¹ Ke ODiedo yedi Moyiisi, " Gedi Farawɔn kani ki yedi o, ' O Diedo yedi ya maama ne," Cedi N buolu ń gedi ki ban pugi nni mi fanpienma nni. ² N ba cedi a pɔnda ń woli a diema. ³ U kpenu baa milbi yeni pɔnda baba i. A ba do ki kua badidiegu, ki kua i diena nni, i dieduadidi nni, i duani po. A ba kua a naacenba diedi nni. A baa kua i fani nni yeni ti sajetiadi po. ⁴ A baa do ki woli yi yeni i niba, yeni i naacenba."" ⁵ O Diedo den yedi Moyiisi, "Yedi Haarɔn, ' Tandi a nuu yeni u gbiamu u kpenu po, ti bɔndi yeni a ñincina yeni ti sanbuodi po, ki cedi a pɔnda ń do ki kua Ejipti diema nni.'" ⁶ Haarɔn den tandi a nuu yeni u gbiamu Ejipti ñima po, ke a pɔnda doni ki yadi ki gbie Ejipti tinfanma. ⁷ Ama Ejipti ñɔgdanba mɔ den cedi ke a pɔnda doni ki kua Ejipti diema nni. ⁸ Ke Farawɔn yini Moyiisi yeni Haarɔn ki yedi ba, "Jaandi mani ki mia O Diedo, ke wan ñani a pɔnda n diema nni mini yeni n niba po. Yeni, n ba cedi o buolu ń gedi ki ban pugi o." ⁹ Moyiisi den yedi Farawɔn, fini n pia u paalu ki ba lugdi ya daali ke n ba jaandi a po, a niba yeni a naacenba po, ke a pɔnda ń fuadi ki yinba yeni i diedi nni, ki ji ya ye i kpeni nni baba." ¹⁰ Farawɔn den yedi, " Saala." Moyiisi den yedi " Lan tua nani ŋan yedi maama, yeni, a ba bandi ke niloba kuli ki ye ki tie nani O Diedo, ti Tienu yeni. ¹¹ A pɔnda ba fuadi ki ŋa yi yeni i diedi, i niba yeni i naacenba. A baa ye u kpenu nni baba i." ¹² Moyiisi yeni Haarɔn den fii, ki ñani ki ŋa Farawɔn. Ke Moyiisi jaandi ki mia O Diedo, ke li nua wan duoni ya pɔnda Farawɔn po. ¹³ O Diedo den tieni nani Moyiisi ń mia maama: a pɔnda den kpe ti diedi nni, a cancana po, i kuani nni. ¹⁴ Bi niba den taani a, ki dogni gbaali gbaali, ki a bedi ki nu yeni mi diema. ¹⁵ Ama, Farawɔn ń diidi ki sua ke li tungi o po, ke o go juagi o pali, kaa cengi Moyiisi yeni Haarɔn, nani O Diedo ń den tuodi ki waani ke o ba tieni maama yeni. ¹⁶ O Diedo den yedi Moyiisi, "Yedi Haarɔn, 'Tandi a nuu yeni a gbiamu, ki pua ki tinga, ti tandi ń tua siijunjundi Ejipti diema ni kuli.'" ¹⁷ Bi den tieni yeni, Haarɔn den tandi o nuu yeni o gbiamu, ki pua ki tinga po. I siijunjundi den fidi ki do bi niba po yeni ti yandi po. I tanbiini kuli den tua siijunjundi ki gbie yeni Ejipti diema tinfanma. ¹⁸ Ejipti ñɔgdanba den bigni ke ban fidi ti siijunjundi ki gbali. Ti siijunjundi den do bi niba yeni ti yandi po. ¹⁹ Ke bi ñɔgdanba yedi Farawɔn, " Ya bancianma ne wani tie U Tienu ya nuu i." Ama Farawɔn den juagi o pali, ki yie ke o kan cengi ba. Li den tie nani O Diedo ń den tuodi ki waani ke o ba tieni maama yeni i. ²⁰ O Diedo den yedi Moyiisi, "Fii siŋaapanpangu, ki tuogi Farawɔn wan caa u kpenu po ya yognu. ŋan yedi o, 'O Diedo yedi mine: "Cedi n buolu ń gedi ki ban pugi nni. ²¹ Lanyaaka, a ya yie ke n buolu kan gedi ki pugi nni, N ba sɔni i sii, yin woli yi yeni i niba yeni i naacenba, yeni i diedi nni kuli. Ejipti diena baa gbie yeni sii baba i. Ban se ya tinga po mo baa gbie yeni sii baba i. ²² Ama, lanya daali, N ba cedi Gociheni dogu nni yema ń ya ye mibá, N buolu ń ye ye diema nni kan ya pia naasii . Lani n ba tieni, yin bandi ke Mini n tie O Diedo, ki hali i diema nni ne. ²³ N ba tieni mi paadma i buoli yeni n buolu siiga. Lanya yaalidgu banma ba tieni saala."" ²⁴ O Diedo den li tieni yeni i, ke ti naasiibɔndi wuli ki woli Farawɔn diegu yeni o niba diedi yeni o naacenba diedi. A bona den biidi boncianla Ejipti diema tinfanma po kelima ti naasiibɔndi po. ²⁵ Farawɔn den yini Moyiisi yeni Haarɔn, ki yedi ba, "Gedi mani ki ban yidi salga, ki pugi i Tienu ti diema nni ne." ²⁶ Moyiisi den jiini, " Li kan ya tiegi ti po yeni tin tieni yeni, kelima tin ba yidi ya salga baa tie tuongundli Ejipti yaaba po. Ti ya yidi salga Ejipti yaaba nintuali, bi nunbu nni, li ba tua ya tuonli n gundi bi po, bi kan lugdi ti a tana aa? ²⁷ Yeni ki tuo, li tie tin cuoni dana taa, ki gedi mi fanpienma nni, ki ban yidi salga lan buali maama, ki pugi T Tienu nani wan bili ti o ñɔbonli maama yeni." ²⁸ Farawɔn den yedi, " N ba cabi yi yin gedi ki yidi salga mifanpienma nni. Ama, yin da gedi fagma. Yin jaandi n po." ²⁹ Moyiisi den yedi, " N ya ñani a diema nni ya yognu, n ba jaandi O Diedo, ki mia, ke wan fagni ti naasiibɔndi ki faabi fini, a niba yeni a naacenba saala. Ama yin da jagi yaali n gundi, ki ba pani ti buolu ban gedi ki ban yidi salga, ki pugi O Diedo." ³⁰ Moyiisi den ñ̃ani ki ŋa Farawɔn, ki banjaandi ki pugi O Diedo. ³¹ O Diedo den tieni Moyiisi ń jaandi ki mia o yaali: O den cedi ke ti naasiibɔndi yaadi ki ŋa Farawɔn yeni o niba yeni o naacenba. Bá siiyenga den ki sieni. ³² Ama Farawɔn gɔ den juagi o pali lanyognu, ki yie ke o kan cabi Ebewunba ban gedi.