieba yeni bi nitaanli den doni ki gedi Beteli, ki ban jaandi, ki buudi, ki kali O Diedo nintuali, ki padi a padjuukaana, ki yidi mi yanduanma salga, O Diedo po, hali yeni ku yenjuogu. ²⁷ Israyeli yaaba den buali O Diedo, kelima O Diedo ñɔmaatana kpagu den ye li yognu, lankani i. ²⁸ Eleyasari bijua, Finehasi, Haarɔn yaabila n den tie salga yidkaciamo li gbandieli nni lanyognu. Bi den buali, "Li buali ke tin go gedi ki tuogi ti kpiiba, Benjamina yaaba bu tɔbu, bii tin ji cedi i?" O Diedo den yedi ba, "Gedi mani saala ki tuogi ba, n ba taani yi, yin paadi ba." ²⁹ Lanwani ii, Israyeli yaaba den wuoni bi niba Jibeya yeni, ke baa bani. ³⁰ Israyeli yaaba den tuogi Benjamina yaaba mi taama, ki go sagni bi tɔtieba nani ban den sagni ba maama, kpiama yeni. ³¹ Benjamina yaaba den ñani ki tuogi Israyeli yaaba, ke bi sani ki fagdi yeni bi dogu. Benjamina yaaba den cili ki kpa Israyeli yaaba nani bonba piitaa yeni i kuani nni yeni i kuansani nni. sanyendu den caa Beteli po, ke u sanlielu caa Jibeya po. ³² Lanwani ii, Benjamina yaaba den yedi, "Ti paadi ba o, bi ji tiini ti nani kpiama yeni i." Ama, Israyeli tɔtieba den yedi, "Tin sani ki fagdi yeni ba yeni u dogu sanu." ³³ Israyeli yaaba tɔtieba den fii bikuli ki sagni Baali Tamari, bu tɔbu po. Israyeli tɔtieba yaaba n den wuoni yeni, den ñani bi wuonkaani, ki kua Maare Jibeya nni. ³⁴ Israyeli yaaba den lugdi tɔtieba tuda piiga, ke bi kua Jibeya nni. Bu tɔbu den mɔndi boncianla, ama, Benjamina yaaba den ki faami ya nufanu n ba pua ba po. ³⁵ O diedo den cedi ke Israyeli yaaba paadi Benjamina yaaba. Li daali, Israyeli jakɔnda den kpaa Benjamina yaaba bonba tuda piilie n tuda mu (25.000), bani yaaba n kpe yeni kuli den tie ban bangi yaaba ki jugsiega tɔbu puama i. ³⁶ Lanwani ii, Benjamina tɔtieba den diidi ki sua ke li paadi ba o. Israyeli jaba den tiini, ki dia Benjamina yaaba, kelima bi den dugi bi tɔtieba yaaba n wuo Jibeya lindma po yeni i. ³⁷ Lanwani ii, israyeli tɔtieba, yaaba n den wuo yeni, den laadi, ki ludu ki kua Jibeya nni, ki kpaa ban la ya niba kuli li niinni yeni ki jugsiega. ³⁸ Israyeli tɔtieba yeni ya tɔtieba n de wuo yeni den jagi ŋasiili nni, ke li tie bi maalma baa tie ya muñiigu n ba fii, ki do tanpoli kelima bi fidi ki baa u dogu, ku juu u. ³⁹ Israyeli tɔtieba ń den la ke ku muñiigu do u dogu nni, bi den bandi ke li dagdi ke ban ji lebdi ki tuogi Benjamina yaaba, ke bi ji cili ki kpa ba, bi den kpaa Israyeli yaaba nani bonba piitaa yeni, ki ji yedi, "Bi bandi ke ti paadi ba nani kpiama yeni, ke bi ji tiini ti." ⁴⁰ Ama, ku muñiigu ń den cili ki do Jibeya dogu nni, Benjamina yaaba den gbagi ki sua ke bi juu bi dogu kuli i, ke ku muñiigu do. ⁴¹ Lanwani ii, Israyeli tɔtieba den guani ki tuogi ba. Benjamina tɔtieba den wudi yeni ti jawaandi, ke bi gbanu kpe, kelima bi la nufanu n pua ba. ⁴² Lanwani ii, bi den sani Israyeli tɔtieba, ki lingi ban ciadi, ki kua mi fanpienma nni. Ama, bi den pibi ba yeni li kɔnli. Israyeli tɔtieba yaaba n den ñani u dogu po den pundi ban see naani, ki kpaa ba. ⁴³ Bi den cebi ki lindi Benjamina tɔtieba, ki deli ba, ki kpa ba, ki ban kɔli ba hali Noha, Jibeya puoli gamu. ⁴⁴ Yaaba n den kpe Benjamina yaaba siiga den tie niba tuda piiga n tuda niin, bikuli jakɔndbiema. ⁴⁵ Bi den lebdi ki sani, ki teli mi fanpienma po, Rimoni Tangu po. Israyeli tɔtieba den kpaa bi siiga nni bonba tuda mu, (5.000), ki pugni, u sanu nni, Bi den li ŋua ki deli ba i, ki tuuli ba, ki ban pundi hali Gidomi, ki kpaa likani mo bonba tuda lie (2.000), ki pugni. ⁴⁶ Ban den kpaa li daali, ya Benjamina tɔtieba den tie tuda piilie n tuda mu (25.000) yaaba n bangi bu tɔbu ninfanbu, yei ki jugsiega; bikuli den tie papaadanba. ⁴⁷ Ama, jaba kobi luoba (600) den sani, ki ciadi, ki teli mi fanpienma po, Rimoni tangu po. Bi den tieni ŋmaali na, ki dá ye Rimoni tangu po. ⁴⁸ Israyeli tɔtieba den lebdi ki guani ki kua Benjamina diema nni, ki kpaa u dogu nni niba, yeni ti yandi, yeni ban la yaali kuli. Bi sancenli nni, bi den juu u dogu kuli i.