¹ Lanwani ii, O Diedo den yedi Moyiisi, " Gedi Farawɔn kani, ki yedi o, ' O Diedo, Ebrewunba Tienu yedi ya maama ne: " Cedi n buolu ń gedi ki ban pugi nni." ² Ama a ya yie ke bi kan gedi, ki li piedi bi gedma, ³ O Diedo ba maani o nuu a yankuli po yu n ye ti diedi nni yeni ku muagu yeni ti kpaandi i yianbiadi ba cuo, i taama, i ŋunbi, ti yuoyuodi, i nee, i pee, i ŋuabi, i kokoli, yeni a bonyugda kuli. ⁴ O Diedo ba tieni mi paadma Israyeli yaaba yankuli yeni Ejipti yaaba yankuli siiga: Bá yanyenga kan kpe, ki tie Israyeli yua ya yanga. ⁵ O Diedo den seni li daali; O den yedi, " Li tie saala i ke n ba cedi li bonli ń tieni mi diema nni."" ⁶ Li den fiifa ke O Diedo cedi ke li tieni. Ejipti yandi kuli den kpe. Ama bá yanyenga den ki kpe, ki tie Israyeli yaaba yanga. ⁷ Farawɔn den kpaagi, ke li yaalidi o yeni Israyeli yaaba yandi ń ki kpe bá yanyenga. Ama o pali den juagi yeni mi lebdima, o den yie ke o kan cabi bi niba ń gedi. ⁸ Lanwani ii, O Diedo den yedi Moyiisi yeni Haarɔn, " Kɔdi mani mi fantanbɔnma u fanu nni, ki jobi nuupuogu. Fini Moyiisi, ŋan yadi li fantanbɔnma tanpoli, mi faama nni, Farawɔn nintuali, o nunbu nni. ⁹ Mi ba kpandi ki tua tangulungu i, Ejipti diema tinfanma nni kuli." Mi ba tua wagma ki cedi bi niba yeni ti yandi gbani ń puoni, ki mɔli, ki tua yiadi bi gbani po kuli Ejipti diema nni. ¹⁰ Lanwani ii, Moyiisi yeni Haarɔn den taa mi fantanbɔnma u fanu nni, ki sedi Farawɔn nituali. Moyiisi den yadi ma tanpoli, mi faama nni. Mi fantanbɔnma yeni den cedi ke bi niba yeni ti yandi gbani puoni, ki mɔli, ki pudi ki tua yiadi bi gbannandi po kuli. ¹¹ Ejipti ñɔgdanba den kan fidi ki tuogi ki nia yeni Moyiisi kelima bi gbannandi kuli den gbie yeni yiadi baba i , bani yeni Ejipti niba yaaba n sieni kuli. ¹² O Diedo den juagi Farawɔn pali, ke waa cengi Moyiisi yeni Haarɔn. Li den tieni nani O Diedo ń den tuodi ki waani ke o tieni maama i. ¹³ Lanwani ii, o Diedo den yedi Moyiisi, " Fii siŋaapanpangu, ki gedi ki sedi Farawɔn nintuali, ki yedi o, ' O Diedo, Ebrewunba Tienu yedi mine: " Cedi N buolu ń gedi ki ban pugi nni. ¹⁴ Mɔla wani ii, n ba soli fini a bá po, a niba po yeni a naacenba po yeni i yianbiadi. N ba tieni yeni, ke yin bandi ke nilo bakuli ki ye ki tinga po ne nani Mini yeni. ¹⁵ N bi ba fidi yugdi n nuu ki pua yinba yeni i niba yeni i yianbiadi, ki buoni yi ki tinga po ne. ¹⁶ Ama yaali ya po ke n ŋa yi yeni li miali, n bua ke yin bandi yaali n tie N Paaciamu, ki kpiagi n yeli ki tinga kuli po. ¹⁷ A dá li kubi n buolu yeni ki mabinga, ki yie ke a kan cabi ba, ban gedi. ¹⁸ Cengi mani! Saala, ya yognu ne, N ba taafaaciangu, yin ki kpeli ki la yaagu Ejipti diema cilma hali yeni mɔlane. ¹⁹ Tuodi mani ki sɔni i tuonsɔnba ban taani yin pia ya yankuli yeni ya kpaandi ki wuoni ya kaanu n ŋani. Ya nilo yeni ya yanga n ye ku muagu yeni ti kpaandi nni, kaa pundi deni, ku taafaaciangu ba pua ba ban kpe."" ²⁰ Lanwani ii, Farawɔn naacenba yaaba n gbadi ki daani O Diedo ñɔmaama nni, den den tuodi ki kagni ki kpeni yeni bi yonbi yeni bi yankuli ti diedi nni. ²¹ Yaaba n den ki daani ke O Diedo ñɔmaama tie mamɔnma den ŋa bi yonbi yeni bi yankuli ti kpaandi nni i. ²² O Dido den yedi Moyiisi, " Tandi a nuu tanpoli, ke ku taafaaciangu ń́ pua Ejipti diema kuli, ki naa bi niba, ti yandi, yeni ti kpaandi nni tiidi Ejipti diema nni kuli. ²³ Moyiisi den tandi o nuu yeni o gbiamu tanpoli, ke O Diedo cedi ke i taatantandi yeni ku taafaaciangu, i taañigdi yeni a taatana jiidi ki tinga po. ²⁴ Lanwani ii, ku taafaagu den ŋmadi yeni i taañigdi yeni a taatana, ke li bia boncianla, ban den ki kpeli ki la ya taafaaciangu Ejipti diema nni hali man tua diema. ²⁵ I kaankuli Ejipti diema nni, ku taafaaciangu den pua a bona kuli ti kpaandi nni, bi niba, yeni ti yandi. Ku den pua ti tiidi, ki figdi i tiidi boncianla. ²⁶ Lan ñani Gociheni, Israyeli yaaba ń kua naankani baba i ke taaga den ki baá. ²⁷ Farawɔn den sɔni ke bi yini Moyiisi yeni Haarɔn. O den yedi ba, "N biidi U Tienu nunga nni mɔlane. O Diedo tie yua n tiegi cain, mini yeni n niba n tie nibiadba. ²⁸ Jaandi ki mia O Diedo kelima i taatantandi yeni a taatana yabdi ki kandi. N ba cedi yi yaadi ki ji da ye nekanba." ²⁹ Moyiisi den yedi o, "N ya siedi a kani , ki ñani, n ba tandi n nui, ki jaandi O Diedo. I taatantandi ba sedi, taatana mo ji kan ya baa. Yeni i ke a ba bandi ke O Diedo n die ki tinga. ³⁰ Ama N bani ke fini yeni a naacenba da ki fangi O Diedo, U Tienu." ³¹ Leni tiidi yeni kpanu bima tiidi den biidi boncianla, kelima leni tiidi den mali o, ke kpanu bima tiidi mo den puuni o. ³² Ama blee yeni o tiibuoli wani den ki biidi kelima tii be tonma. ³³ Moyiisi ń siedi Farawɔn ki ñani o diema nni, ke o tandi o nui, ki jaandi O Diedo; i taatantandi yeni a taatana ji den sedi, ke ki taaga yandi. ³⁴ Farawɔn ń la ke ki t,, aaga i taatantandi yeni a taatana sedi, ke wani yeni o naacenba tieni go ti tuonbiadi, ki juagi bi pala. ³⁵ Farawɔn pali den juagi ki kandi hali ke o den ki bua ke Israyeli yaaba gedi. Nani O Diedo ń den tuodi ki waani Moyiisi ke o baa tie maama yeni.