¹ O Diedo den yedi Moyiisi, " Gedi Farawɔn kani, kelima N den juagi o pali yeni o naacenba pali. N den tieni yeni ki bua waani n paacianma bancianma bi siiga nni i. ² N go tieni lani ke yin fidi ki togdi i bila yeni yaabila Min tieni ya bona i, yeni min cagni Ejipti yaaba yeni ya biadma, min tieni bi siiga nni ya yaalidgu bancianma, n paaciamu po. Yeni i ke i ba bandi ke Mini n tie O Diedo." ³ Lanwani ii, Moyiisi yeni Haarɔn den gedi Farawɔn kani, ki maadi o, " O Diedo, Ebrewunba Tienu yedi ya maama ne: ' Hali yeni o laa yogu i, ke i ba baa yiedi ke i kan jiini i yula n nintuali? Cedi mani N buolu ń gedi ki ban pugi nni. ⁴ Ama, i ya yie ke N buolu kan gedi, yin fangi i yula, ke saala, n ba cedi ti naasuudi ń yadi i diema tinfanma nni kuli. ⁵ I ba ladi ki pubni mi tinfanma hali ke nilo kan fidi ki la tinga. I ba ŋmani ki biidi ku taafaaciangu ń den biidi ki sieni ya bonpiaba. I go ba ŋmani ki biidi ya tiidi n ye i kuani nni kuli. ⁶ I ba yadi ki kua ki gbie i diedi nni, i naacenba yeni Ejipti yaaba kuli diedi nni. Li baa tie i baanba yeni i yaajanba ń ki kpeli ki la yaali, ya bonli ke bi dá ki kpeli ki la hali ban ye ki tinga po ne, hali yeni tin ye ya yogu ne.'" Moyiisi den siedi ki ŋa Farawɔn, ki ñani. ⁷ Farawɔn naacenba den yedi o, " Hali o laa yogu i, ke a ba bandi ke ya nilo ne tie ti po yubɔnli i? Cedi Israyeli yaaba, ban gedi ki pugi bi Tienu. Hali yeni mɔla kuli, ŋaa diidi ki sua ke Ejipti diema biidi ki caa aa?" ⁸ Bi den yini Moyiisi yeni Haarɔn ke bi guani Farawɔn kani, ke o yedi ba, " Gedi mani ki ban pugi O Diedo, i Tienu. Ama bile n tie ya niba n ba gedi?" ⁹ Moyiisi den yedi, " Ti ba gedi yeni ti nipaanba yeni ti nikpela, yeni ti bijaba yeni ti bisiaba. Ti ba gedi yeni ti yangbenga yeni ti yanbidi, kelima ti ba bobni jaancianma i O Diedo po." ¹⁰ Farawɔn den yedi ba, n ya cedi ke yinba yeni i bila gedi, O Diedo ń ya ye yeni yi. Diidi, i bobindi maabiigu i, i yula nni. ¹¹ Mii tuo! Yinba bi jaba baba ń gedi ki ban pugi O Diedo, kelima yin mia yaali n yeni." Bi den tudi ki ñani Moyiisi yeni Haarɔn Farawɔn kani. ¹² Lanwani ii, O Diedo den yedi Moyiisi, " Tandi a nuu Ejipti diema po, ti naasuudi po, tin cua ki woli ki ŋmani ki biidi ya tiidi yeni ya bonpiaba n ye Ejipti tinfanma po, yeni ku taafaaciangu ń den biidi ki sieni ya tiidi kuli." ¹³ Moyiisi den tandi o nuu yeni o gbiamu Ejipti diema po, ke O Diedo cedi ke puoli faalu figi li daali yeni li ñiagu. Lan fandi, puoli faalu den cua yeni ti naasuudi. ¹⁴ Ke ti naasuudi ladi ki gbieni, ki milbi i kaankuli Ejipti diema nni. Li naasuudi den yabi boncianla hali ban ki kpeli ki la li buolu, ke libakuli kan go tieni nani li bonbuolu yeni. ¹⁵ Ti den ladi ki gbieni mi tinfanma kuli, hali ke li biigli tieni mi diema nni. Ti den ŋmani ki biidi a bonpiaba yeni i tiidi faadi yeni i luana kuli, ki biidi ku taafaaciangu ń den biidi ki sieni ya tiidi yeni ya bonpiaba. Bonpiabli bii tibu den ki sieni Ejipti diema yeni mi kuani nni, ke tii ŋmani ki biidi. ¹⁶ Lanwani ii, Farawɔn den sɔni tontoni, ke bi yini Moyiisi yeni Haarɔn, ke o maadi ba, " N biidi O Diedo U Tienu nintuali yeni yinba mo ya nintuali. ¹⁷ Mɔlane, yin ji mia sugli ki cabi nni n biidi, ki jaandi ki mia O Diedo I Tienu, ke wan piani li kuuma janjanma ki faabi nni." ¹⁸ Ke Moyiisi siedi ki ñani ki ŋa Farawɔn, ki ban jaandi O Diedo. ¹⁹ ODiedo den cedi ke nintuali faaciangu figi, ki wodi ti naasuudi ki ban luni li mɔgmɔnli ñincianma nni; bá naasuuyengu den ki sieni Ejipti diema nni. ²⁰ Ama, O Diedo den juagi Farawɔn pali, ke o yie, kaa cedi ke Israyeli yaaba gedi. ²¹ O Diedo den yedi Moyiisi, " Tandi a nuu yeni a gbiamu tanpoli, li biigli ń cua Ejipti diema nni, ya biigli n bɔni cinmm, hali ke nilo kan fidi ki sii. ²² Moyiisi den tandi o nuu yeni o gbiamu tanpoli, ke li bɔnbɔnbiigli baá Ejipti diema nni linmm, hali dana taa. ²³ Obakuli den ki nua o lielo. Obakuli den ki ñani o diegu nni hali dana taa. Ama, Israyeli yaaba den pia mi yenyenma ban den kua naankani. ²⁴ Farawɔn den sɔni, ke bi yini Moyiisi, ke o yedi o, "Gedi mani ki ban pugi O Diedo. I ba fidi ki gedi yeni diedi nni yaaba kuli, ama, yin ŋa a yanbila yeni a yangbenga wani nekanba. ²⁵ Ama ke Moyiisi yedi, " A nan ba teni ti ti yandi a padjuukaana po, ti banfidi ki yidi salga, ki pugi O Diedo ti Tienu. ²⁶ Ti ba gedi yeni ti yankuli mɔ i; bá yenyenga kan sieni. Ti ba taa lanya yandi, ki yidi salga, ki pugi O Diedo. Kelima, ti dá ki bani tin ba lugdi ya yandi salga po , kase ti pundi likani. ²⁷ Ama, O Diedo den juagi Farawɔn pali, ke o yie ke Israyeli yaaba kan gedi. ²⁸ Farawɔn den maadi Moyiisi, " Siedi n kani! ŋan fangi a yuli bonyenli po, ŋan da go la n nunga, kelima a ya go la n nunga ya daali, a ba kpe." ²⁹ Moyiisi den jiini, " Fini aba n yedi. N ji kan fandi ki go kadi yeni a nunga.