¹ Israyeli yaaba den taani Misipa, ki niani u ñɔnianu, "Bi siiga nni, obakuli kan puni o bisalo Benjamina buolu yua, wan kuani o." ² Israyeli nitaanli kuli den gedi Beteli, ki kali O Diedo, bi tienu nintuali, hali yenio yenjuogu, Bi den tangi, ki yigni, ki buudi ninsipiendi. ³ Bi den buudi ki tua, "O Diedo, Israyeli tienu, be n cedi ke yaali n tieni ne ba cedi Israyeli buoli siiga, buolyendu ń bodi ii?" ⁴ Lan den fiifaa, li nitaanli den yagdi ki fii, ki maa padbinbindli likani, ki padi a padjuukaana, ki yidi mi yanduanma salga. ⁵ Israyeli yaaba den yedi, "Ti buoli kuli siiga, u laa buolu n den ki cua li taancianli, O Diedo nintuali?" Kelima bi den niani u ñɔnianu, ke u nua ya buolu n ki cua Misipa, li taancianli. Bi den yedi, "Yua n den ki ye li taancianli ne, li buali ke tin kpa o." ⁶ Mi niñma den cuo Israyeli yaaba, bi kpiiba Benjamina yaaba po. Bi den yedi, "Dinne, buolyendu pɔdi Israyeli buoli kuli siiga. ⁷ Ti ba le le i, bi puoba ki teni yaaba n sieni, kelima ti nan den niani u ñɔnianu O Diedo nintuali, ke, ti kan puni ti bisiaba Benjamina yaaba ban kuani ba?" ⁸ Bi den yedi, "Israyeli buoli siiga, u laa buolu n den ki cua Misipa taancianli?" Bi den diidi ki sua ke Jabeci Gileyadi yaaba n den ki cua. ⁹ Kelima i buoli yaaba ń den sagni, tuagu tuagu, ti den diidi ki sua ke Jabesi Gileyadi yua, bá niyendo den ki ye. ¹⁰ Li nitaanli den sɔni tɔtieba piiga n tuda lie, bikuli jakɔndbiama, ki yedi ba ke ban ban kpa Jabesi Gileyadi niba, bi puoba, bi jaba, yeni a bila. ¹¹ "I ya pundi, yin ba tieni yaali ne: yin kpa ya ja n dagdi ja kuli yeni ya puoba n bani ja kuli." ¹² Ban den sɔni ya tɔtieba, den baa Jabeci Gileyadi nni jafanba bonba kobina (400), yaaba n da ki bani jaba, biden gedi yeni ba Cilo, Kanana diema nni. ¹³ Li nitaanli den sɔni u tondu ki waani Benjamina yaaba yaaba n den ye Rimoni tangu po yeni, ke bu tɔbu gbeni, ke mi yanduanma guani mi diema nni. ¹⁴ Benjamina yaaba den guani, ke bi teni ba ban den baa ya jafanba Jabeci Gileyadi po yeni, ama, bi siiga nni, yuakuli den ki fidi ki baa pua. ¹⁵ Mi niñima den cuo Israyeli yaaba, Benjamina buolu po, kelima, yaali n tieni ke mi bɔgdima kua Israyeli buoli siiga, ke buolyendu ba pɔdi, ki tua buotuogu. ¹⁶ Lanwani ii, li nitaanli yudaano den yedi, "Ti ji ba tieni ledi i, ki baa bi puoba Benjamina jaba yaaba n sieni po, ti nan den kpaa Benjamina puoba kuli o?" ¹⁷ Bi den yedi, "Benjamina yaaba , yaaba n ciadi, ba baa bi puolŋuani, lanwani ii, buoluba kuli ki bodi Israyeli yaaba siiga. ¹⁸ Ti kan taa ti bisiaba ki puni ba, ban kuani, kelima Israyeli nitaanli den poli ki niani u ñɔnianu, 'Sola, yua taa o bisalo, ki puni Benjamina yaaba." ¹⁹ Lanwani ii, bi den yedi, "I kuli bani ke u badu ye binli kuli O Diedo po Cilo po (Beteli jienu po, Beteli yeni Cecemi sanjali puoli, ki ye Liban niganu). ²⁰ Bi den teni Benjamina yaaba i gadi, ki yedi ba, "Gedi mani ki ban wuoni ku daamɔngu tiidi nni, ki ya guu. ²¹ Yin diidi ya yognu ke Cilo jafanba ba ña ki jeli ki ciaga, yin ña i wuonkaani, ki cua, yuakuli ń bibi wan bua yua, ki kunu yeni o Benjamina diema nni. ²² Bi danba yeni bi kpiiba ya cua ki fuu, ki jalgi ti, ti ba yedi ba, "Yin tieni sugli tipo! Yin cabi ba ban ya ye lipo, kelima bu tɔbu cedi ke ti ki fidi ki baa yuakuli po pua. Ama, lan tie ke yinba ka taa i bisiaba ki puni ba yeni ii, lani nan ki tie i ya jalgi. ²³ Benjamina yaaba den tieni yeni i. Bi den taa ban bua ya puoba banlu, ya jafanba n den jeli ki ciaga yeni siiga, ki kuni yeni ba, ki kuani ba, ke bi tua bi denpuoba. Bi den guani ki maa bi dogi, ki kali li dogi nni. ²⁴ Israyeli yaaba den ñani likani, ke yuakuli lebdi ki kuni o dogu nni, yuakuli o buolu nni, yeni o cugli nni, yeni o denpo, yuakuli yeni wan den baa ya tinfanma biinu. ²⁵ Lanyognu, bado den kiye Israyeli diema nni, yuakuli den tie wan bani maama i.